പ്രതിദിന വരുമാനം എട്ടുകോടിയില്‍ എത്തിക്കാന്‍ പദ്ധതി ലക്ഷ്യമിട്ട് കെഎസ്ആര്‍ടിസി... നിലവില്‍ ആറ്- ആറര കോടിയാണ് ശരാശരി വരുമാനം. ഫെബ്രുവരി, മാര്‍ച്ച് മാസങ്ങളില്‍ വരുമാനത്തില്‍ വലിയ കുറവാണുണ്ടായത്.

പരമാവധി ബസുകള്‍ ഓടിക്കുകയും പുതുതായി സ്വിഫ്റ്റിന് ലഭിച്ച 131 ബസ് ലാഭകരമായ റൂട്ടില്‍ സര്‍വീസ് നടത്തുന്നതിലൂടെയും ലക്ഷ്യം നേടാനായി കഴിയുമെന്നാണ് കണക്കുകൂട്ടുന്നത്.

5400 ബസ് ഉള്ളതില്‍ ശരാശരി 4250 ബസാണ് നിരത്തിലിറക്കുന്നത്. കട്ടപ്പുറത്ത് കിടക്കുന്നതില്‍ 70 ശതമാനവും ഓര്‍ഡിനറി ബസുകളാണ്. അവ അറ്റകുറ്റപ്പണി നടത്തി ലാഭകരമായ റൂട്ട് കണ്ടെത്തി ഓടിക്കും.

ഓരോ സോണിലുമുള്ള കട്ടപ്പുറത്തായ ബസുകളുടെ സ്ഥിതിവിവരങ്ങള്‍ ശേഖരിച്ചു. ബജറ്റില്‍ വര്‍ക്ക്ഷോപ്പുകളുടെ നവീകരണത്തിനും വാഹനങ്ങളുടെ നവീകരണത്തിനുമായി 100 കോടി വകയിരുത്തി.

അതേസമയം ബുധനാഴ്ചയോടെ പുതിയ മുഴുവന്‍ സൂപ്പര്‍ഫാസ്റ്റ് ബസുകളും നിരത്തിലിറക്കും. ഇതോടെ 297 ആയി സ്വിഫ്റ്റ് ബസുകളുടെ എണ്ണം കൂടും. സ്വിഫ്റ്റ് സര്‍വീസിലൂടെ ശരാശരി കിലോമീറ്ററിന് 18 രൂപ ലാഭമുണ്ടാകുന്നതായാണ് കണുകള്‍. പുതിയ സര്‍വീസുകളിലൂടെ മൂന്നുകോടി രൂപയെങ്കിലും കൂടുതലായി കണ്ടെത്താന്‍ കഴിയുമെന്നാണ് പ്രതീക്ഷ.