ബിജെപി നല്‍കുന്ന മുന്നൂറ് രൂപ വാങ്ങാന്‍ ക്രൈസ്തവരുടെ ഉടലില്‍ തല ഉണ്ടായിട്ട് വേണ്ടേയെന്ന ജലീലിന്റെ വിവാദ പോസ്റ്റ് ആളിക്കത്തുന്നു. സോഷ്യല്‍മീഡിയ കൊച്ചാപ്പയെ എടുത്തുടുത്തു. ബിജെപി നേതാക്കളും എടുത്ത് പഞ്ഞിക്കിട്ടു. സംഭവം പുകയുന്നതോടെ സുരേന്ദ്രനോട് കൊമ്പുകോര്‍ത്ത് ജലീല്‍. വീണ്ടും ഒരു പോസ്റ്റ് വെച്ചലക്കിയിരിക്കുകയാണ് ജലീല്‍. ഇതിലും രക്ഷയില്ല ജലീല്‍ വീണ്ടും എയറില്‍. കള്ളക്കഥ മെനഞ്ഞ് ഭിന്നിപ്പിക്കാന്‍ സുരേന്ദ്രനാവില്ല എന്നാണ് പോസ്റ്റിന്റെ തലക്കെട്ട്. പക്ഷെ ജലീല്‍ തൊടുത്ത ആരോപണങ്ങള്‍ ബൂമറാങ് പോലെ പിണറായി സര്‍ക്കാരിനിട്ട് കിട്ടി.

ജലീലിന്റെ പോസ്റ്റ് ഇങ്ങനെ........

ന്യൂനപക്ഷ ജനവിഭാഗങ്ങള്‍ക്ക് വേണ്ടത് അവരുടെ ജീവിനും സ്വത്തിനും സംരക്ഷണമാണ്. അത് നല്‍കാന്‍ മോദി സര്‍ക്കാരിന് കഴിഞ്ഞിട്ടില്ല. ഗുജറാത്ത് കലാപം മുതല്‍ നസീം ഖുറേഷി വരെ വര്‍ഗ്ഗീയ ചേരിതിരിവില്‍ ജീവന്‍ നഷ്ടപ്പെട്ട ഹതഭാഗ്യരുടെ പട്ടിക ഏറെ നീണ്ടതാണ്. ആസ്‌ട്രേലിയക്കാരായ ക്രൈസ്തവ പുരോഹിതന്‍ ഗ്രഹാം സ്റ്റെയിന്‍സും എട്ടും പൊട്ടും തിരിയാത്ത അദ്ദേഹത്തിന്റെ രണ്ട് മക്കളും ചുട്ടെരിക്കപ്പെട്ടത് ഇന്നും ഭീതിപ്പെടുത്തുന്ന ഓര്‍മ്മയാണ്. ബാബരി മസ്ജിദ് ഉള്‍പ്പടെ നിരവധി ചര്‍ച്ചുകളും പള്ളികളും തകര്‍ക്കപ്പെട്ട സംഭവങ്ങള്‍ ഇതോടൊപ്പം ചേര്‍ത്ത് വായിച്ചാലേ ചിത്രം പൂര്‍ണ്ണമാകൂ. BJP നല്‍കുന്ന ആനുകൂല്യങ്ങള്‍ ന്യൂനപക്ഷങ്ങള്‍ക്ക് വാങ്ങാന്‍ അവരുടെ ഉടലില്‍ തലയുണ്ടായാലല്ലേ കഴിയൂ. നിര്‍ഭയം ജീവിക്കാനുള്ള അവകാശമാണ് മത ന്യൂനപക്ഷങ്ങള്‍ക്ക് വേണ്ടത്. ഓരോ ദിവസം ഉറക്കമുണരുമ്പോഴും തല തപ്പിനോക്കി അത് സ്ഥാനത്തുണ്ടെന്ന് ഉറപ്പ് വരുത്തേണ്ട സ്ഥിതി ഒരു നാട്ടിലും ഉണ്ടാകാന്‍ പാടില്ല. റബ്ബറിന് കിലോക്ക് 300 രൂപയാക്കിയത് കൊണ്ടോ നെല്ല് കിലോക്ക് 50 രൂപ നല്‍കിയത് കൊണ്ടോ മറ്റു കാര്‍ഷികോല്‍പ്പന്നങ്ങള്‍ക്ക് മോഹിപ്പിക്കുന്ന വില വാഗ്ദാനം ചെയ്തത് കൊണ്ടോ ന്യൂനപക്ഷങ്ങള്‍ അനുഭവിക്കുന്ന വര്‍ത്തമാന പ്രതിസന്ധിക്ക് പരിഹാരമാവില്ല. എഴുപതോളം ക്രൈസ്തവ സംഘടനകള്‍ ഡല്‍ഹിയില്‍ നടത്തിയ റാലിയില്‍ ഉയര്‍ത്തിയ ആവശ്യം സുരക്ഷിതമായി ജീവിക്കാനുള്ള സാഹചര്യം ഉണ്ടാകണമെന്നാണ്. അല്ലാതെ എല്ലാ കാര്‍ഷിക വിളകള്‍ക്കും മോഹ വില ഉറപ്പുവരുത്തണം എന്നല്ല.

ഒരു മൃഗത്തിന്റെ പേരില്‍ മനുഷ്യനെ കൊല്ലുന്ന നാട് ലോകത്ത് മറ്റെവിടെയെങ്കിലുമുണ്ടോ? കൊല്ലും കൊലയും തുടരുന്നെടത്തോളം അതേകുറിച്ച് പറഞ്ഞു കൊണ്ടിരിക്കും. അതൊരു പൗരന്റെ ധര്‍മ്മമാണ്. ഏതു സമയത്തും വേട്ടയാടപ്പെടുമെന്ന മാനസികാവസ്ഥയില്‍ നിന്ന് ന്യൂനപക്ഷങ്ങള്‍ക്ക് മുക്തി നല്‍കാനാണ് സുരേന്ദ്രന്റെ പാര്‍ട്ടി ശ്രമിക്കേണ്ടത്. ഇക്കാര്യം സൂചിപ്പിച്ചതിനാണ് ഞാന്‍ ക്രൈസ്തവ പുരോഹിതനെ കൊല്ലാന്‍ ആഹ്വാനം ചെയ്തു എന്ന മട്ടില്‍ അദ്ദേഹം പെരും നുണ എഴുന്നള്ളിച്ചത്. ഉത്തരേന്ത്യയില്‍ ഇത്തരം കള്ളപ്രചരണങ്ങളാണ് സംഘ പരിവാര്‍ സാധാരണ അഴിച്ചു വിടാറുള്ളത്. അസത്യം വിളമ്പി ഇല്ലാത്തത് ഉണ്ടെന്ന് വരുത്തി രാഷ്ട്രീയ ലക്ഷ്യം നേടാന്‍ നടത്തുന്ന ഹിന്ദി ബെല്‍റ്റിലെ വര്‍ഗീയ കുതന്ത്രം കേരളത്തില്‍ വിലപ്പോവില്ല. അതുകൊണ്ടൊന്നും ക്രൈസ്തവ സമുദായത്തിന്റെ വോട്ട് പെട്ടിയിലാക്കാമെന്ന് സുരേന്ദ്രന്‍ വ്യാമോഹിക്കേണ്ട. ഇതായിരുന്നു സുരേന്ദ്രന്റെ കുറിപ്പ്.

അല്ലെങ്കിലും കേരളത്തിന്റെ കാര്യം പറയുമ്പോള്‍ കൊച്ചാപ്പ ഉത്തരേന്ത്യയിലേക്ക് വിരല്‍ ചൂണ്ടും. ഇവിടെ റബ്ബറിന്റെ കാര്യമാണ് ജലീല്‍ പ്രശ്‌നം. ഈ സര്‍ക്കാര്‍ കാണിച്ച അനീതിക്കെതിരെ ക്രൈസ്തവ സഭ വിരല്‍ ചൂണ്ടി. അതോടെ തലശ്ശേരി രൂപത ബിഷപ്പ് ഇപ്പോള്‍ സിപിഎമ്മിന് വെറുക്കപ്പെട്ടവന്‍. ഇപ്പോഴും നിങ്ങള്‍ പറയുന്നത് വോട്ട് പെട്ടിയിലാക്കാമെന്ന് സുരേന്ദ്രന്‍ വ്യാമോഹിക്കേണ്ട എന്നാണ്. അല്ലാതെ മലയോര ജനതയുടെ കഷ്ടപ്പാടിനെക്കുറിച്ച് വാ തുറക്കുന്നില്ല. വോട്ടിന് മാത്രമല്ലെ ജലീലെ നിങ്ങളുടെ സര്‍ക്കാരും ക്രൈസ്തവരെ കാലാകാലങ്ങളായ് വാഗ്ദാനങ്ങള്‍ മാത്രം നല്‍കി പറ്റിക്കുന്നത്. പിന്നെ വര്‍ഗ്ഗീയതയുടെ കാര്യം സിപിഎം മിണ്ടരുത്. പത്ത് വോട്ടിന് എസ്ഡിപിഐ-പോപ്പുലര്‍ഫ്രണ്ട് സംഘത്തിന്റെ കൂട്ടുപിടിക്കുന്നവരാണ് വര്‍ഗ്ഗീയതയ്‌ക്കെതിരെ ഘോരഘോരം പ്രസംഗിക്കുന്നത്. അങ്ങനെ സോഷ്യല്‍മീഡിയ കൊച്ചാപ്പയെ കേറിമേഞ്ഞു.