മധു കൊലക്കേസ് രാഷ്ട്രീയ സ്വാധീനവും പണവുമുപയോഗിച്ച് അട്ടിമറിക്കാന്‍ ശ്രമിക്കുന്നെന്ന് കുടുംബം. സാക്ഷിവിസ്താരത്തിനെത്തിയ രണ്ട് പേര്‍ അടുത്തടുത്ത ദിവസങ്ങളില്‍ കൂറുമാറി. സാക്ഷികളെ ഒളിവില്‍ പാര്‍പ്പിച്ചാണ് പ്രതികള്‍ കൂറുമാറ്റുന്നതെന്നാണ് ബന്ധുക്കളുടെ ആരോപണം.


സാക്ഷികളെ ഒളിപ്പിച്ചിരിക്കുകയാണെന്നും, അവരുമായി സംസാരിക്കാന്‍ കഴിയാത്തത് പ്രതിസന്ധിയുണ്ടാക്കുന്നെന്നും സ്പെഷല്‍ പ്രോസിക്യൂട്ടര്‍.

മധുവിനെ മര്‍ദിക്കുന്നത് കണ്ടെന്ന് മജിസ്ട്രേറ്റിന് മുന്‍പില്‍ മൊഴി നല്‍കിയവരാണ് അടുത്തിടെ കൂറുമാറിയത്. സാക്ഷിവിസ്താരത്തിനിടെ നേരത്തെ നല്‍കിയ മൊഴി ഇരുവരും നിഷേധിച്ചു.

പൊലീസിന്റെ ഭീഷണിക്ക് വഴങ്ങിയാണ് ആദ്യം മൊഴി നല്‍കിയതെന്ന് ഇവര്‍ തിരുത്തിപ്പറഞ്ഞു. 2018 ഫെബ്രുവരി 22നാണ് മുക്കാലി ചിണ്ടക്കി ഊരിലെ മധുവിനെ (30) മോഷണക്കുറ്റം ആരോപിച്ച് നാട്ടുകാര്‍ പിടികൂടിയത്.

മുക്കാലി മേഖലയിലെ കടകളില്‍ നിന്ന് ഭക്ഷണ സാധനങ്ങള്‍ മോഷ്ടിച്ചെന്ന പേരിലാണ് ആള്‍ക്കൂട്ടം ക്രൂരമായി മര്‍ദിച്ച് കൊലപ്പെടുത്തിയത്.