കഴിഞ്ഞ രാത്രി അര്‍ജന്റീന ആരാധകര്‍ക്ക് ഉറക്കം വന്നില്ല. ആ ഉറക്കം തീര്‍ത്തത് ഇന്നലെയാണ്. ഖത്തര്‍ ലോകകപ്പില്‍ കോസ്റ്ററിക്കയ്‌ക്കെതിരെ സ്‌പെയിനിന് 7-0 ന്റെ തകര്‍പ്പന്‍ ജയം. മരണ ഗ്രൂപ്പെന്ന് വിലയിരുത്തപ്പെട്ട ഗ്രൂപ്പ് ഇയില്‍ തികച്ചും ഏകപക്ഷീയമായി മാറിയ മത്സരത്തില്‍ കോസ്റ്ററിക്കയെ സ്‌പെയിന്‍ വീഴ്ത്തിയത് എതിരില്ലാത്ത ഏഴു ഗോളുകള്‍ക്ക്.

സ്പാനിഷ് നിരയിലെ ആറു പേര്‍ ചേര്‍ന്നാണ് ഏഴു ഗോളടിച്ചത്. ഫെറാന്‍ ടോറസിന്റെ ഇരട്ടഗോളും (31പെനല്‍റ്റി, 54), ഡാനി ഓല്‍മോ (11), മാര്‍ക്കോ അസെന്‍സിയോ (21), ഗാവി (74), കാര്‍ലോസ് സോളര്‍ (90), അല്‍വാരോ മൊറാട്ട (90+2) എന്നിവരുടെ ഗോളുകളുമാണ് സ്പാനിഷ് പടയ്ക്ക് കൂറ്റന്‍ വിജയമൊരുക്കിയത്. റയല്‍ മഡ്രിഡ്, പിഎസ്ജി തുടങ്ങിയ വമ്പന്‍ ക്ലബ്ബുകളുടെ ഗോള്‍കീപ്പറായിരുന്ന കെയ്‌ലര്‍ നവാസ് കാവല്‍നിന്ന പോസ്റ്റിലാണ് സ്പാനിഷ് പട ഏഴു ഗോളുകള്‍ അടിച്ചുകയറ്റിയത്.

ഇതോടെ, ഗ്രൂപ്പ് ഇയില്‍ മൂന്നു പോയിന്റുമായി സ്‌പെയിന്‍ ഒന്നാം സ്ഥാനത്തേക്ക് കയറി. ജര്‍മനിയെ ഒന്നിനെതിരെ രണ്ടു ഗോളുകള്‍ക്കു തോല്‍പ്പിച്ച ജപ്പാനാണ് രണ്ടാമത്. ലോകകപ്പിന്റെ ചരിത്രത്തില്‍ സ്‌പെയിനിന്റെ ഏറ്റവും വലിയ വിജയം കൂടിയാണിത്.

ഇതിനു മുന്‍പ് സ്‌പെയിന്‍ ലോകകപ്പിലെ ഒരു മത്സരത്തില്‍ അഞ്ചിലധികം ഗോള്‍ നേടിയത് രണ്ടു തവണ മാത്രമാണ്. 1986ല്‍ ഡെന്‍മാര്‍ക്കിനെതിരെ 51ന് വിജയിച്ച സ്‌പെയിന്‍, 1998ല്‍ ബള്‍ഗേറിയയ്ക്കെതിരെ 61നും വിജയിച്ചു. കളിക്കണക്കുളിലെ ആധിപത്യം അതേപടി സ്‌കോര്‍ ബോര്‍ഡിലും പ്രതിഫലിപ്പിച്ചാണ് സ്‌പെയിന്‍ കൂറ്റന്‍ വിജയം നേടിയത്. മത്സരത്തിന്റെ 81 ശതമാനവും പന്തു കൈവശം വച്ച സ്‌പെയിന്‍, മത്സരത്തിലാകെ പൂര്‍ത്തിയാക്കിയത് 1043 പാസുകള്‍! കോസ്റ്ററിക്കയുടെ 231 പാസുകളുടെ സ്ഥാനത്താണിത്. ഇനി ജര്‍മനിക്കെതിരെയാണ് സ്‌പെയിന്റെ അടുത്ത മത്സരം.

കോസ്റ്ററിക്കന്‍ ബോക്‌സിലേക്ക് നടത്തിയ തുടര്‍ ആക്രമണങ്ങളുടെ തുടര്‍ച്ചയായിരുന്നു സ്‌പെയിനിന്റെ ആദ്യ ഗോള്‍. സ്പാനിഷ് ജഴ്‌സിയില്‍ ലോകകപ്പ് കളിക്കുന്ന ഏറ്റവും പ്രായം കുറഞ്ഞ താരമെന്ന നേട്ടം സ്വന്തമാക്കിയ ഗാവിയില്‍നിന്നാണ് ഗോള്‍നീക്കത്തിന്റെ തുടക്കം. ഗാവി ബോക്‌സിലേക്ക് ഉയര്‍ത്തി നല്‍കിയ പന്ത് കോസ്റ്ററിക്കന്‍ പ്രതിരോധ മതിലില്‍ തട്ടി വന്നുപെട്ടത് ഡാനി ഓല്‍മോയ്ക്കു മുന്നില്‍. താരത്തിന്റെ ഷോട്ട് കെയ്ലര്‍ നവാസിനെ മറികടന്ന് വലയില്‍. ലോകപ്പില്‍ സ്‌പെയിനിന്റെ 100ാം ഗോള്‍.

10 മിനിറ്റിനുള്ളില്‍ സ്‌പെയ്ന്‍ ലീഡ് വര്‍ധിപ്പിച്ചു. ഇക്കുറി ലക്ഷ്യം കണ്ടത് മാര്‍ക്കോ അസെന്‍സിയോ. ബോക്‌സിനു വെളിയില്‍ ഇടതുവിങ്ങില്‍നിന്നും ജോര്‍ഡി ആല്‍ബ പന്ത് ഉയര്‍ത്തി വിടുമ്പോള്‍ കാര്യമായ അനക്കമില്ലാത്ത നിലയിലായിരുന്നു കോസ്റ്ററിക്കന്‍ പ്രതിരോധം. കാല്‍ച്ചുവട്ടിലേക്കെത്തിയ പന്തിനെ ഒട്ടും താമസം കൂടാതെ അസെന്‍സിയോ വലയിലേക്ക് തിരിച്ചുവിട്ടു. നവാസിന്റെ കൈകളില്‍ത്തട്ടി ചെറുതായി ഗതിമാറിയെങ്കിലും പന്ത് വലയിലേക്കു തന്നെ. അങ്ങനെ രണ്ടാം ഗോള്‍ പിറന്നു.

അടുത്ത 10 മിനിറ്റിനുള്ളില്‍ സ്‌പെയിന്‍ ലീഡ് മൂന്നാക്കി ഉയര്‍ത്തി. ഇത്തവണ ഗോളിലേക്കു വഴിതുറന്നത് സ്െപയിന് അനുകൂലമായി ലഭിച്ച പെനല്‍റ്റി. ഇത്തവണയും ഗോളിന്റെ ശില്‍പി ജോര്‍ഡി ആല്‍ബ. കോസ്റ്ററിക്കന്‍ ബോക്‌സിനുള്ളില്‍ ആല്‍ബയെ ഡ്യുവാര്‍ട്ടെ തള്ളിയിട്ടതിന് സ്‌പെയിന് അനുകൂലമായി പെനല്‍റ്റി. കിക്കെടുത്ത ഫെറാന്‍ ടോറസ് അനായാസം ലക്ഷ്യം കണ്ടു. സ്‌കോര്‍ 3-0.

ആദ്യപകുതിയുടെ തുടര്‍ച്ചയായി രണ്ടാം പകുതിയിലും ആക്രമിച്ചു കളിച്ച സ്‌പെയിന്‍ എപ്പോള്‍ നാലാം ഗോള്‍ നേടുമെന്നു മാത്രമായിരുന്നു സംശയം. ഈ ചോദ്യത്തിന് ഉത്തരമായത് 54ാം മിനിറ്റില്‍. ഒരിക്കല്‍ക്കൂടി കോസ്റ്ററിക്കന്‍ പ്രതിരോധത്തിന്റെ പിടിപ്പുകേട് തെളിഞ്ഞുകണ്ട നിമിഷം.

ലോകകപ്പില്‍ കളിക്കുന്ന പ്രായം കുറഞ്ഞ സ്പാനിഷ് താരമെന്ന റെക്കോര്‍ഡിട്ട ഗാവിയുടെ അവസരമായിരുന്നു അടുത്തത്. പതിവുപോലെ കോസ്റ്ററിക്കന്‍ ഗോള്‍മുഖത്തേക്ക് എത്തിയൊരു നീക്കത്തിനൊടുവില്‍ പന്ത് അല്‍വാരോ മൊറാട്ടയില്‍നിന്ന് ഗാവിയിലേക്ക്. പന്ത് സ്വീകരിച്ച ഗാവി അതിനു നേരെ വലയിലേക്കു വഴികാട്ടിയതോടെ സ്‌പെയിനിന്റെ ഏറ്റവും പ്രായം കുറഞ്ഞ ലോകകപ്പ് ഗോള്‍വേട്ടക്കാരന്‍ പിറന്നു. സ്‌കോര്‍ 5-0.

തകര്‍ന്നു തരിപ്പണമായിപ്പോയ കോസ്റ്ററിക്കന്‍ പ്രതിരോധത്തെ കാഴ്ചക്കാരാക്കി സ്‌പെയിന്‍ ആറാം ഗോള്‍ നേടിയത് 90ാം മിനിറ്റില്‍. പകരക്കാരനായി കളത്തിലിറങ്ങിയ കാര്‍ലോസ് സോളറിന്റെ ഊഴമായിരുന്നു ഇത്തവണ.

ഇന്‍ജറി ടൈമിന്റെ രണ്ടാം മിനിറ്റില്‍ സ്‌പെയിന്‍ ഏഴാമത്തെ ഗോളുമടിച്ചു. ഇത്തവണ ലക്ഷ്യം കണ്ടത് അല്‍വാരോ മൊറാട്ട. ഡാനി ഓല്‍വോയില്‍നിന്ന് ലഭിച്ച പന്ത് സ്വീകരിച്ച് മൊറാട്ട തൊടുത്ത പന്ത്, കെയ്ലര്‍ നവാസിനെ കാഴ്ചക്കാരനാക്കി വലയിലേക്ക്. സ്‌കോര്‍ 7-0. അതോടെ വിജയം രാജകീയമായി.