വിവാഹത്തിന് മുമ്പായി വരനും വധുവും മുങ്ങി... പ്രതിശ്രുതവരനെയും വധുവിനെയും കാണാനില്ലെന്ന് പരാതി, അന്വേഷണം ഊര്‍ജ്ജിതമാക്കി . വിവാഹം നിശ്ചയിച്ചതിനു പിന്നാലെയാണ് ഈ സംഭവം.

തിങ്കളാഴ്ച മുതല്‍ യുവതിയെ കാണാനില്ലെന്ന് കാണിച്ച് ബന്ധുക്കള്‍ മാള പൊലീസില്‍ പരാതി നല്‍കി. അതേസമയം പ്രതിശ്രുത വരന്‍ മൂന്നാറില്‍ പോകുന്നു എന്നു പറഞ്ഞാണ് വീട്ടില്‍ നിന്നും സ്ഥലം വിട്ടത്.

കല്യാണത്തിന് മുമ്പേ ചെക്കനും പെണ്ണും നാടുവിട്ടത് പൊലീസിനും തലവേദനയായി. ഇരുവരുടേയും മൊബൈല്‍ ഫോണ്‍ സ്വിച്ച് ഓഫ് ചെയ്ത നിലയിലാണെന്ന് പൊലീസ് സൂചിപ്പിച്ചു. ഇരുവരും മാളയില്‍നിന്ന് ഒരുമിച്ച് ബൈക്കില്‍ പോയതായി പോലീസിന് സൂചന ലഭിച്ചിട്ടുണ്ട്.

ഏറെക്കാലമായി പ്രണയത്തിലായിരുന്ന ഇരുവരുടെയും വിവാഹത്തിന് യുവതിയുടെ വീട്ടുകാര്‍ക്ക് താത്പര്യമില്ലായിരുന്നു. നിര്‍ബന്ധത്തിന് വഴങ്ങി ഒടുവില്‍ വീട്ടുകാര്‍ വിവാഹത്തിന് സമ്മതിക്കുകയായിരുന്നു.

സുഹൃത്തുക്കളില്‍ നിന്നും വിവരങ്ങള്‍ ശേഖരിച്ച പൊലീസ്, യുവാവിനും യുവതിക്കും വേണ്ടിയുള്ള അന്വേഷണം ഊര്‍ജ്ജിതമാക്കിയിരിക്കുകയാണ്.