പ്രതിപക്ഷത്താകുമ്പോൾ ഇടതുവലത് പാർട്ടികൾ ചടങ്ങ് പോലെ മറക്കാതെ നടത്തുന്ന ഒന്നാണ് സമരങ്ങൾ. അത് അക്രമാസക്തമാകുന്നതും പോലീസ് ലാത്തി വീശുന്നതും നമുക്കറിയാവുന്നതാണ്. എന്നിരുന്നാലും ഒട്ടുമിക്ക സമരങ്ങളും ഏകദേശം ഒത്തുകളിയാണെന്നുള്ള സത്യാവസ്ഥയും ഏവർക്കും അറിയാവുന്നതാണ്. അപ്പോഴാണ് പാർട്ടിയേയും നേതാക്കളേയും ഞെട്ടിച്ച് കൊണ്ട് ആലപ്പുഴ എസ്പി ചൈത്ര തെരേസ ജോൺ രം​ഗത്ത് എത്തിയത്.

അക്ഷരാർത്ഥത്തിൽ പേടിച്ചരണ്ട് ഒറ്റ രാത്രി കൊണ്ട് ഇനി സമരം പോലും വേണ്ടെന്നുവരെ ചില നേതാക്കൾ മനസ്സിൽ കരുതിയെന്നാണ് ഇപ്പോൾ അഭ്യൂഹങ്ങൾ പ്രചരിക്കുന്നത്. അത്തരം ഒരു മുട്ടൻ പണിയാണ് അവർക്ക് കൊടുത്തത്. ആലപ്പുഴയിലെ കോൺഗ്രസ് പ്രവർത്തകരാണ് ഈ അമളിയിൽ ചെന്നു ചാടിയത്.

പൊതുമുതൽ നശിപ്പിച്ചുള്ള അക്രമങ്ങൾ പലയിടത്തും നടക്കുന്നുണ്ട്. പക്ഷേ രാഷ്ട്രീയ പാർട്ടികൾ ആയതുകൊണ്ട് പോലീസിനും തട്ടിക്കയറാൻ മുട്ടിടിക്കുമായിരുന്നു. എന്നാൽ ആലപ്പുഴയിലെ കോൺഗ്രസ് പ്രവർത്തകർ വലിയ വില നൽകേണ്ടിവന്നിരിക്കുകയാണ്. കഴിഞ്ഞദിവസം കളക്‌ടറേറ്റ് മാർച്ച് നടത്തിയ യൂത്ത് കോൺഗ്രസ് പ്രവർത്തകരുടെ ആവേശം ആലപ്പുഴയിലെ കോൺഗ്രസിനാകെത്തന്നെ തലവേദനയായി മാറി.

പെൺകുട്ടികളടക്കം പങ്കെടുത്ത യൂത്ത് കോൺഗ്രസിന്റെ ശക്തമായ സമരമായിരുന്നു കഴിഞ്ഞ ദിവസത്തെ കളക്‌ടറേ‌റ്റ് മാർച്ച്. പൊലീസ് ബാരിക്കേഡ് നിരത്തി വടം കെട്ടി എപ്പോഴത്തേയും പോലെ പ്രവർത്തകരെ തടഞ്ഞു. എന്നാൽ സമരാവേശം മൂത്തപ്പോൾ യൂത്ത് കോൺഗ്രസ് പ്രവർത്തകർ ഇവിടെ നിരത്തിയ അഞ്ച് ബാരിക്കേഡുകളും ഒരു വടവും തകർത്തു.

അക്രമാസക്തരായ കോൺ​ഗ്രസ് പ്രവർത്തകരെ അറസ്‌റ്റ് ചെയ്‌ത സൗത്ത് സ്‌റ്റേഷൻ പൊലീസ്, പിന്നീട് ഇവരെ ഗതാഗതം തടസപ്പെടുത്തി എന്ന കുറ്റം മാത്രം ചുമത്തിയ ശേഷം ജാമ്യത്തിൽ വിട്ടയച്ചു. ഇതിന് പിന്നാലെയാണ് രസകരമായ സംഭവം അരങ്ങേറിയത്. ഈ വിഷയം അറിഞ്ഞ് ജില്ലയിലെ പൊലീസ് മേധാവി ചൈത്ര തെരേസ ജോൺ സ്‌റ്റേഷൻ ഇൻസ്‌പെക്‌ടറെ വിളിച്ച് അറസ്‌റ്റിലായവരെ വെറുതെ വിടരുതെന്ന് ആവശ്യപ്പെട്ടു, കൂടാതെ ബാരിക്കേഡ് തകർത്തവരിൽ നിന്നും നന്നാക്കാൻ 65,000 രൂപയും വടത്തിന് 5000 രൂപയും ഈടാക്കണമെന്നും ഉത്തരവിട്ടു. അപ്പോഴാണ് കളി കാര്യമായത്.

ഇതോടെ പൊലീസ് പ്രവർത്തകർ തകർത്ത ബാരിക്കേഡുമായി ഡിസിസി ഓഫീസിന് മുന്നിലെത്തി. ബാരിക്കേഡ് നന്നാക്കിത്തന്നില്ലെങ്കിൽ പൊതുമുതൽ നശിപ്പിച്ചതിന് കേസെടുക്കുമെന്ന് മുന്നറിയിപ്പ് കൊടുത്തു. പൊലീസിന്റെ അറിയിപ്പ് കേട്ടതോടെ സ്ഥലത്തെ പ്രമുഖരടക്കം ഓടിയെത്തുകയായിരുന്നു.

എ. എ. ഷുക്കൂറടക്കം കെപിസിസി നേതാക്കൾ വരെ നിമിഷങ്ങൾക്കുള്ളിൽ ഓഫീസിലെത്തി ബാരിക്കേഡ് നന്നാക്കി തരാമെന്ന് പൊലീസിന് വാക്ക് നൽകി തല്‍ക്കാലം തടിയൂരിയിരിക്കുകയാണ് നേതാക്കളും യൂത്ത് കോണ്‍ഗ്രസ് പ്രവര്‍ത്തകരും. പുതിയ വടം രാത്രിക്ക് രാത്രി തന്നെ നല്ല കുട്ടികളെ പോലെ വാങ്ങിക്കൊടുത്തു എന്നാണ് അറിയാൻ കഴിയുന്നത്. ബാരിക്കേഡ് നന്നാക്കാനുള്ള പണിക്കാ‌ർ ഇന്ന് ഡിസിസി ഓഫീസിലെത്തും എന്നും ഉറപ്പ് നൽകിയാണ് പോലീസ് പിരിഞ്ഞ് പോയത്. ഇവർ ഇന്നുതന്നെ പണിതുടങ്ങിയിട്ടുണ്ട് എന്നാണ് ലഭിക്കുന്ന സൂചന.

ഇന്ധന വിലവര്‍ധനക്കെതിരെയായിരുന്നു യൂത്ത് കോണ്‍ഗ്രസിന്‍റെ സമരം. ജലപീരങ്കിയെ പോലും അവഗണിച്ച് പെണ്‍കുട്ടികള്‍ ഉള്‍പ്പെടെ ശക്തമായ ചെറുത്ത് നില്‍പ്പാണ് കഴിഞ്ഞ ദിവസം നടന്ന സമരത്തില്‍ നടത്തിയത്. സാധാരണ ബാരിക്കേഡുകള്‍ ചാടിക്കടക്കുന്നതാണ് സമരക്കാകരുടെ പതിവ് സമര രീതി.

പക്ഷെ ആലപ്പുഴയിലെ യൂത്ത് കോണ്‍ഗ്രസുകാര് ഇന്നലെ ചെയ്തത് ബാരിക്കേഡുകള്‍ തന്നെ തകര്‍ത്ത് അപ്പുറത്തേക്കെത്താനായിരുന്നു. ആക്രമണത്തില്‍ പൊലീസിന്‍റെ അഞ്ച് ബാരിക്കേഡുകളാണ് തകര്‍ന്നത്. ഒപ്പം ഒരു വടവും നശിച്ചു. പിന്നാലെ എസ്പിയുടെ വിളി എത്തിയതോടെയാണ് ട്വിസ്റ്റ് നടന്നത്. എന്നാൽ ഇതിന് ശേഷം നേതാക്കൾ ചില അടക്കം പറച്ചിലും തുടങ്ങിയിട്ടുണ്ട്.

ബാരിക്കേഡിന് എസ് പി പറഞ്ഞത് പോലെ 65, 000 രൂപയൊന്നും വേണ്ടെന്നാണ് ഡിസിസി പറയുന്നത്. വെറും പതിനായിരം രൂപക്ക് ബാരിക്കേഡുകള്‍ നന്നാക്കാമെന്നാണ് ജോലിക്കാരുടെ ഉറപ്പ്. എന്തായാലും എത്ര രൂപ ചെലവായാലും ബാരിക്കേഡുകള്‍ നന്നാക്കി പൊലീസിനെ തിരികെ ഏല്‍പ്പിച്ച് കേസില്‍ നിന്ന് തടിയൂരാനാണ് കോണ്‍ഗ്രസ് പ്രവര്‍ത്തകരുടെ തീരുമാനം.

എന്നാൽ ഈ സംഭവത്തിന് ശേഷമാണ് വിഷയത്തിൽ ഇടപെട്ട് എസ്പി ചൈത്ര തെരേസ ജോണ്‍ ആരാണ് എന്നതിനെ പറ്റി അന്വേഷിക്കുന്നത്. അട്ടപ്പാടിയിൽ മാവോയിസ്റ്റുകൾക്കെതിരായ ഓപ്പറേഷന് നേതൃത്വം നൽകിയത് പെൺപുലിയാണ് ഇവർ. ഏത് ഘോര വനത്തിലും കയറി ഏതുകൊലകൊമ്പനേയും പിടികൂടുന്ന തന്റേടിയായി പൊലീസ് ഓഫീസർ.

കസ്റ്റംസിലും ഡി.ആര്‍.ഐയിലും ദീര്‍ഘകാലം പ്രവര്‍ത്തിച്ച ജോണ്‍ ജോസഫ് എന്നൊരു ഉദ്യോ​ഗസ്ഥനുണ്ടായിരുന്നു. ഡി.ആര്‍.ഐയുടെ രാജ്യത്തെ ഉയര്‍ന്ന ഉദ്യോഗസ്ഥനായും പ്രവര്‍ത്തിച്ചിട്ടുണ്ട്. ഒരു കാലത്ത് സ്വര്‍ണക്കടത്തുകാരുടെ പേടി സ്വപ്നമായിരുന്നു അദ്ദേഹം. 1983 ഐ.ആര്‍.എസ് ബാച്ചുകാരനായ ഡോ.ജോണ്‍ ജോസഫിന്‍റെ മകളാണ് തിരുവനന്തപുരം സി.പി.എം ഓഫിസില്‍ പോലും റെയ്ഡിന് കയറി മുഖ്യമന്ത്രിയെ വരെ വിറപ്പിച്ച ഐ.പി.എസ് ഉദ്യോഗസ്ഥ ചൈത്ര തെരേസ ജോണ്‍. കോഴിക്കോട് ഈസ്റ്റ്ഹില്‍ സ്വദേശി കൂടിയാണ്.

കേന്ദ്രീയ വിദ്യാലയത്തിലായിരുന്നു സ്കൂള്‍ പഠനം. കരാട്ടെയില്‍ ബ്ലാക് ബെല്‍റ്റ് നേടിയിട്ടുണ്ട് ചൈത്ര. 2016 ഐ.പി.എസ്. ബാച്ചുകാരി. സിവില്‍ സര്‍വീസില്‍ 111 ആയിരുന്നു റാങ്ക്. ഐ.പി.എസ്. ലിസ്റ്റില്‍ ഒന്നാമതായിരുന്നു. കേരള കാഡര്‍ ഉദ്യോഗസ്ഥ. വയനാട്ടിലായിരുന്നു ട്രെയിനിങ്ങിന്‍റെ തുടക്കം. പിന്നെ, തലശേരി എ.എസ്.പിയായി. ക്രമസമാധാന ചുമതലയില്‍ മികച്ച പ്രകടനം കാഴ്ചവച്ച വനിത ഉദ്യോഗസ്ഥയാണ്.

പുതിയ തലമുറയിലെ വനിത ഐ.പി.എസ് ഉദ്യോഗസ്ഥര്‍ക്കിടയില്‍ നല്ല പ്രകടനം കാഴ്ചവച്ച യുവഉദ്യോഗസ്ഥ എന്ന ഖ്യാതിയും. പ്രത്യേകിച്ച് സിപിഎമ്മിന്റെ കണ്ണിലെ കരടും. പൊലീസ് സ്റ്റേഷൻ ആക്രമിച്ച പ്രതികളെ തേടി സിപിഎം തിരുവനന്തപുരം ജില്ലാ കമ്മിറ്റി ഓഫീസിൽ ഡിസിപി ചൈത്ര തെരേസ ജോണിന്റെ നേതൃത്വത്തിൽ പൊലീസ് സംഘം റെയ്ഡ് നടത്തിയെന്ന് വാർത്ത പുറത്തുവന്നിരുന്നു.

സിപിഎം ഭരിക്കുമ്പോൾ പൊലീസ് സ്റ്റേഷൻ ഭരിക്കുന്നത് സഖാക്കളാണെന്ന ആക്ഷേപം നിലനിൽക്കെ തന്നെയാണ് മുഖ്യമന്ത്രിയുടെ മൂക്കിന് താഴെയുള്ള സിപിഎം ഓഫീസിൽ പൊലീസ് പരിശോധന നടന്നത്. അക്രമികളെ പിടിക്കാൻ വേണ്ടി ചൈത്ര നടത്തി ശ്രമം പരാജയപ്പെട്ടത് കൂടെ ഒറ്റുകാർ ഉണ്ടായിരുന്നതു കൊണ്ടാണ്.

ഈ സംഭവത്തിന്റെ പേരിൽ മുഖ്യമന്ത്രി നേരിട്ട് വിളിപ്പിക്കുകയും ഡിജിപി വിശദീകരണം തേടുകയും ചെയ്തതോടെ സൈബർ ലോകത്തിന്റെ പിന്തുണ ഈ കോഴിക്കോട്ടുകാരിയായ ഐപിഎസുകാരിക്ക് ലഭിച്ചു. ചൈത്രക്കെതിരെ നടപടി വേണമെന്ന് സിപിഎം ആവശ്യപ്പെട്ടിരുന്നുവെങ്കിലും ചൈത്രക്ക് അനുകൂലമായി അന്വേഷണ റിപ്പോർട്ട് വന്ന സാഹചര്യത്തിൽ നടപടി മാറ്റി വയ്ക്കുകയായിരുന്നു. അങ്ങനെ താരമായ പൊലീസ് ഉദ്യോഗസ്ഥയാണ് ചൈത്ര. ആരോടും കോംപ്രമൈസ് ചെയ്യുന്ന പ്രകൃതക്കാരില്ല തെരേസ.