പാലക്കാട്ടെ കൊലപാതകങ്ങളുടെ പശ്ചാത്തലത്തില്‍ ജാഗ്രതയോടെയിരിക്കാന്‍ നേതാക്കന്മാര്‍ക്കും പ്രവര്‍ത്തകര്‍ക്കും മുന്നറിയിപ്പുമായി ബിജെപി തമിഴ്‌നാട് പ്രസിഡന്റ് അണ്ണാമലൈ. കഴിഞ്ഞ ദിവസം രാത്രിയാണ് പാര്‍ട്ടിയുടെ വാട്‌സ് ആപ്പ് ഗ്രൂപ്പില്‍ അണ്ണാമലൈ ശബ്ദ സന്ദേശമയച്ചത്.

കേരളത്തിലെ സംഘര്‍ഷങ്ങളുടെ പശ്ചാത്തലത്തില്‍ പോപ്പുലര്‍ ഫ്രണ്ടിനെ മൂന്നുമാസത്തിനുള്ളില്‍ നിരോധിച്ചേക്കും. ഇങ്ങനെയുണ്ടായാല്‍ തമിഴ്‌നാട്ടിലും തിരിച്ചടിയുണ്ടാകും.

തീവ്ര ഹിന്ദുത്വ ആശയങ്ങള്‍ പറയുന്ന നേതാക്കന്മാരും പ്രവര്‍ത്തകരും സോഫ്റ്റ് ടാര്‍ജറ്റായേക്കാം. രാത്രി കാലങ്ങളിലും മറ്റും ഒറ്റയ്ക്കു യാത്ര ചെയ്യുന്നത് പരമാവധി ഒഴിവാക്കണമെന്നും ശബ്ദ സന്ദേശം നിര്‍ദേശിക്കുന്നു. പാലക്കാടിനോടു ചേര്‍ന്നുള്ള കോയമ്പത്തൂരിലാണ് ബിജെപിക്കു തമിഴ്‌നാട്ടില്‍ കാര്യമായ സ്വാധീനമുളളത്. ഈ മേഖലയിലെ നേതാക്കന്മാരെയും പ്രവര്‍ത്തകരെയും ലക്ഷ്യമിട്ടാണ് ശബ്ദ സന്ദേശം.


പാര്‍ട്ടി പ്രവര്‍ത്തകര്‍ക്ക് തമിഴ്‌നാട് ബിജെപി അധ്യക്ഷന്‍ നിര്‍ദേശം നല്‍കുന്നെന്ന പേരിലുള്ള ശബ്ദരേഖ സോഷ്യല്‍ മീഡിയയില്‍ വ്യാപകമായി പ്രചരിക്കുന്നുണ്ട്.

കോയമ്പത്തൂര്‍, കന്യാകുമാരി, വെല്ലൂര്‍ തുടങ്ങിയ സ്ഥലങ്ങളിലെ പാര്‍ട്ടി പ്രവര്‍ത്തകര്‍ സുരക്ഷിതരായിരിക്കണമെന്നും കുറച്ച് മാസത്തേക്ക് ഒറ്റയ്ക്ക് എവിടെയും സഞ്ചരിക്കരുതെന്നും അണ്ണാമലൈ നിര്‍ദേശിക്കുന്നുണ്ടെന്നാണ് റിപ്പോര്‍ട്ട്. മുന്‍പ് കൊലപാതകങ്ങള്‍ നടന്ന രീതി നോക്കുമ്പോള്‍ ഈ പ്രദേശങ്ങളിലെ കേഡര്‍മാരെ ലക്ഷ്യമിടാന്‍ സാധ്യതയുണ്ട്. അതുകൊണ്ട് മുന്‍കരുതലുകള്‍ സ്വീകരിക്കുക. ഒറ്റയ്ക്ക് എവിടെയും യാത്ര ചെയ്യരുത്. തങ്ങളുടെ പ്രദേശങ്ങളിലെ പ്രവര്‍ത്തകര്‍ സുരക്ഷിതരാണെന്ന് മണ്ഡലം നേതാക്കള്‍ ഉറപ്പാക്കണം. പോപുലര്‍ ഫ്രണ്ടിനെ നിരോധിക്കുകയാണെങ്കില്‍ അതിന്റെ പ്രത്യാഘാതങ്ങള്‍ ഉണ്ടാകാന്‍ ഇടയുണ്ടെന്നും അണ്ണാമലൈയുടെ പേരിലുള്ള ഓഡിയോയില്‍ പറയുന്നു.

ഒരു പ്രവര്‍ത്തകന്റെ ജീവന്‍പോലും നഷ്ടപ്പെടരുത്. ആഭ്യന്തര മന്ത്രാലയം സാധ്യമായ എല്ലാ നടപടികളും സ്വീകരിക്കുന്നുണ്ടെന്നും ബിജെപി തമിഴ്‌നാട് അധ്യക്ഷന്‍ പറയുന്നു. അതത് മേഖലകളില്‍ ഹിന്ദുത്വ മുഖമായി അറിയപ്പെടുന്നവരുടെ പട്ടിക സംസ്ഥാന നേതൃത്വത്തിന് ഉടന്‍ അയച്ചുതരണം. ഒരു മുന്‍കരുതല്‍ എന്ന നിലയിലാണ് ഇത് ചെയ്യുന്നത്. ഒരുപക്ഷേ നിരോധനം പോലും സംഭവിക്കില്ല, പക്ഷേ നമ്മള്‍ ജാഗ്രത പാലിക്കേണ്ടതുണ്ടെന്നും ശബ്ദരേഖ പറയുന്നു.

അതേസമയം അണ്ണാമലൈക്കെതിരെ പോപുലര്‍ ഫ്രണ്ട് തമിഴ്‌നാട് സെക്രട്ടറി നാഗൂര്‍ മീരാന്‍ പോലീസിന് പരാതി നല്‍കിയെന്ന റിപ്പോര്‍ട്ടും പുറത്ത് വന്നിട്ടുണ്ട്. അണ്ണാമലൈയുടെ വിവാദ ശബ്ദസന്ദേശം മതവിദ്വേഷം പ്രചരിപ്പിക്കുന്നതാണെന്നും കേസ് രജിസ്റ്റര്‍ ചെയ്യണമെന്നും ആവശ്യപ്പെട്ട് ഡിജിപിക്ക് മീരാന്‍ പരാതി നല്‍കി.