മുഖ്യമന്ത്രിയുമായി പൊതുവേദിയില്‍ സരിത സ്വകാര്യം പറയുന്ന ഫോട്ടോ സഖാക്കള്‍ ഉണ്ടാക്കിയ വ്യാജ ഫോട്ടോയാണെന്ന്‌ പൊതുവേ ആരോപണമുണ്ടായിരുന്നു. മേശമേല്‍ ഇരിക്കുന്ന രണ്ട്‌ ഗ്ലാസുകള്‍ വട്ടമിട്ട്‌ കാണിച്ച്‌ അത്‌ കുപ്പി മുറിച്ചതാണെന്നു ഫേസ്‌ ബുക്കില്‍ പലരും പറഞ്ഞിരുന്നു. മുറിച്ച കുപ്പി ഫോട്ടോയുണ്ടാക്കിയ വീരന്മാര്‍ വിട്ടു പോയതാണെന്നും അവര്‍ പറഞ്ഞു.

ഇതോടൊപ്പം ഇന്ത്യാവിഷന്റെ പേരുപറഞ്ഞ്‌ വന്ന മറ്റൊരു വാര്‍ത്തയും ശ്രദ്ധനേടി. മുഖ്യമന്ത്രിയോടൊപ്പമുള്ളത്‌ തന്റെ ഫോട്ടോ മോര്‍ഫ്‌ ചെയ്‌തതാണെന്നായിരുന്നു മറ്റൊരു അവകാശവാദം. ഈ ഒരു വാര്‍ത്ത ഇന്ത്യാവിഷന്‍ നല്‍കിയതല്ലെന്ന്‌ ചാനല്‍ സ്ഥിരീകരിക്കുകയും ചെയ്‌തു.

എന്നാല്‍ ഇതിനെയൊക്കെ വെല്ലുന്നതായിരുന്നു പ്രതിപക്ഷ നേതാവ്‌ വിഎസ്‌ അച്യുതാനന്ദനും സരിതയും നില്‍ക്കുന്ന ഫോട്ടോ വികൃതമായി ഫോട്ടോഷോപ്പ്‌ ചെയ്‌തത്‌.

എന്നാല്‍ സരിത കടപ്ലാമറ്റത്തെ യോഗത്തില്‍ പങ്കെടുത്തിരുന്നെന്ന്‌ മുഖ്യമന്ത്രി തന്നെ വ്യക്തമാക്കി. അതേസമയം സരിതയോടൊപ്പമുള്ള തന്റെ ഫോട്ടോയില്‍ പുതുമയില്ലെന്ന് മുഖ്യമന്ത്രി ഉമ്മന്‍ ചാണ്ടി പറഞ്ഞു. ഇക്കാര്യം നേരത്തെ താന്‍ വ്യക്തമാക്കിയതാണ്. സരിത അവിടെ വന്നിരുന്നതായി സഹപ്രവര്‍ത്തകര്‍ പറഞ്ഞാണ് താന്‍ അറിഞ്ഞത്. സരിതയുടെ അറസ്റ്റിനു ശേഷമാണ് സഹപ്രവര്‍ത്തകര്‍ ഇക്കാര്യം ശ്രദ്ധയില്‍ പെടുത്തിയത്. എഡിബിയുടെയോ മറ്റോ പ്രതിനിധി ആയാണ് സരിത എത്തിയതെന്നും മുഖ്യമന്ത്രി പറഞ്ഞു.

സരിതയോടൊപ്പമുള്ള മുഖ്യമന്ത്രി ഉമ്മന്‍ ചാണ്ടിയുടെ ചിത്രം കഴിഞ്ഞ ദിവസം പീപ്പിള്‍ ടീവി പുറത്തുവിട്ടിരുന്നു. പൊതുചടങ്ങില്‍ ഇരുവരും സ്വകാര്യം പറയുന്നതിന്റെ ചിത്രമാണ് പുറത്തായത്. 2012 ജനുവരി 14ന് പാലാ കടപ്ലാമറ്റത്തെ ജലനിധി പദ്ധതിയുടെ സംസ്ഥാനതല ഉദ്‌ഘാടന ചടങ്ങിലെ ചിത്രമാണിത്. സരിയെ പരിചയമില്ലെന്ന മുഖ്യമന്ത്രിയുടെ വാദം തെറ്റെന്ന് തെളിയിക്കുന്നതായിരുന്നു ചിത്രം.