വിവാദമായ പരീക്ഷയുടെ മാര്ക്ക് വിവരങ്ങള് നല്കണമെന്ന വിവരാവകാശ കമ്മിഷന്റെ ഉത്തരവില് അപ്പീല് നല്കുമെന്ന് പിഎസ്സി
സംസ്ഥാന ആസൂത്രണ ബോര്ഡിലെ ഇന്ഡസ്ട്രി ആന്ഡ് ഇന്ഫ്രാസ്ട്രക്ചര് വിഭാഗം ചീഫ് തസ്തികയിലേക്കു നടന്ന പൊതുപരീക്ഷയുടെ വിവരങ്ങള് ഉദ്യോഗാര്ഥിക്കു നല്കണമെന്ന വിവരാവകാശ കമ്മിഷന്റെ ഉത്തരവ് തള്ളി പിഎസ്സി. പരാതിക്കാരനായ കെ.ശ്യാം കൃഷ്ണനു നല്കിയ മറുപടിയിലാണ് റാങ്ക് പട്ടികയില് ഉള്പ്പെട്ടവരുടെ എഴുത്തു പരീക്ഷയുടെയും അഭിമുഖത്തിന്റെയും മാര്ക്ക് കൈമാറാന് കഴിയില്ലെന്ന് പിഎസ്സി അറിയിച്ചത്. ഏഴു ദിവസത്തിനുള്ളില് വിവരങ്ങള് നല്കണമെന്ന വിവരാവകാശ കമ്മിഷന് ഉത്തരവിനെതിരെ ഹൈക്കോടതിയില് അപ്പീല് സമര്പ്പിക്കാന് തീരുമാനിച്ചുവെന്നും പിഎസ്സി വ്യക്തമാക്കിയിട്ടുണ്ട്.
പരീക്ഷയുടെ മൂല്യനിര്ണയത്തില് പത്തു ചോദ്യങ്ങള്ക്ക് മാര്ക്കിട്ടിട്ടില്ലെന്നും വീഴ്ചയുണ്ടായെന്നും പിഎസ്സി പരീക്ഷാ കണ്ട്രോളര് നടത്തിയ പ്രാഥമിക അന്വേഷണത്തില് തെളിഞ്ഞിരുന്നു. ഇതേത്തുടര്ന്ന് ആഭ്യന്തര വിജിലന്സ് എസ്പിയെ തുടരന്വേഷണത്തിന് പിഎസ്സി തന്നെ നിയോഗിച്ചിരിക്കുകയാണ്. ഇതിനു പുറമേ സര്ക്കാര് പ്രഖ്യാപിച്ച െ്രെകംബ്രാഞ്ച് അന്വേഷണവും ആരംഭിച്ചിട്ടുണ്ട്. രേഖകള് ആവശ്യപ്പെട്ട് െ്രെകംബ്രാഞ്ച് സംഘം പിഎസ്സിക്കു കത്തു നല്കുകയും ചെയ്തു. ഇതിനിടയിലാണ് വിവരാവകാശ കമ്മിഷന് ഉത്തരവു പ്രകാരം ഉദ്യോഗാര്ഥിക്കു വിവരങ്ങള് നല്കാന് കഴിയില്ലെന്ന് പിഎസ്സി നിലപാടെടുത്തിരിക്കുന്നത്.
ഒന്നേകാല് ലക്ഷം രൂപ അടിസ്ഥാന ശമ്പളമുള്ള സംസ്ഥാന ആസൂത്രണ ബോര്ഡിലെ ഇന്ഡസ്ട്രി ആന്ഡ് ഇന്ഫ്രാസ്ട്രക്ചര് വിഭാഗം ചീഫ്, പേഴ്സ്പെക്ടീവ് പ്ലാനിങ് ഡിവിഷന് ചീഫ്, പ്ലാനിങ് കോഓര്ഡിനേഷന് ഡിവിഷന് ചീഫ് തസ്തികളിലേക്ക് നടന്നത് പൊതു പരീക്ഷ ആണെന്നും ഇതില് പേഴ്സ്പെക്ടീവ് പ്ലാനിങ് ഡിവിഷന് ചീഫ് തസ്തികയുടെ റാങ്ക് ലിസ്റ്റ് നിലവില് വന്നിട്ടില്ലെന്നും പിഎസ്സി മറുപടിയില് പറയുന്നു. തിരഞ്ഞെടുപ്പ് പ്രക്രിയ തുടരുന്ന സാഹചര്യത്തില് ഇന്ഡസ്ട്രി ആന്ഡ് ഇന്ഫ്രാസ്ട്രക്ചര് വിഭാഗം ചീഫ് തസ്തികയിലേക്കു നടന്ന പരീക്ഷയുടെ വിവരങ്ങള് കൈമാറാന് കഴിയില്ലെന്നാണ് പിഎസ്സി ന്യായവാദം ഉന്നയിച്ചിരിക്കുന്നത്.
2023 ജൂലൈ 13നു നടന്ന പൊതുപരീക്ഷയില് 228 പേരാണ് പങ്കെടുത്തത്. 2025 മേയ് 31നു റാങ്ക്പട്ടിക പ്രസിദ്ധീകരിച്ചു. പിറ്റേമാസം തന്നെ ഇന്ഡസ്ട്രി ആന്ഡ് ഇന്ഫ്രാസ്ട്രക്ചര് ചീഫ് ആയി ഒന്നാം റാങ്കുകാരന് അരുണ് ജെ.പ്രതാപിനെ നിയമിച്ചു. ഇദ്ദേഹം ഇടതു സര്വീസ് സംഘടനയുടെ സജീവ പ്രവര്ത്തകനായിരുന്നു. സിപിഎം നോമിനിയായി നിയമിക്കപ്പെട്ട പിഎസ്സി ചെയര്മാന് ഡോ.എം.ആര്.ബൈജുവും 2 അംഗങ്ങളുമാണ് ചുരുക്കപ്പട്ടികയില് ഉള്പ്പെട്ടവര്ക്കായി അഭിമുഖം നടത്തിയത്. മാര്ക്കില് സംശയം തോന്നിയ മൂന്നാം റാങ്കുകാരന് കെ.ശ്യാം കൃഷ്ണനാണ് ഉത്തരക്കടലാസിനായി പിഎസ്സിയെ സമീപിച്ചത്. ഡിജിറ്റല് മൂല്യനിര്ണയ രീതിയായ ഓണ് സ്ക്രീന് മാര്ക്കിങ്ങില് ഒന്നാം പേപ്പറിന്റെ ഇക്കണോമിക്സ് വിഷയത്തില് 10 മുതല് 18 വരെയുള്ള ചോദ്യങ്ങള് മാര്ക്കിടാതെ ഒഴിവാക്കിയതായി കണ്ടതോടെ പരാതി നല്കുകയായിരുന്നു.
തുടര്ന്ന് പിഎസ്സി നടത്തിയ പ്രാഥമിക പരിശോധനയില് ആകെ 228 ഉത്തരക്കടലാസുകളുടെ മൂല്യനിര്ണയമാണ് നടത്തേണ്ടിയിരുന്നത്. ഇതില് 177 എണ്ണത്തിന്റെ ഒമ്പതാം നമ്പര് ചോദ്യവും, മുഴുവന് ഉത്തരകടലാസുകളുടെയും (228 എണ്ണം) ക്രമനമ്പര് 10 മുതല് 18 വരെയുള്ള ചോദ്യങ്ങളും മൂല്യനിര്ണയത്തിനായി വിദഗ്ധര്ക്ക് അസൈന് ചെയ്തു നല്കുകയോ മൂല്യനിര്ണയം നടത്തുകയോ ചെയ്തതായി കാണുന്നില്ലെന്നു കണ്ടെത്തിയിരുന്നു. എന്നാല് ഇക്കാര്യങ്ങളില് തുടര്നടപടി സ്വീകരിക്കാതിരുന്ന പിഎസ്സി 3 റാങ്ക്പട്ടികകളും അന്തിമമായിട്ടില്ലെന്ന കാരണം പറഞ്ഞ് 3 വര്ഷമായിട്ടും പരീക്ഷയിലെ മാര്ക്ക് പ്രസിദ്ധീകരിച്ചിട്ടുമില്ല.
https://www.facebook.com/Malayalivartha
