കൂടുതൽ ഡെക്കറേഷനൊന്നും വേണ്ട, ന്യായീകരണവും. ഒരു കുറ്റകൃത്യമാണത്. പ്രണയം അവസാനിപ്പിച്ചതു കൊണ്ടാണെന്നൊക്കെ ന്യായീകരണം പെറുക്കിക്കൊണ്ട് വരുന്നവരെ ഒന്ന് സൂക്ഷിക്കുന്നതു നല്ലതാണ്. ഇനി പഠിപ്പു വേണ്ടത്‌ ആൺകുട്ടികൾക്കാണ് എന്ന നിർദേശവുമായി നെൽസൺ ജോസഫ്. അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ;

കൂടുതൽ ഡെക്കറേഷനൊന്നും വേണ്ട, ന്യായീകരണവും. ഒരു കുറ്റകൃത്യമാണത്. പ്രണയം അവസാനിപ്പിച്ചതുകൊണ്ടാണെന്നൊക്കെ ന്യായീകരണം പെറുക്കിക്കൊണ്ട് വരുന്നവരെ ഒന്ന് സൂക്ഷിക്കുന്നതു നല്ലതാണ്. ഒരു പെൺകുട്ടിയെ നിരന്തരം ശല്യപ്പെടുത്തി " stalking " നടത്തുന്നവൻ്റെയും ന്യായീകരണം " ഞാൻ രണ്ട് വർഷമായി അവളുമായി പ്രണയത്തിലായിരുന്നു " എന്നാണ്.

അവിടെ സ്വന്തം ഇഷ്ടം, അഭിപ്രായം പറഞ്ഞുവെന്നുള്ളതു കൊണ്ട് ആക്രമിക്കപ്പെടുന്നവരുടെ മുന്നിൽ ഈ ന്യായീകരണവുമായി ചെല്ലുന്നത് എത്ര നാണംകെട്ട ഏർപ്പാടാണ്? ഒരു സമയം വരെ മനസിൽ വച്ചാരാധിക്കുകയും ആഗ്രഹിക്കുകയും ചെയ്തിട്ട് അവൾ അവളുടേതായ ഒരു തീരുമാനമെടുക്കുമ്പൊ അന്നുവരെ പറഞ്ഞതെല്ലാം കുപ്പത്തൊട്ടിയിലിട്ടിട്ട് അവള് പിഴയാടാ എന്ന് പറഞ്ഞ് സ്വഭാവഹത്യ നടത്തുന്നതോ ശാരീരികമായി ആക്രമിച്ച് പ്രതികാരം തീർക്കുന്നതോ ഒന്നും പ്രണയത്തിൻ്റെ വകുപ്പിൽ പെടുത്താവുന്നതല്ല.

ഇഷ്ടങ്ങൾ മാറാനിടയുള്ളവയാണ്. ചിലപ്പൊ കുറച്ചു കാലം കഴിയുമ്പൊ, അല്ലെങ്കിൽ കുറച്ചുകൂടി അടുത്തറിയുമ്പൊ. എന്തിന്, പ്രത്യേകിച്ച് ഒരു കാര്യവും ഇല്ലാതെ തന്നെ ഇഷ്ടത്തിൻ്റെ തീവ്രത കുറഞ്ഞെന്നും വരാം. പ്രണയത്തിൽ നിന്നും വിവാഹജീവിതത്തിൽ നിന്നുമൊക്കെ ഇറങ്ങിപ്പോരാൻ, മാന്യമായി വേർപിരിയാൻ പറ്റില്ലെങ്കിൽ, ഒരു " നോ " കേട്ടാൽ അതിനെ സ്വീകരിക്കാൻ മനസില്ലെങ്കിൽ ആ പണിക്കിറങ്ങരുത്.

അപ്പൊ ചിലര് ചോദിക്കും. " പിന്നെ എന്തിനാണ് ഇത്രയും കാലം പ്രേമിച്ചത്? " എന്ന്. അത് തന്നെയാണ് മുകളിൽ പറഞ്ഞുവച്ചിരിക്കുന്നത്. അന്ന് അങ്ങനെ തോന്നി. ഇന്ന് അത് മാറി..അതിന് കാരണങ്ങളുണ്ടാവാം..അവരുടേതായ കാരണങ്ങൾ.. മാന്യമായി വേർപിരിയാൻ കഴിയണം അപ്പോൾ.. ഒന്ന് ആലോചിച്ച് നോക്കിയാൽ അങ്ങനെ പോരാൻ കഴിയുന്നവർക്കാണ് കൂടുതൽ പ്രണയമുണ്ടായിരുന്നതെന്ന് ഞാൻ പറയും.

പ്രണയമായാലും ശരി, വിവാഹമായാലും ശരി അതൊന്നും ലോകാവസാനം വരെ തുടരുമെന്ന്, അല്ലെങ്കിൽ തുടരണമെന്ന് നിർബന്ധമുള്ള ഒന്നല്ല. അവസാനിക്കാം. അവസാനിച്ചുവെന്ന് തോന്നിയാൽ അത് തുറന്ന് പറയാൻ, തുടരാൻ താല്പര്യമില്ലെന്ന് പറയാൻ കഴിയുന്ന ഒരു സാഹചര്യം ഉണ്ടാവണം. " നോ " എന്ന് ഭയമില്ലാതെ പറയാൻ കഴിയുന്ന ഒരു സാഹചര്യം. ഇനി പഠിപ്പിക്കേണ്ടത്‌ ആൺകുട്ടികളെയാണ്.

" നോ " എന്ന വാക്ക്‌ ഡിക്ഷണറിയിലുണ്ടെന്ന് പഠിപ്പിക്കണം. അത്‌ ജീവിതകാലത്ത്‌ പലയിടത്തുനിന്ന് പലരിൽ നിന്ന് കേൾക്കേണ്ടിവരുമെന്നും പിന്നാലെ നടക്കുന്നതും ശല്യപ്പെടുത്തുന്നതും പ്രണയമല്ല, അതിനെ വിളിക്കുന്നത്‌ സ്റ്റോക്കിംഗ്‌ എന്നാണെന്ന് പഠിപ്പിക്കണം. അപ്പോൾ തിരിച്ച്‌ തോന്നുന്ന വികാരം ഭയമാണെന്നും.

സ്നേഹത്തിന്റെ സ്ഥായീഭാവം ദേഷ്യമല്ലെന്നും കലിപ്പനും കാന്താരിയും വിവരമില്ലാത്ത ഏതോ തലയിൽ വിരിഞ്ഞ ആശയമാണെന്നും പറയണം.അപ്പുറത്തുള്ളത്‌ ഒരു വ്യക്തിയാണെന്ന് പഠിപ്പിക്കണം. ആഗ്രഹങ്ങളും തീരുമാനങ്ങളും ഇഷ്ടവുമുള്ള ഒരു വ്യക്തി. ഇനി പഠിപ്പു വേണ്ടത്‌ ആൺകുട്ടികൾക്കാണ്.