കടബാധ്യത തീര്‍ക്കാന്‍ വീട് വില്‍ക്കാനൊരുങ്ങവേ ഭാഗ്യം തേടിയെത്തി.... അധ്വാനത്തിലൂടെ സ്വരൂക്കൂട്ടിയ ഏക സമ്പാദ്യമായ വീട് വിറ്റ് വാടകവീട്ടിലേക്ക് മാറാനിരിക്കവേയെത്തിയ ഭാഗ്യത്തെയോര്‍ത്ത് സന്തോഷമടക്കാനാവാതെ മുഹമ്മദും കുടുംബവും.

അമ്പത് ലക്ഷത്തോളം വരുന്ന കടബാധ്യത തീര്‍ക്കാനായി സ്വന്തം വീട് വില്‍ക്കാന്‍ തീരുമാനിച്ചയാള്‍ക്കാണ് സംസ്ഥാന ഭാഗ്യക്കുറിയുടെ ഒരുകോടി ലഭ്യമായത്. മഞ്ചേശ്വരത്തെ പെയിന്റിങ് തൊഴിലാളി പാവൂരിലെ മുഹമ്മദ് എന്ന ബാവയെ(50)യാണ് ഭാഗ്യദേവത അനുഗ്രഹിച്ചത്. സ്ഥിരമായി ലോട്ടറിയെടുക്കുന്ന ഹൊസങ്കടിയിലെ അമ്മ ലോട്ടറി ഏജന്‍സിയില്‍നിന്നാണ് ടിക്കറ്റെടുത്തത്.

ഞായറാഴ്ച നറുക്കെടുത്ത 50-50 ടിക്കറ്റിലാണ് ഒരുകോടിയടിച്ചത്. കടബാധ്യത തീര്‍ക്കാനായി സ്വന്തം വീട് വില്‍ക്കാന്‍ തീരുമാനിച്ച് അതിനുള്ള ടോക്കണ്‍ അഡ്വാന്‍സ് ഇന്നലെ വൈകുന്നേരം വാങ്ങാനിരിക്കെയാണ് ഭാഗ്യമെത്തിയത്.

ഈയൊരു ലോട്ടറി അടിച്ചില്ലായിരുന്നെങ്കില്‍ ഇതുവരെയുള്ള അധ്വാനത്തിലൂടെ സ്വരൂക്കൂട്ടിയ ഏക സമ്പാദ്യമായ വീട് വിറ്റ് താനും കുടുംബവും വാടകവീട്ടിലേക്ക് മാറിയേനെയെന്ന് മുഹമ്മദ് പറയുന്നു. മുഹമ്മദിന് അഞ്ച് മക്കളാണ് . നാല് പെണ്‍മക്കളും ഒരാണും. ഇതില്‍ രണ്ട് പെണ്‍മക്കളെ കല്യാണം കഴിച്ചു വിട്ടു. പെണ്‍മക്കളുടെ കല്യാണവും വീട് നിര്‍മാണവും കഴിഞ്ഞപ്പോഴാണ് മുഹമ്മദ് അമ്പത് ലക്ഷത്തിന്റെ കടക്കാരനായി മാറിയത്.

ഇതിനിടെ മകന്‍ നിസാമുദ്ദീനെ ഖത്തറിലേക്ക് അയക്കുന്നതിനും ഇദ്ദേഹം പലിശക്ക് കടം വാങ്ങിയിരുന്നു. ഈ ബാധ്യതകളെല്ലാം തീര്‍ക്കാനായി പലരുടെയും സഹായം അഭ്യര്‍ഥിച്ചിരുന്നെങ്കിലും കൂട്ടുകാരായ രണ്ടുപേരൊഴിച്ച് എല്ലാവരും കൈവിട്ടു. അങ്ങനെയാണ് വീട് വില്‍ക്കാന്‍ തീരുമാനിക്കുന്നത്. എന്നാല്‍ മുഹമ്മദിന് അത് വേണ്ടിവന്നില്ല.