വാശിയുടെയും നിലനില്‍പ്പിന്റെയും, തിരിച്ചടിയുടെയും, പിടിച്ചുകയറ്റത്തിന്റെയും തെരഞ്ഞെടുപ്പു വിധി. വീഴ്ചയും അതിനിര്‍ണ്ണായകമാണ് എന്നതാണ് ഇത്തവണത്തെ പ്രതേ്യകത. തോറ്റാല്‍ സര്‍വ്വ പാപങ്ങളും ഏറ്റ് വിടപറയേണ്ടി വരുമെന്നതാണ് കെ.എം. മാണി നേരിട്ടതെങ്കില്‍ തോറ്റാല്‍ രാഷ്ട്രീയ ഭാവി ഇരുളടയുമെന്നതാണ് പി.സി. ജോര്‍ജ് നേരിട്ട പ്രതിസന്ധി.
അതിനേക്കാള്‍ നിര്‍ണ്ണായകം പിണറായിവിജയന്‍ അകപ്പെട്ട പ്രതിസന്ധിയാണ്. ഈ തെരഞ്ഞെടുപ്പില്‍ തോറ്റാല്‍ അടുത്ത നിയമസഭാ തെരഞ്ഞെടുപ്പില്‍ തിരിഞ്ഞു നോക്കേണ്ട എന്ന സന്ദേശമാണ് ലഭിക്കുക. തുടര്‍ച്ചയായ ഉപതെരഞ്ഞെടുപ്പ് ഫലങ്ങളുടെ തിരിച്ചടിയുടെ കൂടെ തദ്ദേശ സ്വയംഭരണ തെരഞ്ഞെടുപ്പില്‍ കൂടി തോറ്റാല്‍ ഇടതുമുന്നണിക്ക് ഇനി അധികാരത്തില്‍ വരാനുള്ള മോഹം ഉപേക്ഷിച്ചാല്‍ മതിയാവും. ഇതോടെ മുഖ്യമന്ത്രി പദമെന്ന പിണറായിയുടെ മോഹങ്ങള്‍ക്ക് തിരിച്ചടിയാകും. പാര്‍ട്ടിയിലും ഒറ്റപ്പെടും. അതിലെല്ലാം ഉപരി വെള്ളാപ്പള്ളി നടേശന്‍ കരുത്തനുമാകും. പിണറായിയുടെ നയങ്ങളാണ് സി.പി.എമ്മിനെ ജനങ്ങളുമായി അകറ്റിയെന്ന വാദവുമായാണ് വെള്ളാപ്പള്ളി, ബി.ജെ.പി. യുമായി അടുത്തത്. അതുകൊണ്ട് തന്നെ പഞ്ചായത്ത് തെരഞ്ഞെടുപ്പിലെ പിണറായിയുടെ തളര്‍ച്ച വെള്ളാപ്പള്ളിക്ക് നേട്ടമാകും.
എന്നാല്‍ ബി.ജെ.പി.യുടെ നേട്ടം കോണ്‍ഗ്രസിനാണ് ക്ഷീണമുണ്ടാക്കിയതെങ്കിലും വെള്ളാപ്പള്ളി ജയിച്ചു. ഇനി പിണറായി-വെള്ളാപ്പള്ളി വാക്‌പോരുകള്‍ തുടരും. പാര്‍ട്ടിെയന്ന നിലയില്‍ സി.പി.എമ്മിനും അതിനിര്‍ണ്ണായകമാണ്. രാഷ്ട്രീയ മുന്നേറ്റം സി.പി.എമ്മിന് അവകാശപ്പെടാം.
കഴിഞ്ഞ കുറച്ച് തെരഞ്ഞെടുപ്പുകളില്‍ തുടര്‍ച്ചയായി ഇടതുമുന്നണിക്ക് വിജയിക്കാനായിട്ടില്ല. തദ്ദേശ തിരഞ്ഞെടുപ്പിലും ഇത് ആവര്‍ത്തിച്ചാല്‍ പൊട്ടിത്തെറികള്‍ മുന്നണിയിലുണ്ടായേനെ. സി.പി.എമ്മിനകത്തും ചില പ്രശ്‌നങ്ങള്‍ ഉയര്‍ന്നുവന്നേക്കാമായിരുന്നു. പാര്‍ട്ടി നേതൃത്വവുമായി പലപ്പോഴും ഇടഞ്ഞിട്ടുള്ള പ്രതിപക്ഷ നേതാവ് വി.എസ്. അച്യുതാനന്ദനുമായുള്ള അഭിപ്രായ വ്യത്യാസങ്ങളൊക്കെ മാറ്റിവച്ചാണ് ഇക്കുറി സി.പി.ഐ(എം) തിരഞ്ഞെടുപ്പിനെ നേരിട്ടത്. മുന്നണിക്ക് പരാജയം സംഭവിച്ചാല്‍ വി.എസി.നോടുള്ള സംസ്ഥാന നേതൃത്വത്തിന്റെ തുടര്‍ നിലപാടും വി.എസിന്റെ നിലപാടും മാറിയേനെ.
അടുത്ത നിയമസഭാ തിരഞ്ഞെടുപ്പിലും വി.എസ്. ഇടതുമുന്നണിയെ നയിക്കുമെന്ന മട്ടിലുള്ള സി.പി.ഐ. നേതാവ് സി. ദിവാകരന്റെ പ്രസ്താവന തിരഞ്ഞെടുപ്പ് പ്രചാരണത്തിനിടയ്ക്ക് വലിയ ചര്‍ച്ചയ്ക്ക് വഴിവച്ചിരുന്നു. എന്നാല്‍ ജോര്‍ജിന്റെ സെക്യുലര്‍ വിഭാഗം കൊണ്ട് പൂഞ്ഞാര്‍ മണ്ഡലമൊഴിച്ച് കോട്ടയം ജില്ലയിലൊരിടത്തും എല്‍.ഡി.എഫിനു സഹായകരമായില്ല. പൂഞ്ഞാറിലെ വിജയം ജോര്‍ജിനു പിടിച്ചു നില്ക്കാനുള്ള കരുത്താകും.
കെ.എം. മാണിക്കും തിളക്കമാര്‍ന്ന വിജയം അവകാശപ്പെടാം. പാലാ മുനിസിപ്പാലിറ്റിയിലെ വിജയവും കോട്ടയം ജില്ലയിലെ മുന്നേറ്റവും ബാര്‍ കോഴ വിവാദത്തില്‍ നിന്നു തടിയൂരാന്‍ മാണിക്കു സഹായകരമാകും.
ഗ്രൂപ്പ് വഴക്കില്‍ തളര്‍ന്ന ബി.ജെ.പി നേതൃത്വത്തിനും ഇനി ആശ്വസിക്കാം. ബി.ജെ.പി യുടെ മിന്നുന്ന പ്രകടനം കേരളത്തില്‍ മുന്നോട്ടുള്ള പ്രവര്‍ത്തനങ്ങള്‍ക്ക് എസ്.എന്‍.ഡി.പി. ബന്ധത്തിനും കരുത്താകും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha