മാളികപ്പുറം' സിനിമയുടെ വിജയം ആഘോഷിച്ച് ഉണ്ണി മുകുന്ദന്‍. നടന്‍ മമ്മൂട്ടിയാണ് ചടങ്ങില്‍ അതിഥിയായെത്തിയത്. ആഘോഷചടങ്ങിലേക്ക് സ്വീകരിക്കാനെത്തിയ ഉണ്ണി മുകുന്ദനോട് "ഉണ്ണി സാറെ, ഇനി കണ്ടാലൊക്കെ അറിയുവോ" എന്ന് മമ്മൂട്ടി തമാശയായി ചോദിച്ചു.

പടം സൂപ്പര്‍ ഹിറ്റായതിന് മമ്മൂട്ടിയോട് നന്ദി പറയുന്നുവെന്ന് ഉണ്ണി മുകുന്ദന്‍ പറഞ്ഞു. "എന്നെ സംബന്ധിച്ച് വളരെ വലിയൊരു ദിവസമാണ് ഇന്ന്. വേറെ ഒന്നും കൊണ്ടല്ല. എന്റെ സിനിമാ ജീവിതത്തിലെ ഏറ്റവും വലിയ ഹിറ്റ് മാളികപ്പുറം സംഭവിച്ചിരിക്കുകയാണ്. ആന്റോ ചേട്ടന് ഒരുപാട് നന്ദി ഉണ്ട്. എല്ലാവരോടും നന്ദി. പ്രത്യേകിച്ച് മമ്മൂക്കയോട്. മാളികപ്പുറം എന്താണ് എന്ന് മലയാളി സമൂഹത്തിന് പറഞ്ഞ് കൊടുത്തത് മമ്മൂക്കയാണ്. ആ ഐശ്വര്യം എന്റെ കൂടെ മുന്നോട്ടും ഉണ്ടായി. 2023ലെ ആദ്യ ഹിറ്റായി സിനിമ മാറി."- ഉണ്ണി മുകുന്ദന്‍ പറഞ്ഞു.

വിഷ്ണു ശശി ശങ്കറിന്റെ സംവിധാനത്തില്‍ ഉണ്ണി മുകുന്ദന്‍ നായകനായെത്തിയ ഏറ്റവും പുതിയ ചിത്രമാണ് 'മാളികപ്പുറം'. ശബരിമല കയറി അയ്യപ്പനെ കാണുവാനാഗ്രഹിക്കുന്ന ഒരു പെണ്‍കുട്ടിയുടെ യാത്രയാണ് ചിത്രത്തിന്റെ ഇതിവൃത്തം. മമ്മൂട്ടിയുടെ വിവരണത്തോടെയാണ് ചിത്രം ആരംഭിക്കുന്നത്.