സ്ത്രീകൾക്ക് വേണ്ടി ശബ്‌ദമുയർത്തി ഗവർണർ ആരിഫ് മുഹമ്മദ് ഖാൻ. സ്ത്രീകൾ രാജ്യത്ത് വിവേചനം നേരിടുന്നത് അപമാനകരമാണെന്ന് അദ്ദേഹം ചൂണ്ടിക്കാണിച്ചു. മത്സ്യമേഖലയിൽ ഉൾപ്പടെ സ്ത്രീകൾ വിവേചനം നേരിടുന്നുണ്ട് എന്ന കാര്യം അദ്ദേഹം എടുത്ത് പറഞ്ഞു. ജൻഡർ ഇൻ അക്വാകൾച്ചർ ആൻഡ് ഫിഷറീസ് ഗ്ലോബൽ കോൺഫറൻസ് കൊച്ചിയിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഇന്ത്യയുടെ ചരിത്രം നോക്കിയാൽ പുരാണങ്ങളിലും സ്ത്രീകളെ ബഹുമാനിക്കുന്നത് കാണുവാൻ സാധിക്കുന്നുണ്ട്. എന്നാൽ ആധുനികകാലത്ത് അവസ്ഥ വ്യത്യസ്തമാണ് എന്നാണ് ഗവർണർ ചൂണ്ടിക്കാണിക്കുന്നത് . മത്സ്യബന്ധന വ്യവസായം ഓരോ ദിവസവും വളരുകയാണ്. അതിലെല്ലാം സ്ത്രീകൾ സംഭാവനകൾ നൽകുന്നുണ്ടെന്നും ഗവർണർ ചൂണ്ടിക്കാണിച്ചു. മത്സ്യമേഖലയിലെങ്കിലും ഇത്തരം വിവേചനങ്ങൾ അവസാനിപ്പിക്കാനുള്ള ശ്രമങ്ങൾ ഉണ്ടാകണമെന്നാണ് അദ്ദേഹം അടിവരയിട്ട് പറഞ്ഞിരിക്കുന്നത്.

അതേസമയം ഈ ചടങ്ങിൽ ഫിഷറീസ് ടെക്‌നോളജി അവാർഡ് പ്രശസ്ത ഗവേഷകനും അക്കാഡമീഷ്യനുമായ ഡോ. ടി.കെ. ശ്രീനിവാസ ഗോപാലിന് ഗവർണർ നൽകി. 23 വരെ കൊച്ചി ഐ.എം.എ ഹൗസിലാണ് 20 രാജ്യങ്ങളിൽ നിന്നുള്ള മുന്നൂറിലേറെപ്പേർ പങ്കെടുക്കുന്ന സമ്മേളനം നടക്കുന്നത് .