പശുവും ബീഫും സമ്മാനിച്ച പരാജയത്തില്‍ നിന്നും ഉയര്‍ത്തെഴുന്നേറ്റ് ലോക ശ്രദ്ധ നേടാന്‍ ഇന്ത്യന്‍ പ്രധാനമന്ത്രി നരേന്ദ്ര മോഡി നാളെ ബ്രിട്ടണിലേക്ക്. ഇന്ത്യക്കാര്‍ ജോലി തേടി എത്തുന്നവരല്ല, പാശ്ചാത്യ ലോകത്തുള്ളവര്‍ക്കുപോലും ജോലി നല്‍കുന്നവരാണ് എന്ന സന്ദേശത്തോടെയാണ് മോഡി ബ്രിട്ടണില്‍ എത്തുന്നത്.
ബ്രിട്ടീഷ് പാര്‍ലമെന്റില്‍ പ്രസംഗിക്കുന്ന ആദ്യ ഇന്ത്യന്‍ പ്രധാനമന്ത്രിയെന്ന ഖ്യാതിയും നാളെത്തുടങ്ങുന്ന സന്ദര്‍ശനത്തിനിടെ നരേന്ദ്ര മോഡി സ്വന്തമാക്കും. മറ്റൊരു ഇന്ത്യന്‍ നേതാവിനും ലഭിക്കാത്ത പ്രാമുഖ്യവും മോദിക്ക് ലഭിക്കുന്നുണ്ട്. സന്ദര്‍ശനത്തിനിടെ മിക്കവാറും പരിപാടികളില്‍ ബ്രിട്ടീഷ് പ്രധാനമന്ത്രി ഡേവിഡ് കാമറോണ്‍ മോഡിക്കൊപ്പമുണ്ടാും. പ്രതിനിധി സഭയിലേക്ക് മോഡിയെ ആനയിക്കുന്നതും കാമറോണായിരിക്കുമെന്ന് വിദേശ കാര്യ സെക്രട്ടറി എസ്. ജയശങ്കര്‍ പറഞ്ഞു.
ബ്രിട്ടീഷ് പാര്‍ലമെന്റിലെത്തുന്ന മോഡി പാര്‍ലമെന്റ് മന്ദിരത്തിന് മുന്നിലുള്ള മഹാത്മാ ഗാന്ധി പ്രതിമയില്‍ പുഷ്പാര്‍ച്ചന നടത്തും. നവംബര്‍ 12 മുതല്‍ 16 വരെയാണ് സന്ദര്‍ശനം. ഇന്ത്യയുടെ ഏറെക്കാലമായുള്ള സുഹൃത്താണ് ബ്രിട്ടനെന്നും ആ സൗഹൃദം ഊട്ടിയുറപ്പിക്കുന്നതിനാണ് സന്ദര്‍ശനമെന്നും ഫേസ്ബുക്ക് പോസ്റ്റില്‍ മോഡിയും വ്യക്തമാക്കിയിരുന്നു.
മാത്രമല്ല, ലോകത്തെ പ്രധാനപ്പെട്ട സാമ്പത്തിക ശക്തികളിലൊന്നാണ് ഇന്ത്യയെന്ന് തെളിയിക്കാനും ഈ സന്ദര്‍ശനം വഴിയൊരുക്കുമെന്നും മോഡി പറയുന്നു. എലിസബത്ത് രാജ്ഞി ബക്കിങ്ങാം കൊട്ടാരത്തില്‍ മോഡിക്കായി വിരുന്ന് തയ്യാറാക്കുന്നുണ്ട്. കാമറോണിനൊപ്പം അത്താഴവിരുന്നിലും മോഡി പങ്കെടുക്കും.
ജാഗ്വര്‍, റേഞ്ച് റോവര്‍ ഫാക്ടറി സന്ദര്‍ശനത്തിലൂടെ ജോലി തേടി എത്തുന്നവര്‍ എന്നതില്‍നിന്ന് ജോലി നല്‍കുന്നവര്‍ എന്ന തലത്തിലേക്കുള്ള ഇന്ത്യയുടെ വളര്‍ച്ച ലോകത്തിന് മുന്നില്‍ കാട്ടിക്കൊടുക്കാന്‍ മോഡിക്കാവും. ബ്രിട്ടനില്‍ ഇന്ത്യന്‍ സ്ഥാപനം നടത്തിയിട്ടുള്ള ഏറ്റവും വലിയ മുതല്‍മുടക്കാണ് ഇത്. സ്വകാര്യമേഖലയില്‍ ബ്രിട്ടനിലെ തന്നെ ഏറ്റവും വലിയ തൊഴില്‍ദാതാവാണ് ഇപ്പോള്‍ ടാറ്റ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha