അലറിക്കരച്ചില്‍ കേട്ട് ഓടിയെത്തിയ വീട്ടമ്മ കണ്ടത് ദേഹമാസകലം തീയുമായി ഒരാള്‍ മുറ്റത്ത് നിന്ന് ഓടുന്നു... ആ കാഴ്ച കണ്ട് നിലവിളിച്ച് വീട്ടമ്മ... ഓടിക്കൂടിയവര്‍ ചേര്‍ന്ന് തീയണച്ചു... അയല്‍വാസിയുടെ മുറ്റത്തുകിടന്ന കാര്‍ കത്തിക്കുന്നതിനിടെ ഗുരുതരമായി പൊള്ളലേറ്റ് ചികിത്സയില്‍ കഴിഞ്ഞയാള്‍ മരിച്ചു.

മാന്തുരുത്തി അരിമാലീല്‍ ചന്ദ്രശേഖരന്‍ നായര്‍ (76) ആണ് മരിച്ചത്. വ്യാഴാഴ്ച വൈകീട്ട് ഏഴരയോടെ അയല്‍വാസി കണ്ണമ്പള്ളി ടോമിച്ചന്റെ മുറ്റത്താണ് സംഭവം നടന്നത്. വീട്ടുമുറ്റത്ത് കിടന്ന കാറിനും ജനലിലും തീപിടിച്ചതുകണ്ട് ടോമിച്ചന്റെ ഭാര്യ ജെസി ഇറങ്ങിച്ചെന്നപ്പോള്‍ ദേഹമാസകലം തീയുമായി ചന്ദ്രശേഖരന്‍ മുറ്റത്തുകൂടി ഓടുന്നതാണ് കണ്ടത്. അയല്‍വാസികള്‍ ചേര്‍ന്ന് വെള്ളമൊഴിച്ച് തീകെടുത്തി. പോലീസെത്തി ചന്ദ്രശേഖരനെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. വെള്ളിയാഴ്ച 12.30-ഓടെ മരിച്ചു. സംസ്‌കാരം ശനിയാഴ്ച 2-ന് വീട്ടുവളപ്പില്‍ നടക്കും.


അതേസമയം വ്യാഴാഴ്ച വൈകീട്ട് ഏഴരയോടെ നിലവിളികേട്ടാണ് മാന്തുരുത്തി കണ്ണംപള്ളി ജെസി വാതില്‍ തുറന്ന് മുറ്റത്തിറങ്ങിയത്. ശരീരമാസകലം തീയുമായി ഒരാള്‍ മുറ്റത്തുകൂടി ഓടുന്നത് കണ്ടു. പോര്‍ച്ചില്‍ കിടന്ന കാറിലും വീടിന്റെ ജനാലകളിലും തീയുണ്ടായിരുന്നു. ജെസിയുടെ നിലവിളികേട്ടാണ് അയല്‍വാസികള്‍ ഓടിയെത്തിയത്. ചന്ദ്രശേഖരന്റെ ശരീരം പകുതി കത്തി കഴിഞ്ഞിരുന്നു.

ഓടിക്കൂടിയവര്‍ ചേര്‍ന്ന് തീണയച്ചപ്പോഴാണ് അയല്‍വാസിയായ അരിമാലില്‍ ചന്ദ്രശേഖര(70)നാണതെന്ന് തിരിച്ചറിയുന്നത്. ചന്ദ്രശേഖരന്‍ എന്തിനാണ് വീട്ടിലെത്തിയതെന്നോ തീയിടാന്‍ ശ്രമിച്ചതെന്നോ വീട്ടുടമ ടോമിച്ചനും കുടുംബത്തിനും അറിയില്ല.ചന്ദ്രശേഖരനുമായി യാതൊരു പ്രശ്‌നവുമില്ലായിരുന്നെന്നും നല്ല ബന്ധമായിരുന്നെന്നും ടോമിച്ചന്‍ പറഞ്ഞു. ആത്മഹത്യയാകാമെന്നാണ് പോലീസ് കരുതുന്നത്. വീട്ടുമുറ്റത്തുനിന്ന്, ചന്ദ്രശേഖരന്‍ കൊണ്ടുവന്നെന്ന് കരുതുന്ന പ്ലാസ്റ്റിക് കുപ്പിയില്‍ മണ്ണെണ്ണയുടെ അംശം കണ്ടെത്തി. ബന്ധുക്കളുമായി അകന്ന് ചന്ദ്രശേഖരന്‍ ഒറ്റയ്ക്കായിരുന്നു താമസിച്ചു പോന്നിരുന്നത്. ടോമിച്ചന്റെ പരാതിയില്‍ കറുകച്ചാല്‍ പോലീസ് അന്വേഷണം ആരംഭിച്ചു.