എംപ്ലോയീസ് പ്രോവിഡന്റ് ഫണ്ട് (ഇ.പി.എഫ്.) പെന്‍ഷന്‍ വാങ്ങുന്നവര്‍ക്ക് സാമൂഹികസുരക്ഷാ പെന്‍ഷന്‍ നിയന്ത്രിക്കാനൊരുങ്ങി സംസ്ഥാന സര്‍ക്കാര്‍. സാമൂഹിക സുരക്ഷാപെന്‍ഷന്‍ വാങ്ങുന്നവരുടെ എണ്ണത്തിലും അതിനുവേണ്ട പണത്തിലും വര്‍ധനയുണ്ടായ സാഹചര്യത്തിലാണ് ഈ നിയന്ത്രണം.



59 ലക്ഷംപേര്‍ക്ക് പെന്‍ഷന്‍ നല്‍കാന്‍ മാസം 850 കോടിരൂപയാണ് ഇപ്പോള്‍വേണ്ടത്. ഇതിനായി പ്രത്യേകം വായ്പയെടുക്കുന്നത് കേന്ദ്രസര്‍ക്കാര്‍ തടഞ്ഞതും സാമ്പത്തിക പ്രതിസന്ധിയും കാരണം യഥാസമയം പണം കണ്ടെത്താനാവാത്തതിനാല്‍ ക്ഷേമപെന്‍ഷന്‍ വിതരണം ഇപ്പോള്‍ താമസിക്കുകയാണ്.

ഇ.പി.എഫ്. പെന്‍ഷന്‍ വാങ്ങുന്നവര്‍ക്ക് പെന്‍ഷന്‍ തുക എത്രയെന്ന് നോക്കാതെ 1600 രൂപ ക്ഷേമപെന്‍ഷന്‍ നല്‍കിവന്നിട്ടുണ്ടായിരുന്നു. ഇ.പി.എഫ്. പെന്‍ഷനായി തുച്ഛമായ തുകമാത്രം ലഭിക്കുന്നവര്‍ക്ക് ഇത് ആശ്വാസമായിരുന്നു.

എന്നാല്‍, ഇ.പി.എഫ്. പെന്‍ഷന്‍കാരെ പല വിഭാഗങ്ങളായി തിരിച്ച് ക്ഷേമപെന്‍ഷന്‍ നിയന്ത്രിക്കാനാണ് ധനവകുപ്പിന്റെ പുതിയ തീരുമാനം.

നിയന്ത്രണങ്ങളിങ്ങനെ 1) കേന്ദ്ര, സംസ്ഥാന പൊതുമേഖലാ സ്ഥാപനങ്ങളില്‍ നിന്നും എക്സിക്യുട്ടീവ്, സ്റ്റാഫ് തസ്തികകളില്‍നിന്ന് വിരമിച്ചവരില്‍ 4,000 രൂപവരെ ഇ.പി.എഫ്. പെന്‍ഷന്‍ ലഭിക്കുന്നവര്‍ക്ക് സാമൂഹിക സുരക്ഷാ പെന്‍ഷനായി 600 രൂപ മാത്രമേ ലഭിക്കൂ. ഈ വിഭാഗത്തില്‍ 4,000ന് മുകളില്‍ പെന്‍ഷന്‍ കിട്ടുന്നവര്‍ക്ക് സാമൂഹിക സുരക്ഷാപെന്‍ഷന് അര്‍ഹതയുണ്ടാവില്ല. എന്നാല്‍, ഇവര്‍ക്ക് ക്ഷേമനിധി ബോര്‍ഡുകളില്‍ നിന്നുള്ള 600 രൂപ പെന്‍ഷന് അര്‍ഹതയുണ്ടായിരിക്കും.

2. 4,000 രൂപവരെ ഇ.പി.എഫ്. പെന്‍ഷന്‍ ലഭിക്കുന്ന വിരമിച്ച തൊഴിലാളികള്‍ക്ക് സാമൂഹിക സുരക്ഷാ പെന്‍ഷനോ ക്ഷേമനിധി ബോര്‍ഡുകളില്‍ നിന്നുള്ള ക്ഷേമപെന്‍ഷനോ ഏതെങ്കിലും ഒന്ന് പൂര്‍ണമായി ലഭിക്കും. ഇതിനുമുകളില്‍ ഇ.പി.എഫ്. പെന്‍ഷന്‍ കിട്ടുന്നവര്‍ക്ക് സാമൂഹിക സുരക്ഷാ പെന്‍ഷനോ ക്ഷേമപെന്‍ഷനോ 600 രൂപമാത്രമേ കിട്ടൂ.

ഇ.പി.എഫ്. പെന്‍ഷന്‍കാരില്‍ എത്രപേര്‍ക്ക് സുരക്ഷാ, ക്ഷേമപെന്‍ഷന്‍ ലഭിക്കുന്നുവെന്ന് വ്യക്തമല്ല. ഇതിന്റെ വിവരങ്ങള്‍ തദ്ദേശസ്ഥാപനങ്ങള്‍, ക്ഷേമനിധി ബോര്‍ഡുകള്‍ എന്നിവയുടെ അടിസ്ഥാനത്തില്‍ ശേഖരിക്കാന്‍ ഇന്‍ഫര്‍മേഷന്‍ കേരള മിഷന് (ഐ.കെ.എം.) ധനവകുപ്പ് നിര്‍ദേശം നല്‍കി. ഇതനുസരിച്ചായിരിക്കും പെന്‍ഷന്‍തുക പുനഃക്രമീകരിക്കുക.