കൊറോണയ്ക്ക് ശേഷം നേരെ ചൊവ്വേ ഒരു ഓണം വന്നത്തെയിരിക്കുകയാണ്. കടക്കാരും കച്ചവടക്കാരും വലിയ സന്തോഷത്തിലാണ്. വമ്പന്‍ പരസ്യങ്ങളാണ് പത്രങ്ങളും ടിവിയും നിറയെ. എന്നാല്‍ ആശങ്കയായി മഴ മാറുകയാണ്. ഓണക്കാലത്ത് മഴ തുടര്‍ന്നാല്‍ എല്ലാം കുളമാകും.

അതേസമയം കേരളത്തില്‍ മഴയുടെ സ്വഭാവത്തില്‍ അസാധാരണ മാറ്റമെന്നാണ് ശാസ്ത്രജ്ഞന്‍മാര്‍ പറയുന്നത്. രാവിലെ യെലോ, ഉച്ചയ്ക്ക് ഓറഞ്ച്, വൈകിട്ട് റെഡ് അലര്‍ട്ട് എന്ന രീതിയിലാണ് ഇപ്പോള്‍ മണ്‍സൂണിന്റെ ഘടനയില്‍ മാറ്റം വരുന്നത്. കേന്ദ്ര കാലാവസ്ഥ വകുപ്പു നല്‍കുന്ന മുന്നറിയിപ്പുകള്‍ മിക്ക ദിവസങ്ങളിലും മാറുന്നു.

കുറഞ്ഞ നേരത്തിനുള്ളില്‍ അതിശക്ത മഴ പെയ്യുന്നതാണ് കേരളത്തില്‍ കഴിഞ്ഞ ദിവസങ്ങളില്‍ കണ്ടത്. ഇതാണ് മിന്നല്‍ പ്രളയത്തിന് ഇടയാക്കുന്നത്. ആലപ്പുഴയിലെ മങ്കൊമ്പില്‍ 20 സെന്റീമീറ്ററും കുമരകത്ത് 15, എറണാകുളം ജില്ലയിലെ നേര്യമംഗലത്ത് 9, കായംകുളത്ത് 7 സെന്റിമീറ്റര്‍ മഴയുമാണു കഴിഞ്ഞ ദിവസം 24 മണിക്കൂറില്‍ പെയ്തതെന്നാണു കേന്ദ്ര കാലാവസ്ഥ വകുപ്പിന്റെ റിപ്പോര്‍ട്ട്. എറണാകുളം നഗരത്തിലും പ്രാന്തപ്രദേശങ്ങളിലും ഒന്നര മണിക്കൂറില്‍ 5 സെന്റീമീറ്റര്‍ മഴ പെയ്തു. ഇതോടെ നഗരം വെള്ളത്തില്‍ മുങ്ങി.

ആഗോള താപനമാണു കാലാവസ്ഥ മാറുന്നതിനു പ്രധാന കാരണമെന്നു കേന്ദ്ര കാലാവസ്ഥ വകുപ്പ് പറഞ്ഞു. മറ്റു സംസ്ഥാനങ്ങളിലും കാലാവസ്ഥ വ്യതിയാനത്തിന്റെ ആഘാതങ്ങള്‍ ഉണ്ടാകുന്നുണ്ട്. മണ്‍സൂണ്‍ മഴ കുറ!യേണ്ട മാസങ്ങളില്‍ മഴ കൂടുകയും ചെയ്തു. മണ്‍സൂണ്‍ ഇതര സാ!ഹര്യങ്ങളിലും ന്യൂനമര്‍ദവും കടലിന്റെ അതിതാപനവും കാരണം കൂമ്പാരമേഘങ്ങള്‍ രൂപപ്പെടുന്നു.

സമീപകാലത്ത് വെള്ളപ്പൊക്കം ഉണ്ടായ സാഹചര്യത്തിന് ഇടയാക്കിയത് ഇതാണ്. എന്നാല്‍, മണ്‍സൂണ്‍ കാലത്ത് മഴയും വെയിലും ഇടവിട്ടു വരുന്ന പ്രതിഭാസമാണ് ഇപ്പോഴത്തെ കൂമ്പാര മേഘങ്ങളുടെ രൂപവല്‍ക്കരണത്തിനു കാരണം. മണ്‍സൂണ്‍ കാറ്റിന്റെ വ്യതിയാനവും ശക്തിയില്‍ ഉണ്ടാകുന്ന വ്യത്യാസവു!മാണ് ഇടയ്ക്ക് മഴ കുറയാന്‍ ഇടയാക്കുന്നത്. മണ്‍സൂണില്‍ ഇടയ്ക്ക് തെളിച്ചവും വൈകിട്ട് ഇടിയും ശക്തമായ മഴയും എന്ന പ്രവണതയാണ് കേരളത്തിലേത്.

വളരെ പെട്ടെന്ന് കൂമ്പാര!#ോമേഘങ്ങള്‍ രൂപപ്പെടുന്നതാണ് മിന്നല്‍പ്രളയത്തിലേക്ക് നയിക്കുന്ന മഴയ്ക്ക് കാരണം. ഇത്തരം കൂമ്പാരമേഘങ്ങളുടെ രൂപീകരണം മുന്‍കൂട്ടി പ്രവചിക്കുക എളുപ്പമല്ല.

അതേസമയം സംസ്ഥാനത്ത് ഇന്നും ശക്തമായ മഴയ്ക്ക് സാധ്യത. എല്ലാ ജില്ലകളിലും യെല്ലോ അലര്‍ട്ടാണെങ്കിലും ഒറ്റപ്പെട്ട അതിശക്തമായ മഴയെ കരുതിരിക്കണം എന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. ഉച്ചയ്ക്ക് ശേഷം മഴ ശക്തമാകാനും പുലര്‍ച്ചെ വരെ മഴ തുടരാനും സാധ്യത ഉണ്ട്. അതിനാല്‍ മലയോരമേഖലകളില്‍ അടക്കം കനത്ത ജാഗ്രത വേണം എന്നാണ് നിര്‍ദ്ദേശം.

തിരുവനന്തപുരം മുതല്‍ എറണാകുളം വരെയുള്ള കിഴക്കന്‍ മേഖലകളിലാണ് കൂടുതല്‍ മഴ സാധ്യത. തെക്കേ ഇന്ത്യക്ക് മുകളിലായി നിലനില്‍ക്കുന്ന അന്തരീക്ഷ ചുഴിയും അതിന് കാരണമായ താഴ്ന്ന മര്‍ദ്ദനിലയുമാണ് ഒറ്റപ്പെട്ട കനത്ത മഴ ലഭിക്കുന്നതിന് കാരണം. ഇത് വടക്കോട്ട് നീങ്ങുന്നതിന് അനുസരിച്ച് വടക്കന്‍ കേരളത്തില്‍ മഴ ശക്തമായേക്കും. കടല്‍ പ്രക്ഷുബ്ധമാകാനുള്ള സാധ്യത കണക്കിലെടുത്ത് മത്സ്യത്തൊഴിലാളികള്‍ കടലില്‍ പോകരുത്.

ശക്തമായ മഴ തുടരുന്ന സാഹചര്യത്തില്‍ എറണാകുളം, കോട്ടയം ജില്ലകളിലെ മുഴുവന്‍ വിദ്യാഭ്യാസ സ്ഥാപനങ്ങള്‍ക്കും ഇന്ന് (31/08/2022) കളക്ടര്‍മാര്‍ അവധി പ്രഖ്യാപിച്ചു. പ്രൊഫഷണല്‍ കോളേജുകള്‍ക്കും കേന്ദ്രീയ വിദ്യാലയങ്ങള്‍ക്കും അങ്കണവാടികള്‍ക്കും അവധി ബാധകമാണ്. ഇതോടൊപ്പം ആലപ്പുഴയിലെ കുട്ടനാട് താലൂക്കിലെ വിദ്യാഭ്യാസ സ്ഥാപനങ്ങള്‍ക്കും അവധിയായിരിക്കും. നേരത്തെ നിശ്ചയിച്ച സര്‍വ്വകലാശാലാ പരീക്ഷകള്‍ക്ക് അവധി ബാധകമല്ല.