ശാലുവും ജോപ്പനും പുറത്തിറങ്ങുന്നതോടെ അണഞ്ഞു കൊണ്ടിരിക്കുന്ന സോളാര്‍ വീണ്ടും കത്തുമെന്ന പേടിയോടെ പ്രമുഖര്‍, ഒപ്പം പത്രക്കാരെ കാണരുതേ എന്ന പ്രാര്‍ത്ഥനയും
ശാലു മേനോനും ജോപ്പനും സ്വതന്ത്രമാകുന്നുവെന്ന വാര്‍ത്ത വന്നതോടെ പലരുടേയും ഉറക്കം നശിച്ചിരിക്കുകയാണ്‌. ഏതാണ്ട്‌ അണഞ്ഞു കൊണ്ടിരുന്ന സോളാറിനിടെയാണ്‌ ഇവര്‍ ജാമ്യം നേടി പുറത്തിറങ്ങുന്നത്‌. സോളാര്‍ കേസില്‍ ജോപ്പനു ജാമ്യം നല്‍കിയാലും ശാലു മേനോന് ജാമ്യം നല്‍കരുതെന്നായിരുന്നു സര്‍ക്കാരിന്റെ വാദം. എന്നാല്‍ കോടതി ഇരുവര്‍ക്കും ജാമ്യം അനുവദിക്കുകയായിരുന്നു. ജോപ്പനും ശാലു മേനോനും ഇന്ന് ജയില്‍ മോചിതരാവും. ഇരുവര്‍ക്കും ഉപാധികളോടെ ഹൈക്കോടതി ഇന്നലെ ജാമ്യം അനുവദിച്ചിരുന്നു. ജോപ്പന് പത്തനംതിട്ട ജില്ലാ ജയിലില്‍ നിന്നും ശാലുമേനോന്‍ അട്ടക്കുളങ്ങര വനിതാ ജയിലില്‍ നിന്നുമാണ് പുറത്തിറങ്ങുക.
പുറത്തിറങ്ങുന്ന ഇരുവരുടേയും വാക്കുകള്‍ കേള്‍ക്കാന്‍ കേരളം കാത്തിരിക്കുകയാണ്‌. അതോടൊപ്പംതന്നെ ഇവര്‍ എന്തു പറയുന്നു എന്നറിയാനായി ഉന്നതന്മാരും നെട്ടോത്തത്തിലാണ്‌. ജോപ്പനെക്കാളും പലരും പേടിക്കുന്നത്‌ ശാലുവിനെയാണ്‌. ശാലുവിന്‌ ജാമ്യം നല്‍കരുതെന്ന്‌ സര്‍ക്കാര്‍ തന്നെ വാദിച്ചത്‌ ശാലുവിനെ പ്രകോപിച്ചിട്ടുണ്ട്‌. അതുകൂടാതെ സരിതയുടെ മൊഴിയിലും ശാലുവിനെ പ്രതിക്കൂട്ടില്‍ നിര്‍ത്താനായി പലരും ഒത്തുകളിച്ചുവെന്ന ആക്ഷേപവും ഉണ്ട്‌. ഇതിനൊക്കെ മറുപടി ശാലു പറയും എന്നു തന്നെയാണ്‌ പലരുടേയും വിശ്വാസം.
ജോപ്പന് നിരപരാധിയാണെന്ന്‌ ജോപ്പന്റെ അച്ഛന്‍ തന്നെ നേരത്തേ വിശദീകരിച്ചതാണ്‌. ഇതേ നിലപാടുമായി ജോപ്പനും വന്നാല്‍ അത്‌ ബാധിക്കുന്നത്‌ സാക്ഷാല്‍ മുഖ്യമന്ത്രിയെയായിരിക്കും.
കോന്നി സ്വദേശി ശ്രീധരന്‍ നായരുടെ പരാതിയിലാണ് കഴിഞ്ഞ ജൂണ്‍ 28ന് മുഖ്യമന്ത്രിയുടെ പെഴ്‌സണല്‍ സ്റ്റാഫംഗമായിരുന്ന ജോപ്പന് അറസ്റ്റിലായത്. തിരുവനന്തപുരം മണക്കാട് സ്വദേശി റാഫിക്കലിയുടെ പരാതിയിലാണ് ശാലു മേനോനെ അറസ്റ്റുചെയ്തത്.
ജസ്റ്റിസ് സതീശ് ചന്ദ്രന്റെ അധ്യക്ഷതയിലുള്ള ഹൈ കോടതി ബെഞ്ചാണ് കര്‍ശന ഉപാധികളോടെ ഇരുവര്‍ക്കും ജാമ്യം അനുവദിച്ചത്. ശാലു മേനോന് ഒരു ലക്ഷം രൂപയുടെ ബോണ്ടും രണ്ടാളുടെ ജാമ്യവും ജോപ്പന് അമ്പതിനായിരം രൂപയുടെ ബോണ്ടും രണ്ടാള്‍ ജാമ്യവുമാണ് ഉപാധി. ഇരുവരും കേരളം വിട്ടുപോകരുത്. പാസ്‌പ്പോര്‍ട്ട് പോലീസില്‍ ഹാജരാക്കണം. ശാലു മേനോന് എട്ടാഴ്ച വരെ എല്ലാ തിങ്കളാഴ്ചയും ജോപ്പന് അന്വേഷണ്യോഗസ്ഥര്‍ ആവശ്യപ്പെടുമ്പോഴും അന്വേഷണോദ്യോഗസ്ഥരുടെ മുന്‍പാകെ ഹാജരാകണം തുടങ്ങിയവയാണ് ഉപാധികള്‍.
https://www.facebook.com/Malayalivartha
