ആ വാര്‍ത്ത കേട്ട് ..... ബ്രെയിന്‍ ട്യൂമര്‍ ബാധിച്ച് ചികിത്സയിലായിരുന്ന ഭാര്യ മരിച്ച വിവരം അറിയിച്ച വനിതാ ഡോക്ടറെ മദ്ധ്യവയസ്‌കന്‍ ചവിട്ടി വീഴ്ത്തി, സംഭവം തിരുവനന്തപുരം മെഡിക്കല്‍ കോളേജില്‍ ഇന്നലെ പുലര്‍ച്ചെ മൂന്നരയ്ക്ക്. മര്‍ദ്ദനമേറ്റ ഡോക്ടര്‍ ചികിത്സയില്‍.....അടിവയറ്റില്‍ ക്ഷതമേറ്റ ഡോക്ടറെ തീവ്രപരിചരണ വിഭാഗത്തില്‍ പ്രവേശിപ്പിച്ചു. ആരോഗ്യനില തൃപ്തികരമാണ്.


കൊല്ലം വെളിച്ചക്കാല ടി.ബി ജംഗ്ഷന്‍ പുതുമനയില്‍ ശുഭയാണ് (48)മരിച്ചത്. ഇവരുടെ ഭര്‍ത്താവ് സെന്തില്‍കുമാറാണ് (53) ഡോക്ടറെ ആക്രമിച്ചത്. ഇയാള്‍ക്കെതിരെ കേസെടുത്ത മെഡിക്കല്‍ കോളേജ് പൊലീസ് സംസ്‌കാരച്ചടങ്ങ് കഴിഞ്ഞ് കസ്റ്റഡിയിലെടുക്കാനായിരുന്നു തീരുമാനിച്ചിരുന്നത്.


എന്നാല്‍, ഭാര്യയുടെ സംസ്‌കാരത്തിന് പിന്നാലെ ശാരീരിക അസ്വസ്ഥതകളെ തുടര്‍ന്ന് സെന്തില്‍കുമാര്‍ കുഴഞ്ഞു വീണു. നെടുങ്ങോലത്തെ ആശുപത്രിയില്‍ പ്രവേശിപ്പിച്ചു.

ആശുപത്രി സംരക്ഷണ നിയമം, ഡ്യൂട്ടി തടസ്സപ്പെടുത്തല്‍ ഉള്‍പ്പെടെ ജാമ്യമില്ലാ വകുപ്പുകള്‍ ചുമത്തിയാണ് കേസ്.ഈ മാസം ആറിന് മെഡിക്കല്‍ കോളേജില്‍ പ്രവേശിപ്പിച്ച ശുഭയ്ക്ക് കഴിഞ്ഞ ദിവസം ശസ്ത്രക്രിയ നടത്തിയിരുന്നു.


ആരോഗ്യനില വഷളായി ഇന്നലെ മരണപ്പെടുകയായിരുന്നു. മരണ വിവരം അറിയിച്ചയുടന്‍ സെന്തില്‍കുമാര്‍ ചവിട്ടി വീഴ്ത്തിത്തിയെന്ന് ഡോക്ടര്‍ പൊലീസിന് നല്‍കിയ പരാതിയില്‍ പറയുന്നു. ശുഭയുടെ നില ഗുരുതരമാണെന്ന വിവരം ബന്ധുക്കള്‍ ഭര്‍ത്താവില്‍ നിന്നു മറച്ചു വച്ചിരുന്നുവത്രെ.

അക്കാരണത്താല്‍ മരണവിവരം പെട്ടെന്ന് അറിഞ്ഞതോടെ മാനസിക സമ്മര്‍ദ്ദത്തിന് അടിപ്പെട്ടതാവാം ആക്രമണ കാരണമെന്നാണ് കരുതുന്നത്. ഗൗതം, അനസൂയ എന്നിവര്‍ മക്കളാണ്. പ്രതിയെ ഉടന്‍ അറസ്റ്റു ചെയ്യണമെന്ന് ആവശ്യപ്പെട്ട് കെ.ജി.എം.സി.ടി.എയുടെ നേതൃത്വത്തില്‍ പി.ജി ഡോക്ടര്‍മാര്‍ പ്രകടനം നടത്തുകയും ചെയ്തു.

അതേസമയം മെഡിക്കല്‍ കോളേജിലെ ന്യൂറോ സര്‍ജറി വിഭാഗത്തിലെ റെസിഡന്റ് വനിതാ ഡോക്ടറിന്റെ അടിവയറ്റില്‍ രോഗിയുടെ ഭര്‍ത്താവ് ചവിട്ടി വീഴ്ത്തിയ സംഭവത്തില്‍ ശക്തമായ നടപടി സ്വീകരിക്കുമെന്ന് ആരോഗ്യ വകുപ്പ് മന്ത്രി വീണാ ജോര്‍ജ്. ആരോഗ്യ പ്രവര്‍ത്തകര്‍ക്ക് നേരെ നടക്കുന്ന ആക്രമണങ്ങള്‍ അപലപനീയമാണ്. ആക്രമണങ്ങള്‍ ആരോഗ്യ പ്രവര്‍ത്തകരുടെ മനോവീര്യം തകര്‍ക്കുമെന്നും മന്ത്രി വ്യക്തമാക്കി.