ഷാര്‍ജയില്‍ നിന്ന് കൊച്ചിയിലേക്ക് വന്ന എയര്‍ ഇന്ത്യ എക്സ്പ്രസ് വിമാനം കൊച്ചി രാജ്യാന്തര വിമാനത്താവളത്തില്‍ അടിയന്തിര ലാന്‍ഡിംഗ് നടത്തി
ഹൈഡ്രോളിക് സംവിധാനം തകരാറിലായതിനെ തുടര്‍ന്നാണ് ലാന്‍ഡിംഗ് നടത്തിയത്. ഇന്നലെ രാത്രി 8.26നായിരുന്നു സംഭവം. 193 യാത്രക്കാരും ആറ് ജീവനക്കാരും വിമാനത്തിലുണ്ടായിരുന്നു.

നെടുമ്പാശേരിയില്‍ ഇറങ്ങാനായി മിനിറ്റുകള്‍ മാത്രം ബാക്കിയുള്ളപ്പോഴാണ് സാങ്കേതിക തകരാര്‍ പൈലറ്റിന്റെ ശ്രദ്ധയില്‍പ്പെട്ടത്. ഇതോടെ അടിയന്തര ലാന്‍ഡിംഗിന് അനുമതി തേടുകയായിരുന്നു.

രാത്രി 8.04ന് വിമാനത്താവളത്തില്‍ പൂര്‍ണ്ണ അടിയന്തരാവസ്ഥ പ്രഖ്യാപിച്ചു. ഏത് സാഹചര്യവും നേരിടാന്‍ ഫയര്‍ഫോഴ്സും ആംബുലന്‍സുകളും സജ്ജമാക്കി. ആലുവ, അങ്കമാലി എന്നിവിടങ്ങളിലെ സ്വകാര്യ ആശുപത്രികള്‍ക്കും സന്ദേശം നല്‍കി. വിമാനം പൂര്‍ണ്ണ സുരക്ഷിതമായി നിലത്തിറങ്ങി. 8.36 ന് അടിയന്തരാവസ്ഥ പിന്‍വലിച്ച് വിമാനത്താവളത്തിന്റെ പ്രവര്‍ത്തനം സാധാരണ നിലയിലാാക്കുകയും ചെയ്തു.