തീ അല്‍പ്പമൊന്ന് കെട്ടപ്പോള്‍ ബ്രഹ്മപുരത്തേക്ക് കെട്ടിയെടുത്തിട്ടുണ്ട് മന്ത്രിമാര്‍. ബ്രഹ്മപുരത്തേക്കാല്‍ വലിയ പുകച്ചിലില്‍ നില്‍ക്കുകയാണല്ലോ സര്‍ക്കാരും പാര്‍ട്ടിയും. ആ പുക ശമിപ്പിക്കാനുള്ള ഓട്ടത്തില്‍ ബ്രഹ്മപുരത്തേക്ക് തിരിഞ്ഞ് നോക്കിയിട്ടേയില്ല. ഇനിയും വൈകിയാല്‍ കൊച്ചിക്കാര്‍ പഞ്ഞിക്കിടും എന്നുള്ളത് കൊണ്ട് രണ്ട് മന്ത്രിമാരെ കൊച്ചിക്ക് വിട്ടത്. വന്നപാടെ പ്രഹസനങ്ങള്‍ തുടങ്ങിയിട്ടുണ്ട്. ബ്രഹ്മപുരത്തേക്ക് ഇനി പ്ലാസ്റ്റിക് മാലിന്യങ്ങള്‍ അനുവദിക്കില്ലെന്ന് മന്ത്രിമാര്‍ അറിയിച്ചു. വലിയ കാര്യമായിപ്പോയി. ഇനി പ്ലാസ്റ്റിക് മാലിന്യങ്ങള്‍ അനുവദിക്കില്ലെന്ന തള്ള് കതിരിന്മേല്‍ വളം വെക്കല്‍ മാത്രം. അവിടെ വന്‍മല പോലെ കിടക്കുന്നതില്‍ ഏറിയ പങ്കും പ്ലാസ്റ്റിക് മാലിന്യമാണ്. അത് നിര്‍മ്മാര്‍ജ്ജനം ചെയ്യാന്‍ എന്താണ് വഴിയെന്ന് ആദ്യം കണ്ടുപിടിക്ക്. കൂട്ടത്തിലുള്ള നേതാവിന്റെ മരുമകന്റെ കമ്പനിക്ക് കരാര്‍ കൊടുത്തപ്പോഴും, ഈ കമ്പനി ഗുരുതര വീഴ്ച വരുത്തിയപ്പോഴും ആ വിവരങ്ങളെല്ലാം പൂഴ്ത്തി തട്ടിപ്പിന് കൂട്ടുനിന്നവരാണ് ഇപ്പോള്‍ പ്രഹസനം കാണിക്കുന്നത്.

മന്ത്രിമാരായ എം.ബി. രാജേഷും പി. രാജീവുമാണ് ബ്രഹ്മപുരം മാലിന്യ പ്ലാന്റ് സന്ദര്‍ശിച്ചത്. തീയണയ്ക്കാനുള്ള പ്രവര്‍ത്തനങ്ങള്‍ക്ക് നേതൃത്വം നല്‍കുന്ന ഉദ്യോഗസ്ഥരുമായി സംസാരിച്ച് പുരോഗതി വിലയിരുത്തി. കൊച്ചി ശ്വാസംമുട്ടി കഴിയാന്‍ തുടങ്ങിയിട്ട് 9 ദിവസങ്ങളായ്. ഇപ്പോഴാണ് അവിടേക്ക് തിരിഞ്ഞ് നോക്കാന്‍ മന്ത്രിമാര്‍ക്ക് മനസ്സ് തോന്നിയത്. മുഖ്യമന്ത്രി പിന്നെ അവിടേക്ക് കണ്ണോടിക്കുന്നത് പോലുമില്ല. കുടുംബ സമാധാനം നഷ്ടപ്പെട്ടിരിക്കുന്ന മുഖ്യമന്ത്രിയ്ക്ക് എന്ത് ബ്രഹ്മപുരം. അഴിമതി ഒതുക്കാനുള്ള ഓട്ടത്തിനിടയില്‍ ജനങ്ങളെ നോക്കാന്‍ സര്‍ക്കാരിന് സമയമില്ല. ഈ സര്‍ക്കാരിന് കീഴില്‍ എവിടെയാണ് ജനങ്ങള്‍ സുരക്ഷിതര്‍. ബ്രഹ്മപുരം വിഷയത്തില്‍ പ്രതിക്കൂട്ടില്‍ നില്‍ക്കുന്നത് സിപിഎമ്മുകാരായത് കൊണ്ട് ഉത്തരംമുട്ടി നില്‍ക്കുകയാണ് സര്‍ക്കാരിന്. ന്യായീകരണം ഒന്നും ഏല്‍ക്കുന്നതുമില്ല. കൊച്ചിക്കാര്‍ക്ക് പൊറുതിമുട്ടി കഴിഞ്ഞു. ജനരോഷം ഇളകിക്കഴിഞ്ഞു. എത്രനാള്‍ സഹിക്കണം ഈ പുകയെന്ന് കൊച്ചിക്കാര്‍ സര്‍ക്കാരിന് നേരെ പൊട്ടിത്തെറിക്കുന്നു.

ബ്രഹ്മപുരത്തുനിന്ന് കൊച്ചി നഗരത്തിലടക്കം പകരുന്ന പുക നിയന്ത്രിക്കാന്‍ എത്രനാള്‍ വേണമെന്ന ഹൈക്കോടതിയുടെ ചോദ്യത്തിന് വ്യക്തമായ ഉത്തരം നല്‍കാനാകാതെ സര്‍ക്കാര്‍ തലകുനിച്ച് നില്‍ക്കുകയാണ്. രണ്ടുദിവസംകൂടി വേണമെന്നാണ് അഗ്‌നിരക്ഷാസേനാ ഉദ്യോഗസ്ഥര്‍ പറയുന്നതെന്ന് വിശദീകരിച്ച കളക്ടര്‍ക്ക് ഇക്കാര്യത്തില്‍ ഉറപ്പുനല്‍കാനായില്ല. പ്രശ്‌നപരിഹാരത്തിനായുള്ള ഫലപ്രദമായ നടപടിയുണ്ടായില്ലെങ്കില്‍ സ്വരം കടുപ്പിക്കേണ്ടിവരുമെന്നും കോടതി മുന്നറിയിപ്പ് നല്‍കി. ദേശീയ ഹരിത ട്രിബ്യൂണലില്‍ മുമ്പ് കോര്‍പ്പറേഷന്‍ നല്‍കിയ ഉറപ്പുകളില്‍ 30 ശതമാനമെങ്കിലും നടപ്പാക്കിയിരുന്നെങ്കില്‍ ഇപ്പോഴത്തെ ദുരന്തം ഒഴിവാക്കാന്‍ കഴിയുമായിരുന്നു. ഉത്തരവാദികളായ ഉദ്യോഗസ്ഥര്‍ക്കെതിരേ പ്രോസിക്യൂഷന്‍ നടപടിക്ക് ഉത്തരവിടുമെന്നും കോടതി വാക്കാല്‍ അഭിപ്രായപ്പെട്ടു. സ്ഥിതി നേരില്‍ക്കണ്ടുപഠിച്ച് റിപ്പോര്‍ട്ട് നല്‍കാനായി നിരീക്ഷണസമിതിക്കും കോടതി രൂപംനല്‍കി.

കൊച്ചിയിലെ പുകച്ചുരുള്‍ ടൂറിസത്തിന് മേലെ പടര്‍ന്ന് കഴിഞ്ഞു. കൊച്ചിയിലെ വിഷപ്പുക വിദേശത്തുപോലും വാര്‍ത്തയായപ്പോള്‍ നഗരത്തിലെ ഹോട്ടലുകളിലെ ബുക്കിങ് വന്‍തോതില്‍ കുറഞ്ഞു. സീസണിന്റെ അവസാന മാസമായ മാര്‍ച്ചില്‍ ടൂറിസ്റ്റുകളുടെ വരവ് കൂടാറുണ്ട്. പക്ഷേ, ബ്രഹ്മപുരം ആ പതിവിനെ പുകച്ചുകളഞ്ഞു. നേരത്തേ ബുക്ക് ചെയ്തവര്‍ പണം നഷ്ടപ്പെടുന്നത് ഒഴിവാക്കാന്‍ വേണ്ടി വരുന്നുണ്ടെങ്കിലും പലരും ഹോട്ടലുകള്‍ക്കുള്ളില്‍ തന്നെ കഴിച്ചുകൂട്ടുകയാണെന്ന് ടൂര്‍ ഓപ്പറേറ്റര്‍മാര്‍ പറയുന്നു. നിശ്ചയിച്ച പരിപാടികള്‍ ഒഴിവാക്കേണ്ടി വന്നതോടെ അസ്വസ്ഥരായ അവരുടെ അതൃപ്തി ഒഴിവാക്കുകയാണ് ഇപ്പോള്‍ ഹോട്ടല്‍ ജീവനക്കാരുടെ പ്രധാന ജോലി. ടൂറിസം വകുപ്പ് ഉത്തരവാദിത്വ ടൂറിസത്തെക്കുറിച്ച് കുമരകത്ത് സംഘടിപ്പിച്ച സമ്മേളനത്തില്‍ പങ്കെടുക്കാന്‍ മൂന്നു ദിവസം മുന്‍പ് കൊച്ചി വിമാനത്താവളത്തിലിറങ്ങിയ തായ്വാന്‍ സംഘം നഗരത്തിലേക്ക് വരാതെ ഗുരുവായൂരിലാണ് താമസിച്ചത്. അവിടെ നിന്നാണ് അവര്‍ കുമരകത്തേക്കു പോയത്. കൊച്ചിയിലെ വിഷപ്പുക വിദേശ വിനോദസഞ്ചാരികള്‍ ഗുരുതര പ്രശ്‌നമായാണ് കാണുന്നത്.