കോണ്‍ഗ്രസുകാര്‍ക്ക് എന്നും വിശ്വസിക്കാവുന്ന നേതാക്കളായിരുന്നു സമുദായ നേതാക്കള്‍. ഇടയ്‌ക്കൊക്കെ അവര്‍ കണ്ണുരുട്ടി വേണ്ടത് സാധിച്ചെടുക്കുമായിരുന്നു എങ്കിലും ഈ സമുതായ നേതാക്കളെ കോണ്‍ഗ്രസുകാര്‍ക്ക് എന്നും പ്രിയമാണ്. ഇടയ്‌ക്കൊക്കെ അവര്‍ എന്തെങ്കിലും വിളിച്ചു പറഞ്ഞാലും തിരിച്ചൊന്നും പറയുന്ന പാരമ്പര്യം കോണ്‍ഗ്രസിനില്ല. കാരണം നാളത്തെ വോട്ട് ബാങ്കാണ് അവര്‍. 
എന്നാല്‍ വെള്ളാപ്പള്ളി രാഷ്ട്രീയ പാര്‍ട്ടി രൂപീകരിച്ചതോടെ സിപിഎമ്മിനൊപ്പം കോണ്‍ഗ്രസിനും ഏനക്കേടായി. കെപിസിസി പ്രസിഡന്റ് വിഎം സുധീരന്‍ അക്കാര്യം ഏറ്റെടുക്കുകയും ചെയ്തു. എന്നാല്‍ ഉമ്മന്‍ചാണ്ടിയും രമേശ് ചെന്നിത്തലയും പരിധിവിട്ട് ഒന്നും പറഞ്ഞില്ല.
ഇതിനിടെ ശിവഗിരി മഠത്തിലെ മുന്‍ മഠാധിപതി സ്വാമി ശാശ്വതികാനന്ദയുടെ മരണത്തെ ചൊല്ലി വാദപ്രതിവാദങ്ങള്‍ ശക്തമായി. എന്നാല്‍ ആഭ്യന്തര മന്ത്രി കൂടിയായ രമേശ് ചെന്നിത്തല അന്വേഷണ സാധ്യത തള്ളിക്കളയുകയാണ് ചെയ്യുന്നത്. നിലവിലെ സാഹചര്യത്തില്‍ തുടരന്വേഷണം സാധ്യമല്ലെന്ന് രമേശ് ചെന്നിത്തല പറഞ്ഞു. ബിജു രമേശ് അടക്കമുള്ളവരുടെ ആരോപണം നേരത്തെ തന്നെ ക്രൈംബ്രാഞ്ച് അന്വേഷിച്ച് തള്ളിയതാണ്. ഈ വിഷയത്തില്‍ കൂടുതല്‍ തെളിവ് ലഭിച്ചാല്‍ മാത്രമേ കേസില്‍ തുടരന്വേഷണം സാധ്യമാകുകയുള്ളൂവെന്നും അദ്ദേഹം തിരുവനന്തപുരത്ത് പറഞ്ഞു.
അതേസമയം ശാശ്വതികാനന്ദയുടെ ദുരൂഹ മരണത്തില്‍ വെള്ളാപ്പള്ളി നടേശനെയും മകന്‍ തുഷാറിനെയും നുണപരിശോധനക്ക് വിധേയമാക്കണമെന്ന് സഹോദരി ശാന്ത ആവശ്യപ്പെട്ടു ഇക്കാര്യം ആവശ്യപ്പെട്ട് മുഖ്യമന്ത്രിക്കും ആഭ്യന്തര മന്ത്രിക്കും പരാതി നല്‍കും. അന്വേഷണം വേണമെന്ന് വെള്ളാപ്പള്ളി പറയുന്നത് കേസ് അട്ടിമറിക്കാനാണെന്നും ശാന്ത ആരോപിച്ചു.
ശാശ്വതികാനന്ദ മരിച്ച ദിവസം വാടക കൊലയാളി പ്രിയന്‍ അദ്വൈതാശ്രമത്തില്‍ എത്തിയിരുന്നു. പ്രവീണ്‍ എന്നയാളുടെ കാറിലാണ് പ്രിയന്‍ എത്തിയത്. പ്രവീണിന്റെ അച്ഛനാണ് ഇക്കാര്യങ്ങള്‍ തങ്ങളോട് പറഞ്ഞത്. ഈ വിവരങ്ങള്‍ ക്രൈംബ്രാഞ്ച് അന്വേഷണ സംഘത്തോട് പറഞ്ഞെങ്കിലും അവര്‍ ഗൗരവമായി എടുത്തില്ലെന്നും ശാന്ത വ്യക്തമാക്കി. ശാശ്വതികാനന്ദയുടെ മരണത്തില്‍ അദ്ദേഹത്തിന്റെ സഹായിയായിരുന്ന സാബുവിന് മുഖ്യപങ്കുണ്ട്. സാബുവിനെ നുണപരിശോധനക്ക് വിധേയമാക്കിയാല്‍ എല്ലാ സത്യങ്ങളും പുറത്തുവരുമെന്നും ശാന്ത മാദ്ധ്യമങ്ങളോട് പറഞ്ഞു.
അതിനിടെ വെള്ളാപ്പള്ളി നടേശനെ എസ്എന്‍ഡിപി യോഗം ജനറല്‍ സെക്രട്ടറി സ്ഥാനത്ത് നിന്ന് പുറത്താക്കാന്‍ ശാശ്വതീകാനന്ദ തീരുമാനിച്ചിരുന്നുവെന്ന് വെളിപ്പെടുത്തി എസ്എന്‍ഡിപി ഡയറക്ടര്‍ ബോര്‍ഡ് അംഗമായിരുന്നു ഡോ. വിജയന്‍ രംഗത്തെത്തി. കൈരളി പീപ്പിള്‍ ടിവിയോടാണ് വിജയന്‍ ഇക്കാര്യം വെളിപ്പെടുത്തിയത്. വെള്ളാപ്പള്ളി നടത്തിയ സാമ്പത്തിക ക്രമക്കേട്ടുകള്‍ ശാശ്വതീകാനന്ദയ്ക്ക് ബോധ്യപ്പെട്ടിരുന്നുവെന്നും അധികാരം പിടിച്ചെടുക്കാന്‍ വെള്ളാപ്പള്ളി ശ്രമിക്കുന്നതായി സ്വാമിക്ക് മനസിലായെന്നും വിജയന്‍ പറഞ്ഞു.
റിട്ടയേര്‍ഡ് ജസ്റ്റിസ് സുകുമാരനെ പ്രസിഡന്റ്കാനും വക്കം പുരുഷോത്തമനെ ജനറല്‍ സെക്രട്ടറിയാക്കാനുമായിരുന്നു ശാശ്വതീകാനന്ദ ശ്രമിച്ചത്. ഗള്‍ഫ് യാത്ര പൂര്‍ത്തിയാകാത്ത ശാശ്വതീകാനന്ദ തിരികെ വന്നതില്‍ എസ്എന്‍ഡിപിയുടെ വിശദീകരണം രണ്ടു തരത്തിലായിരുന്നുവെന്നും വിശദീകരണത്തില്‍ ദുരൂഹതയുണ്ടെന്നും വിജയന്‍ വെളിപ്പെടുത്തി. ഗള്‍ഫില്‍ വച്ച് അഭിപ്രായവ്യത്യാസങ്ങളെ തുടര്‍ന്ന് വെള്ളാപ്പള്ളിയും ശാശ്വതീകാനന്ദയും തമ്മില്‍ തര്‍ക്കത്തിലേര്‍പ്പെട്ടിരുന്നു. എസ്എന്‍ ട്രസ്റ്റിന്റെ കോളേജിലെ നിയമനങ്ങളുമായി ബന്ധപ്പെട്ടും തര്‍ക്കങ്ങള്‍ ഉടലെടുത്തിരുന്നു. ശാശ്വതീകാനന്ദ അടുത്ത അനുയായികളായ ചിലരാണ് ഇക്കാര്യങ്ങള്‍ തന്നോട് പറഞ്ഞതെന്നും വിജയന്‍ പറഞ്ഞു.
ശാശ്വതീകാനന്ദയുടെ മരണത്തിന് തലേന്ന് ദുബായില്‍ വച്ച് തുഷാര്‍ വെള്ളാപ്പള്ളി ശാശ്വതീകാനന്ദയെ മര്‍ദ്ദിച്ചെന്ന് ശിവാനന്ദഗിരി പറഞ്ഞിരുന്നു. ശാശ്വതീകാനന്ദയുടെ വിശ്വസ്തനായ ജോയ്‌സനാണ് ശിവാനന്ദഗിരിയോട് ഇക്കാര്യം പറഞ്ഞത്. സംഭവത്തെ തുടര്‍ന്ന് ദുബായില്‍ നിന്ന് ഡല്‍ഹി വഴി തിരുവനന്തപുരത്തേക്ക് ശാശ്വതീകാനന്ദ ഒറ്റയ്ക്ക് മടങ്ങി. അതിന്റെ പിറ്റേദിവസമാണ് ആലുവ അദ്വൈതാശ്രമത്തില്‍ വച്ച് ശാശ്വതീകാനന്ദ കൊല്ലപ്പെടുന്നത്. ഈ വിശദീകരണത്തില്‍ ദുരൂഹതയുണ്ടെന്നാണ് വിജയന്‍ പറയുന്നത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha