കെ. കരുണാകരന്റെ മകനെ സംഘിയാക്കാന് ആരും മെനക്കെടണ്ട.... നുണപ്രചരണങ്ങള്ക്കെതിരെ രൂക്ഷമായി പ്രതികരിച്ച് കെ മുരളീധരന്
താന് ബിജെപിയില് ചേരുന്നുവെന്ന പ്രചരണങ്ങള്ക്കെതിരെ രൂക്ഷമായി പ്രതികരിച്ച് കെ മുരളീധരന് എം പി. ഏതൊരു പ്രതികൂല സാഹചര്യത്തിലും കോണ്ഗ്രസ് പ്രസ്ഥാനത്തില് അടിയുറച്ച് നില്ക്കുമെന്നും എത്ര അപമാനിക്കാന് ശ്രമിച്ചാലും കോണ്ഗ്രസിന്റെ സാധാരണ പ്രവര്ത്തകനായി തുടരുമെന്നും അദ്ദേഹം പറഞ്ഞു.
495 കിലോമീറ്റര് കേരളം മുഴുവന് രാഹുല് ഗാന്ധിയോടൊപ്പം നടന്നത് ബിജെപിയില് ചേരാനല്ല. കേരളത്തില് ബിജെപി അക്കൗണ്ട് തുറക്കണമെന്ന് ആഗ്രഹിക്കുന്നവരാണ് ഇത്തരം പ്രചരണങ്ങള്ക്ക് പിന്നിലെന്നും കെ മുരളീധരന് ഫേസ്ബുക്കിലെഴുതിയ കുറിപ്പില് പറഞ്ഞു.കോണ്ഗ്രസ് സംഘടിപ്പിച്ച വൈക്കം സത്യാഗ്രഹ ശതാബ്ദിയില് പ്രസംഗിക്കാന് ക്ഷണിക്കാത്തതില് കെ മുരളീധരന് നേതൃത്വത്തോട് അതൃപ്തി അറിയിച്ചിരുന്നു.
കെ മുരളീധരന്റെ കുറിപ്പ്....
നട്ടാല് കുരുക്കാത്ത പിതൃശൂന്യമായ നുണകളാണ് ചിലര് എനിക്കെതിരെ പ്രചരിപ്പിക്കുന്നത്. കേരളത്തില് ബി.ജെ.പി അക്കൗണ്ട് തുറക്കണമെന്ന് ആഗ്രഹിക്കുന്നവരാണ് ഇത്തരം പ്രചാരവേലകള്ക്ക് ചുക്കാന് പിടിക്കുന്നത്. 495 കിലോമീറ്റര് കേരളം മുഴുവന് ഞാന് കാല്നടയായി സഞ്ചരിച്ചത് ബി.ജെ.പിയില് ചേരാനല്ല. അദ്ദേഹത്തിന്റെ നേതൃത്വത്തോടുള്ള അചഞ്ചലമായ വിശ്വാസം കൊണ്ടാണ്. ഏതൊരു പ്രതികൂല സാഹചര്യത്തിലും കോണ്ഗ്രസ് പ്രസ്ഥാനത്തില് അടിയുറച്ചു നില്ക്കും.എത്ര അപമാനിക്കാന് ശ്രമിച്ചാലും കോണ്ഗ്രസിന്റെ സാധാരണ പ്രവര്ത്തകനായി തുടരും.
ത്രിപുരയിലെ സാഹചര്യം ചൂണ്ടിക്കാട്ടിയപ്പോള് കൂടുതല് ജാഗ്രത പാലിക്കണമെന്നാണ് ഞാന് പറഞ്ഞത്.അതിന്റെ പേരില് വേട്ടയാടാന് നോക്കണ്ട.സോഷ്യല് മീഡിയയില് പ്രചരിപ്പിക്കുന്നതു പോലെ ബിജെപിയില് ചേര്ന്നു ലഭിക്കുന്ന കേന്ദ്ര മന്ത്രിസ്ഥാനത്തെക്കാള് എനിക്ക് അഭിമാനം സാധാരണ കോണ്ഗ്രസ്സ് പ്രവര്ത്തകന് ആകുന്നതാണ് .അതു കൊണ്ട് കെ. കരുണാകരന്റെ മകനെ സംഘിയാക്കാന് ആരും മെനക്കെടണ്ട.മതേതര നിലപാടുകള് എന്നും ഹൃദയത്തോടെ ചേര്ത്തു പിടിച്ചിട്ടുണ്ട്. അത് കേരളത്തിലെ ജനങ്ങള്ക്കറിയാം.
https://www.facebook.com/Malayalivartha
