കാല്‍ നൂറ്റാണ്ടായി എല്‍ഡിഎഫ് ഭരിക്കുന്ന തലസ്ഥാന നഗരസഭ ഇത്തവണയും എല്‍ഡിഎഫ് ഭരിക്കുമെന്ന് റിപ്പോര്‍ട്ട്. നേരത്തെ ആറ് സീറ്റുണ്ടായിരുന്ന ബിജെപി ഇത്തവണ 12 സീറ്റ് നേടുമെന്നും റിപ്പോര്‍ട്ടുണ്ട്. കോണ്‍ഗ്രസ് നേതൃത്വം നല്‍കുന്ന യുഡിഎഫ് കൂടുതല്‍ പരിതാപകരമായ നിലയിലേക്ക് കൂപ്പുകുത്തുമെന്നാണ് റിപ്പോര്‍ട്ട്. സംസ്ഥാന ഇന്റലിജന്‍സ് സര്‍ക്കാരിന് നല്‍കിയ റിപ്പോര്‍ട്ടിലാണ് ഇക്കാര്യമുള്ളത്. ബിജെപിയാണ് തലസ്ഥാനത്ത് ശ്രദ്ധേയമായ പ്രകടനം കാഴ്ച വെയ്ക്കുന്നതെന്നും റിപ്പോര്‍ട്ടിലുണ്ട്.
തലസ്ഥാന കോര്‍പ്പറേഷന് മുന്നണികള്‍ അതീവ പ്രാധാന്യം കല്പിക്കുന്നതിനാല്‍ ഇക്കുറി വീറും വാശിയും ഏറെയായിരുന്നു. ജില്ലാപഞ്ചായത്ത് ഡിവിഷനുകളില്‍ എല്‍ഡിഎഫ് 26 സീറ്റുകള്‍ നേടുമെന്നാണ് ഇന്റലിജന്‍സ് റിപ്പോര്‍ട്ട്.വോട്ടെണ്ണല്‍ നാളെ നടക്കാനിരിക്കെ അവകാശവാദങ്ങളുമായി മുന്നണികള്‍ രംഗത്തുണ്ട്.
മുന്നണികള്‍ കൂട്ടലും കിഴിക്കലുമായി തിരക്കിലാണ്. കോര്‍പ്പറേഷനില്‍ ഭരണത്തുടര്‍ച്ച ഉറപ്പാക്കാനാകുമെന്ന വിലയിരുത്തലിലാണ് എല്‍.ഡി. എഫ്. ഭരണം പിടിച്ചെടുക്കുമെന്ന ആത്മവിശ്വാസമാണ് യു.ഡി.എഫിനുള്ളത്. നിലവിലുള്ള മുന്നണികളെ അട്ടിമറിച്ചുകൊണ്ട് കോര്‍പ്പറേഷനിലെ ഭരണം പിടിച്ചെടുക്കുകയോ നിര്‍ണായക ശക്തിയാകുകയോ ആണ് ബി.ജെ.പി.യുടെ ലക്ഷ്യം.
സി.പി.എമ്മും ബി.ജെ.പി.യും കൃത്യമായ കണക്കുകൂട്ടലുകളാണ് മുന്നോട്ടുവയ്ക്കുന്നത്. മനസ്സ് തുറക്കുന്നില്ലെങ്കിലും എതിര്‍മുന്നണികളുടെ ശക്തികേന്ദ്രങ്ങളില്‍ പോലും വിജയിച്ചുകയറുമെന്നാണ് യു.ഡി.എഫ്. പറയുന്നത്.
ചാല ഏര്യാകമ്മിറ്റിക്ക് കീഴില്‍ 26 വാര്‍ഡുകളുള്ളതില്‍ 15 എണ്ണത്തിലാണ് സി.പി.എം. വിജയം ഉറപ്പാക്കുന്നത്. പാളയം ഏര്യാകമ്മിറ്റിക്ക് കീഴില്‍ 16 വാര്‍ഡുകളുള്ളതില്‍ പത്തെണ്ണത്തിലാണ് വിജയം ഉറപ്പിക്കുന്നത്. വഞ്ചിയൂര്‍ ഏര്യാകമ്മിറ്റിക്ക് കീഴിലുള്ള 17 വാര്‍ഡുകളുള്ളതില്‍ പത്ത് വാര്‍ഡിലാണ് വിജയം ഉറപ്പാക്കുന്നത്. പേരൂര്‍ക്കട ഏര്യാകമ്മിറ്റിക്ക് കീഴില്‍ 13 വാര്‍ഡുകളുള്ളതില്‍ എട്ടെണ്ണം അനായാസം ജയിക്കുമെന്ന് സി.പി.എം. കരുതുന്നു. കോവളം ഏര്യാകമ്മിറ്റിക്ക് കീഴില്‍ ഒമ്പത് വാര്‍ഡുകളുള്ളതില്‍ അഞ്ചെണ്ണത്തിലാണ് സി.പി.എം. വിജയം കണക്കുകൂട്ടുന്നത്.
ബി.ജെ.പി.യും ഉറച്ച വിശ്വാസത്തിലാണ്. നാല് നിയമസഭാ മണ്ഡലങ്ങളാക്കിയാണ് കോര്‍പ്പറേഷന്‍ വാര്‍ഡുകളെ ബി.ജെ.പി. വിഭജിച്ച് കണക്കുകൂട്ടുന്നത്. ഓരോ നിയമസഭാ മണ്ഡലത്തില്‍ നിന്നും കുറഞ്ഞത് അഞ്ചുപേരെങ്കിലും ജയിച്ചുകയറുമെന്നാണ് പാര്‍ട്ടിയുടെ താഴെത്തട്ടിലുള്ള പ്രവര്‍ത്തകര്‍ നേതൃത്വത്തിന് കൈമാറുന്ന വിവരം. അതായത് 20 ല്‍ കൂടുതല്‍ അംഗങ്ങള്‍ ഉറപ്പായും ലഭിക്കുമെന്ന് ഇവര്‍ കണക്കുകൂട്ടുന്നു. ഇത് ഏറ്റവും ചെറിയ കണക്കാണെന്നും ഭരണം നേടുകയാണ് ലക്ഷ്യമെന്നും നേതാക്കള്‍ പറയുന്നു. കോര്‍പ്പറേഷന്റെ ഭരണം അല്ലെങ്കില്‍ നിര്‍ണായക ശക്തിയാകുക എന്നതാണ് ബി.ജെ.പി.യുടെ ലക്ഷ്യം.

സ്ഥാനാര്‍ത്ഥി നിര്‍ണയം വൈകിയെങ്കിലും കോര്‍പ്പറേഷനില്‍ കഴിഞ്ഞ തവണത്തെക്കാള്‍ നില മെച്ചപ്പെടുത്തി ഭരണമുന്നണിയാകുമെന്നാണ് യു.ഡി.എഫിന്റെ പ്രതീക്ഷ. അടിയൊഴുക്കുകളും റിബല്‍ ശല്യവുമാണ് നേതാക്കള്‍ പങ്കിടുന്ന ആശങ്ക. എങ്കിലും ഭരണം പിടിക്കുമെന്നതില്‍ സംശയമില്ലെന്നാണ് നേതൃത്വം അവകാശപ്പെടുന്നത്. 55 സീറ്റുകളാണ് യു.ഡി.എഫ്. നേതൃത്വത്തിന്റെ കണക്കുകൂട്ടല്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha