സ്വര്‍ണ്ണക്കടത്ത് കേസ് പ്രതി സ്വപ്ന സുരേഷിന്റെ ഫ്ലാറ്റിലും ഓഫീസിലും കനത്ത സുരക്ഷ.... 24 മണിക്കൂറും പോലീസ് കാവല്‍, സ്വപ്നയുടെ സുരക്ഷ കണക്കിലെടുത്താണ് സുരക്ഷയെന്ന് പോലീസ്.
നിലവിലെ ആരോപണങ്ങള്‍ക്ക് പിന്നാലെ തന്റെ ജീവന് ഭീഷണിയുണ്ടെന്ന് പറഞ്ഞ് സ്വപ്ന കോടതിയില്‍ ഹര്‍ജി നല്‍കിയിട്ടുണ്ടായിരുന്നു. പോലീസ് സുരക്ഷ ഏര്‍പ്പെടുത്തണമെന്നും ഹര്‍ജിയില്‍ ആവശ്യപ്പെട്ടിരുന്നു. ഇതിന്റെ പശ്ചാത്തലത്തിലാണ് പോലീസ് കനത്ത സുരക്ഷ ഏര്‍പ്പെടുത്തിയിരിക്കുന്നതെന്നാണ് റിപ്പോര്‍ട്ടുകള്‍.

ഷാജ് കിരണ്‍ വന്നു പോയി എന്ന വെളിപ്പെടുത്തലിന് ശേഷം സ്വര്‍ണ്ണക്കടത്ത് കേസില്‍ വലിയ തോതിലുള്ള ചര്‍ച്ചകളുയര്‍ന്നിരുന്നു. ആറ് മണിക്കൂറോളം ഷാജ് കിരണ്‍ സ്വപ്നയ്‌ക്കൊപ്പം ഉണ്ടായിരുന്നെന്നായിരുന്നു വെളിപ്പെടുത്തല്‍. ഇതിന് പിന്നാലെ ഓഫീസില്‍ സിസിടിവി സ്ഥാപിക്കാനുള്ള ഒരുക്കവും നടക്കുന്നുണ്ട്.


അതേസമയം ഇന്ന് മൂന്ന് മണിക്ക് എല്ലാം പറയുമെന്നാണ് സ്വപ്ന പ്രതികരിച്ചത്. വാര്‍ത്താ സമ്മേളനത്തില്‍ ശബ്ദ സന്ദേശം പുറത്തു വിടുമെന്നും സ്വപ്ന വ്യക്തമാക്കിയിട്ടുണ്ട്. പാലക്കാട് വെച്ച് വാര്‍ത്താ സമ്മേളനം വിളിച്ചായിരിക്കും സ്വപ്ന ശബ്ദ സന്ദേശം പുറത്തുവിടുക.

സ്വര്‍ണ്ണക്കടത്ത് കേസിലെ മറ്റൊരു പ്രതി സരിത്തിന്റെ മൊബൈല്‍ ഫോണ്‍ തിരുവനന്തപുരത്തെത്തിച്ച് വിജിലന്‍സ് കോടതിയില്‍ നല്‍കി. ലൈഫ് മിഷനുമായി ബന്ധപ്പെട്ട അന്വേഷണത്തിന് പുറമെ നിലവിലെ ഗൂഢാലോചനയുമായി ബന്ധപ്പെട്ട് എന്തെങ്കിലും രേഖകള്‍ ഉണ്ടോ എന്നായിരിക്കും അന്വേഷണ സംഘം പരിശോധിക്കുക എന്നാണ് നിലവിലെ വിലയിരുത്തല്‍.