പ്രണയവൈരാഗ്യത്തിന്റെ' പേരിൽ വിഷ്ണുപ്രിയ എന്ന പെൺകുട്ടിയെ കഴിഞ്ഞ ദിവസമാണ് കൊലപ്പെടുത്തിയത്. എന്നാൽ അക്കാര്യത്തിൽ നേരിയ മനസാക്ഷികുത്ത് പോലും ഇല്ലാത്ത രോഗഗ്രസ്തമായ സമൂഹമായി കേരളം മാറിക്കൊണ്ടിരിക്കുന്നു എന്ന് മനസിലായത് തിരുവനന്തപുരം മേയറുടെ ഈ വിഷയത്തിലുള്ള പോസ്റ്റിനെക്കുറിച്ചുള്ള വാർത്തക്ക് താഴെ കണ്ട ഞെട്ടിപ്പിക്കുന്ന കമന്റുകൾ വായിച്ചപ്പോൾ ആണ് എന്ന് കുറിക്കുകയാണ് എഴുത്തുകാരിയായ സുധ മേനോൻ.

ഫേസ്ബുക്ക് കുറിപ്പ് ഇങ്ങനെ;

'പ്രണയവൈരാഗ്യത്തിന്റെ' പേരിൽ വിഷ്ണുപ്രിയ എന്ന പെൺകുട്ടിയെ ഒരു ക്രിമിനൽ ക്രൂരമായി കൊന്നത് ഇന്നലെയാണ്. ഇരുപത്തിനാലു മണിക്കൂർ പോലും കഴിഞ്ഞില്ല എന്നോർക്കണം. പക്ഷെ, അക്കാര്യത്തിൽ നേരിയ മനസാക്ഷികുത്ത് പോലും ഇല്ലാത്ത രോഗഗ്രസ്തമായ സമൂഹമായി കേരളം മാറിക്കൊണ്ടിരിക്കുന്നു എന്ന് മനസിലായത് തിരുവനന്തപുരം മേയറുടെ ഈ വിഷയത്തിലുള്ള പോസ്റ്റിനെക്കുറിച്ചുള്ള വാർത്തക്ക് താഴെ കണ്ട ഞെട്ടിപ്പിക്കുന്ന കമന്റുകൾ വായിച്ചപ്പോൾ ആണ്. ഒരിക്കൽ പ്രണയിച്ച പുരുഷനിൽ നിന്നും അകന്ന് വേറൊരാളെ വിവാഹം കഴിച്ച ഒരു സ്ത്രീയെ, ഒരു പൊതുപ്രവർത്തകയെ ആക്ഷേപിക്കുന്നതിൽ ഇന്നാട്ടിലെ ആണുങ്ങളും പെണ്ണുങ്ങളും മത്സരിക്കുകയാണ്. ചില അശ്ളീല/ അധിക്ഷേപ കമന്റുകൾക്ക് പോലും ആയിരം ലൈക്ക്‌!

പരിഷ്കൃത സമൂഹത്തിൽ 'നോ' യുടെ മൂല്യവും അത് പറയാനുള്ള വ്യക്തിയുടെ സ്വാതന്ത്ര്യവും മനസിലാകാത്ത ഈ ഉത്സാഹക്കമ്മിറ്റിക്കാർ ആണ് ശ്യാംജിത്തുമാരെ ഉണ്ടാക്കുന്നത്. ഇത്തരം കമന്റുകൾ ഇടുന്ന സകലമനുഷ്യരും ഓർക്കേണ്ടത് നിങ്ങൾ എരിതീയിൽ എണ്ണ ഒഴിക്കുക ആണെന്ന യാഥാർഥ്യമാണ്.

വേറൊരാൾ താൻ മുമ്പ് പ്രണയിച്ചിരുന്ന സ്ത്രീയെകുറിച്ചു 'വാസവദത്തയുടെ ചാരിത്രപ്രസംഗം' എന്ന് പോസ്റ്റിട്ടപ്പോൾ അതിന്റെ താഴെപ്പോയി അയാളെ സ്നേഹിച്ചുകൊല്ലുന്ന, അയാളെ 'പുലികുട്ടി' ആക്കുന്ന മറ്റൊരുകൂട്ടം! അശ്ളീലകമന്റുകളിലൂടെ അലറിവിളിക്കുന്ന ആണത്തഉന്മാദികൾ.. അയാൾ ചെയുന്നത് തെറ്റാണെന്നു പറയുന്നതിന് പകരം 'നീ അവളെ എറിയെടാ, ദാ എന്റെ വക ഒരു കല്ല്‌' എന്ന മട്ടിലാണ് ഉത്സവകമ്മിറ്റിക്കാർ ഒരേസ്വരത്തിൽ അണിനിരക്കുന്നത്...എന്തായാലും ആ പെൺകുട്ടി ജീവിതത്തിൽ എടുത്ത ഏറ്റവും പക്വമായ തീരുമാനം ഈ വ്യക്തിയെ ഉപേക്ഷിച്ചതാണ് എന്ന് ഉറപ്പായി.

'തേപ്പ്' ആണത്തത്തോടുള്ള വെല്ലുവിളി ആണെന്ന് കരുതി പെൺകുട്ടികളെ ആക്രമിക്കാൻ അവസരം കാത്തിരിക്കുന്ന പ്രതികാരദാഹികളായ നിരവധി നിശ്ശബ്ദ കൊലയാളികൾ നമുക്കിടയിൽ ഉണ്ടാകും. അത്തരക്കാർക്കു എറിഞ്ഞുകൊടുക്കുന്ന 'മൂർച്ചയുള്ള കത്തികൾ' ആണ്, സാമൂഹ്യദ്രോഹികളെ, നിങ്ങളുടെ ഈ ആർപ്പ് വിളി കമന്റുകൾ... ഷമ്മിമാർ ഹീറോ ആയി വാഴ്ത്തപ്പെടുന്ന ഈ കാലവും മനുഷ്യരും സത്യത്തിൽ പേടിപ്പിക്കുന്നു.