തുഷാര്‍ വെള്ളാപ്പള്ളി വല്ലാത്തൊരു ധര്‍മ്മ സങ്കടത്തിലാണ്. തെലുങ്കാന പോലീസ് പിന്നില്‍ തന്നെയുണ്ട്. കേന്ദ്രവും സംസ്ഥാനവും ആപത്ത് സമയത്ത് സഹായിക്കുമെങ്കിലും തെലുങ്കാന പോലീസിന്റെ കൈയ്യില്‍ കിട്ടിയാല്‍ തീര്‍ന്നു. 100 കോടി രൂപ വാഗ്ദാനം ചെയ്തു ടിആര്‍എസ് എംഎല്‍എമാരെ വിലയ്ക്കു വാങ്ങാന്‍ ശ്രമിച്ചെന്ന കേസില്‍ തുഷാര്‍ വെള്ളാപ്പള്ളിക്കെതിരെ ലുക്കൗട്ട് നോട്ടിസ് പുറത്തിറക്കി തെലങ്കാന പൊലീസ്.

തെലങ്കാനയിലെ ഓപ്പറേഷന്‍ കമലയുമായി ബന്ധപ്പെട്ടു പൊലീസ് തിരയുന്ന ജഗ്ഗു സ്വാമിക്കെതിരെ തിരച്ചില്‍ നോട്ടിസ് പുറത്തിറക്കിയതിനു പിന്നാലെയാണു തുഷാര്‍ വെള്ളാപ്പള്ളിക്കെതിരെയും നടപടി. കേരളത്തിലെത്തിയ തെലങ്കാന പൊലീസ് സംഘം ചോദ്യം ചെയ്യലിനു ഹാജരാകാന്‍ തുഷാര്‍ വെള്ളാപ്പള്ളിക്കു നോട്ടിസ് നല്‍കിയിരുന്നെങ്കിലും ഇതിനു വിസമ്മതിച്ചതോടെയാണു തിരച്ചില്‍ നോട്ടിസ് പുറപ്പെടുവിച്ചത്. ബിജെപി ദേശീയ ജനറല്‍ സെക്രട്ടറി ബി.എല്‍. സന്തോഷിനെതിരെയും നോട്ടിസ് ഇറക്കിയിട്ടുണ്ട്. ചോദ്യം ചെയ്യലിനു സ്വമേധയാ ഹാജരായില്ലെങ്കില്‍ അറസ്റ്റ് അടക്കമുള്ള നടപടികളിലേക്കു നീങ്ങുമെന്ന മുന്നറിയിപ്പും നല്‍കി.

തെലങ്കാനയില്‍ കോടികളിറക്കി 'ഓപ്പറേഷന്‍ താമര'യിലൂടെ ടി.ആര്‍.എസ്. എം.എല്‍.എ.മാരെ കൂറുമാറ്റാന്‍ ശ്രമിച്ചെന്ന കേസില്‍ ബി.ജെ.പി. ദേശീയ ജനറല്‍ സെക്രട്ടറി ബി.എല്‍. സന്തോഷിന് പുതിയ സമന്‍സയക്കാന്‍ പ്രത്യേകാന്വേഷണ സംഘത്തോട് (എസ്.ഐ.ടി.) ഹൈക്കോടതി ഉത്തരവിട്ടിരുന്നു. ഇമെയില്‍ വഴിയും വാട്‌സാപ്പ് വഴിയും സമന്‍സ് നല്‍കാന്‍ ജസ്റ്റിസ് ബി. വിജയേശന്‍ റെഡ്ഡി നിര്‍ദേശിച്ചു.

നേരത്തേ അയച്ച സമന്‍സ് സന്തോഷ് നേരിട്ട് കൈപ്പറ്റാത്തതിനെത്തുടര്‍ന്നാണിത്. എന്നാല്‍, അദ്ദേഹത്തിന്റെ അറസ്റ്റ് സ്റ്റേ ചെയ്തുകൊണ്ടുള്ള മുന്‍ ഉത്തരവ് റദ്ദാക്കണമെന്ന എസ്.ഐ.ടി. അപേക്ഷ കോടതി തള്ളി. സന്തോഷ് അന്വേഷണത്തില്‍ സഹകരിക്കുന്നില്ലെന്ന് എസ്.ഐ.ടി. കോടതിയില്‍ കുറ്റപ്പെടുത്തി. അന്വേഷണപുരോഗതി 29-ന് കോടതിയെ അറിയിക്കണം. അടുത്ത വാദം 30-ന് കേള്‍ക്കാനും നിശ്ചയിച്ചു.

അതിനിടെ, ഇതേ കേസില്‍ സമന്‍സ് നല്‍കിയിട്ടും ഹാജരാകാത്ത ബി.ഡി.ജെ.എസ്. അധ്യക്ഷന്‍ തുഷാര്‍ വെള്ളാപ്പള്ളി, കൊച്ചി കേന്ദ്രീകരിച്ചു പ്രവര്‍ത്തിക്കുന്ന ഡോ. ജഗ്ഗു സ്വാമി എന്നിവര്‍ക്കെതിരേ എന്തു നടപടി സ്വീകരിക്കണമെന്ന കാര്യത്തില്‍ എസ്.ഐ.ടി. നിയമവിദഗ്ധരുമായി കൂടിയാലോചന തുടരുകയാണ്. തുഷാറും ജഗ്ഗുസ്വാമിയും ഹാജരാകാനുള്ള സമയം നീട്ടിച്ചോദിക്കാനാണ് സാധ്യതയെന്ന് അറിയുന്നു. ഇരുവര്‍ക്കുമെതിരേ കഴിഞ്ഞദിവസം എസ്.ഐ.ടി. തിരച്ചില്‍ നോട്ടീസ് ഇറക്കിയിട്ടുണ്ട്.

ചോദ്യംചെയ്യാനായി ഹാജരാകണമെന്നാവശ്യപ്പെട്ട് രണ്ടുപേര്‍ക്കുകൂടി എസ്.ഐ.ടി. ബുധനാഴ്ച നോട്ടീസ് നല്‍കി. അഭിഭാഷകനായ പ്രതാപ് ഗൗഡ്, ആരോപണവിധേയനായ നന്ദകുമാറിന്റെ ഭാര്യ ചിത്രലേഖ എന്നിവര്‍ക്കാണിത്. ഭരണകക്ഷിയായ ടി.ആര്‍.എസിലെ നാല് എം.എല്‍.എ.മാരെ ചാക്കിട്ടുപിടിച്ച് തെലങ്കാനയിലെ ഭരണം അട്ടിമറിക്കാന്‍ നീക്കംനടത്തിയെന്നാണ് മുഖ്യമന്ത്രി കെ.സി. ചന്ദ്രശേഖര്‍ റാവു ഉള്‍പ്പെടെയുള്ളവരുടെ ആരോപണം. ഈ എം.എല്‍.എ.മാരുമായി ചര്‍ച്ചനടത്തിയ മൂന്ന് 'ബി.ജെ.പി. ഏജന്റു'മാരെ നേരത്തേ അറസ്റ്റുചെയ്തിരുന്നു.

തെലങ്കാനയില്‍ സര്‍ക്കാരിനെ അട്ടിമറിക്കാനുള്ള 'ഓപ്പറേഷന്‍ ലോട്ടസ്' പദ്ധതിക്ക് പിന്നില്‍ പ്രധാനമായി പ്രവര്‍ത്തിച്ചത് തുഷാറാണെന്നാണ് മുഖ്യമന്ത്രി കെ ചന്ദ്രശേഖര റാവു അടുത്തിടെ ആരോപിച്ചത്. ടി ആര്‍ എസ് എം എല്‍ എമാരെ സ്വാധീനിക്കാന്‍ 100 കോടി രൂപ വാഗ്ദാനം ചെയ്തത് അമിത് ഷായുടെ നോമിനിയായ തുഷാറാണെന്നായിരുന്നു ആരോപണം. എം എല്‍ എ മാരെ പണം നല്‍കി ചാക്കിലാക്കാന്‍ ബി ജെ പി നടത്തിയ ശ്രമത്തിന്റെ വീഡിയോ, കോള്‍ റെക്കോര്‍ഡിംഗ് തെളിവുകളടക്കം പുറത്ത് വിട്ടാണ് കെ സി ആര്‍ ' ഓപ്പറേഷന്‍ ലോട്ടസ് ' ആരോപണം നടത്തിയത്. ഇതുമായി ബന്ധപ്പെട്ട് കോടികളുമായി മൂന്ന് പേരെ പൊലീസ് അറസ്റ്റും ചെയ്തിരുന്നു.

കേസില്‍ അറസ്റ്റിലായ മൂന്ന് ഏജന്റുമാരും തുഷാറിനെ ബന്ധപ്പെട്ടതിന്റെ ഫോണ്‍ വിവരങ്ങളും അദ്ദേഹം പുറത്തുവിട്ടിരുന്നു. തുഷാര്‍, അമിത് ഷായുടെ നേരിട്ടുള്ള നോമിനിയാണെന്നും കെ സി ആര്‍ ആരോപിച്ചിരുന്നു. കെ സി ആറിന്റെ ആരോപണം ബി ജെ പിയും തുഷാര്‍ വെള്ളാപ്പള്ളിയും തള്ളിയതിന് പിന്നാലെ ബി ഡി ജെ എസ് അധ്യക്ഷന്‍ തുഷാര്‍ വെള്ളാപ്പള്ളിയുടേതെന്ന് ആരോപിക്കുന്ന ശബ്ദരേഖയും പുറത്ത് വന്നിരുന്നു. ടി ആര്‍ എസിന്റെ, എംഎല്‍എമാരുമായി കൂടിക്കാഴ്ച നടത്താമെന്ന് ശബ്ദരേഖയില്‍ തുഷാര്‍ വെള്ളാപ്പള്ളി പറയുന്നുണ്ട്. ബി എല്‍ സന്തോഷുമായി സംസാരിച്ച് കാര്യങ്ങള്‍ ഉറപ്പിക്കാമെന്നും ശബ്ദരേഖയില്‍ തുഷാര്‍ പറയുന്നുണ്ട്. ഇതാണ് പുലിവാലായത്.