ക്രിസ്തുദേവ പീഡാനുഭവവും കുരിശുമരണവും സ്മരിച്ച് വിശ്വാസികള്‍ ദുഖഃവെള്ളി ആചരിച്ചു. തലസ്ഥാനത്ത് കുരിശിന്റെ വഴിയും ദുഃഖവെള്ളി ശുശ്രൂഷയും തിരുകര്‍മങ്ങളും നടന്നു. സഭാഅധ്യക്ഷന്മാരും പുരോഹിതരും കാര്‍മികത്വം വഹിച്ച ചടങ്ങുകളില്‍ പങ്കെടുത്തു.

ക്രിസ്തുവിന്റെ സ്‌നേഹത്തിന്റെയും ത്യാഗത്തിന്റെയും അനുസ്മരണമായിരുന്നു ദുഃഖവെള്ളി ആചരണം. ശിഷ്യന്മാരൊന്നിച്ചുള്ള അന്ത്യഅത്താഴവും കുരിശുമരണവും അനുസ്മരിച്ച് ദേവാലയങ്ങളില്‍ പ്രത്യേക ചടങ്ങുകള്‍ നടത്തുകയും ദു$ഖവെള്ളി ആചരണത്തിന്റെ ഭാഗമായി രാവിലെ മുതല്‍ പള്ളികളില്‍ വിശുദ്ധ കുര്‍ബാനയുടെ ആരാധന, കുരിശിന്റെ വഴി എന്നിവ നടന്നു.

ഉച്ചകഴിഞ്ഞ് പീഡാസഹന അനുസ്മരണവും കുരിശാരാധനയുമുണ്ടായിരുന്നു. വിശുദ്ധ വാരത്തിന് സമാപനം കുറിച്ച് ഉയിര്‍പ്പിന്റെ പ്രത്യാശയുമായി നാളെ ഈസ്റ്റര്‍ ആഘോഷിക്കും.

പീഡാസഹനത്തിന്റെയും കുരിശു മരണത്തിന്റെയും മുന്നോടിയായി യേശുക്രിസ്തു ഉപവാസമനുഷ്ഠിച്ചതിന്റെ ഓര്‍മയായി വിശ്വാസികള്‍ അനുഷ്ഠിച്ച വലിയ നോമ്പും പൂര്‍ത്തിയാകും. വിവിധ ദേവാലയങ്ങളില്‍ നടന്ന പെസഹായുടെ ശുശ്രൂഷകളില്‍ ആയിരക്കണക്കിന് വിശ്വാസികള്‍ പങ്കുചേര്‍ന്നു.
കുരിശില്‍ തറച്ച് ക്രിസ്തു ഉയിര്‍ത്തെഴുന്നേല്‍ക്കുന്നെന്ന വിശ്വാസമാണ് ഈസ്റ്ററിലൂടെ പുതുക്കുന്നത്. ക്രിസ്തുനാഥനെ ജറുസലേം നിവാസികള്‍ സ്വീകരിച്ചതിന്റെ ഓര്‍മ പുതുക്കി ഓശാന ഞായറില്‍ തുടങ്ങിയ വിശുദ്ധവാരം ഉയിര്‍പ്പ് പെരുന്നാളോടെയാണ് സമാപിക്കുക.