എല്ഡിഎഫുമില്ല... മുഖ്യമന്ത്രിയും മന്ത്രിമാരും രാജ്ഭവന് ഉപരോധത്തില് പങ്കെടുക്കില്ല; ഗവര്ണര് ഏതറ്റവും വരെ പോകുമെന്നായപ്പോള് ഇടതുമുന്നണി നേരിട്ട് നേതൃത്വം നല്കുന്നതിന് പകരം ഉന്നത വിദ്യാഭ്യാസ സംരക്ഷണ സമിതിയെന്ന പേരിലാക്കി; കേന്ദ്രത്തിന് റിപ്പോര്ട്ട് നല്കാന് ഗവര്ണര്; എല്ഡിഎഫിനെതിരെ സുരേന്ദ്രന് ഹൈക്കോടതിയില്
ഗവര്ണര് ആരിഫ് മുഹമ്മദ് ഖാന്റെ വെല്ലുവിളി ഏറ്റു. മുഖ്യമന്ത്രിയും മന്ത്രിമാരും രാജ്ഭവന് ഉപരോധത്തില് പങ്കെടുക്കില്ല. ഇടതുമുന്നണി നേരിട്ട് നേതൃത്വം നല്കുന്നതിന് പകരം ഉന്നത വിദ്യാഭ്യാസ സംരക്ഷണ സമിതിയെന്ന കൂട്ടായ്മയുണ്ടാക്കിയാണ് പ്രതിരോധം തീര്ക്കുക. നേരത്തേ രാജ്ഭവന് ഉപരോധമെന്ന് പ്രഖ്യാപിച്ചിരുന്നെങ്കിലും ഇപ്പോള് പ്രതിഷേധ കൂട്ടായ്മയായാണ് പരിപാടിയൊരുക്കുന്നത്. ഒരു ലക്ഷം പേരെ അണിനിരത്തിയുള്ള ശക്തിപ്രകടനത്തിനാണ് ശ്രമം. പ്രതിഷേധ കൂട്ടായ്മ സി.പി.എം ജനറല് സെക്രട്ടറി സീതാറാം യെച്ചൂരി ഉദ്ഘാടനം ചെയ്യും.
ഇടതുമുന്നണിയെക്കാളുപരി ഉന്നതവിദ്യാഭ്യാസ സംരക്ഷണസമിതിയുടെ ബാനറിലാണ് സമരാസൂത്രണം. എങ്കിലും പങ്കെടുക്കുന്നത് പാര്ട്ടിക്കാര് തന്നെ. വിദ്യാഭ്യാസ വിദഗ്ധര്, സാമൂഹിക-സാംസ്കാരിക രംഗത്തെ പ്രമുഖര്, ഡി.എം.കെ. നേതാവ് തിരുച്ചി ശിവ, സി.പി.എം. സംസ്ഥാനസെക്രട്ടറി എം.വി. ഗോവിന്ദന്, സി.പി.ഐ. സംസ്ഥാനസെക്രട്ടറി കാനം രാജേന്ദ്രന്, മറ്റ് ഘടകകക്ഷിനേതാക്കള് എന്നിവരും പങ്കെടുക്കും. മുഖ്യമന്ത്രിയും മന്ത്രിമാരും പങ്കെടുക്കില്ല.
സമരം സംബന്ധിച്ച വിശദമായ റിപ്പോര്ട്ട് രാജ്ഭവന് രാഷ്ട്രപതിക്കും കേന്ദ്രസര്ക്കാരിനും നല്കും. പൊതുനിരത്ത് കൈയേറിയുള്ള സമരം നിയമവിരുദ്ധമാണെന്ന നിലപാടിലാണ് ഗവര്ണര്. സമരം നടക്കുന്ന വേളയില് ഗവര്ണര് രാജ്ഭവനിലില്ല. ഡല്ഹിക്കുപോയ അദ്ദേഹം അടുത്ത ഞായറാഴ്ചയേ മടങ്ങിവരൂ.
അതേസമയം എല് ഡി എഫ് പ്രഖ്യാപിച്ചിട്ടുള്ള രാജ്ഭവന് മാര്ച്ചിനെതിരെ ബി ജെ പി ഹൈക്കോടതിയെ സമീപിച്ചു. ഹാജര് ഉറപ്പു നല്കി ഉദ്യോസ്ഥരെയടക്കം പലരെയും സമരത്തിനിറക്കാന് ശ്രമമെന്ന് ചൂണ്ടികാട്ടിയാണ് ബി ജെ പി ഹൈക്കോടതിയെ സമീപിച്ചത്. ബി ജെ പി സംസ്ഥാന പ്രസിഡന്റ് കെ സുരേന്ദ്രനാണ് ഹര്ജിക്കാരന്. സര്ക്കാര് ഉദ്യോഗസ്ഥരെയും തൊഴിലുറപ്പ് തൊഴിലാളികളെയും ഗവര്ണര്ക്കെതിരെ സമരരംഗത്തിറക്കാന് ശ്രമമെന്ന് ഹര്ജിയില് പറയുന്നു.
ഹാജര് ഉറപ്പു നല്കിയാണ് പലരെയും സമരത്തിനിറക്കുന്നതെന്നും സമരത്തില് പങ്കെടുക്കാന് സര്ക്കാര് ജീവനക്കാരെ നിര്ബന്ധിക്കുന്നുവെന്നും സുരേന്ദ്രന്റെ ഹര്ജിയില് ചൂണ്ടികാട്ടിയിട്ടുണ്ട്. അതുകൊണ്ടുതന്നെ സമരത്തിനിറങ്ങുന്ന സര്ക്കാര് ജീവനക്കാരെ തടയണമെന്നും ബി ജെ പി സംസ്ഥാന അധ്യക്ഷന് ഹര്ജിയിലൂടെ ആവശ്യപ്പെട്ടിട്ടുണ്ട്.
അതേസമയം ഇന്ന് രാജ്ഭവന് മുന്നില് ഒരു ലക്ഷം പേരെ അണിനിരത്തിയുള്ള പ്രതിഷേധ കൂട്ടായ്മ സംഘടിപ്പിക്കാനാണ് എല്ഡിഎഫ് തീരുമാനം. ഗവര്ണര് നടത്തുന്നത് വഴിവിട്ട നീക്കങ്ങളാണെന്ന് ആരോപിച്ച് കൊണ്ടാണ് ഇടതുപക്ഷം പ്രതിഷേധം ശക്തമാക്കിയിട്ടുള്ളത്. സര്വകലാശാലകളുടെ മികവ് തകര്ക്കുന്നതാണ് ഗവര്ണറുടെ നീക്കമെന്നും വിദ്യാഭ്യാസ സംരക്ഷണ കൂട്ടായ്മ ചൂണ്ടികാട്ടിയിരുന്നു.
സി പി എം ജനറല് സെക്രട്ടറി സീതാറാം യെച്ചൂരിയാണ് പ്രതിഷേധ പരിപാടി ഉദ്ഘാടനം ചെയ്യുക. രാജ്ഭവന് മുന്നിലെ പ്രതിഷേധത്തിനൊപ്പം ജില്ലാ കേന്ദ്രങ്ങളില് പ്രതിഷേധവും വിദ്യാഭ്യാസ സംരക്ഷണ കൂട്ടായ്മ സംഘടിപ്പിക്കുന്നുണ്ട്. ഉന്നത വിദ്യാഭ്യാസ മേഖലയില് കേന്ദ്ര സര്ക്കാരിന് നേരിട്ട് ഇടപെടുന്നതിന് സംസ്ഥാന സര്ക്കാരുകളുടേയും സര്വ്വകലാശാലകളുടേയും അധികാരം തടസം സൃഷ്ടിക്കുന്നുണ്ട്. ഇതിനെ മറികടക്കുന്നതിന് സംഘപരിവാര് കണ്ടെത്തിയ വഴി ഗവര്ണമാരെ ഉപയോഗപ്പെടുത്തി വിദ്യാഭ്യാസ രംഗത്ത് ഇടപെടുക എന്നതാണെന്നാണ് സി പി എം ആരോപണം.
രാവിലെ 10ന് ആരംഭിക്കുന്ന കൂട്ടായ്മയില് പാര്ട്ടിക്കാരായിരിക്കും കൂടുതല്. സാമൂഹ്യ, സാംസ്കാരിക, കലാ, സാഹിത്യരംഗങ്ങളിലെ പ്രമുഖരും പങ്കെടുക്കും. ഡി.എം.കെ നേതാവ് തിരുച്ചി ശിവ എം.പി, സി.പി.എം സംസ്ഥാന സെക്രട്ടറി എം.വി. ഗോവിന്ദന്, സി.പി.ഐ സംസ്ഥാന സെക്രട്ടറി കാനം രാജേന്ദ്രന്, എല്.ഡി.എഫ് കണ്വീനര് ഇ.പി. ജയരാജന്, ജോസ് കെ.മാണി, മാത്യു ടി.തോമസ്, പി.സി. ചാക്കോ, വറുഗീസ് ജോര്ജ്, രാമചന്ദ്രന് കടന്നപ്പള്ളി, പി.സി. ജോസഫ്, കെ.ബി. ഗണേശ് കുമാര്, ബിനോയ് ജോസഫ് തുടങ്ങിയവര് പങ്കെടുക്കും. രാജ്ഭവന് പുറമേ ജില്ലാ കേന്ദ്രങ്ങളിലും പതിനായിരങ്ങള് പങ്കെടുക്കുന്ന പ്രതിഷേധം സംഘടിപ്പിക്കാനാണ് തീരുമാനം.
"
https://www.facebook.com/Malayalivartha
