500 രൂപയുടെ കൈക്കൂലി കേസില് കൊല്ലം എഴുകോണ് സീനിയര് സിവില് പൊലീസ് ഓഫിസറെ വിജിലന്സ് കോടതി റിമാന്റ് ചെയ്തു
500 രൂപയുടെ കൈക്കൂലി കേസില് കൊല്ലം എഴുകോണ് സീനിയര് സിവില് പൊലീസ് ഓഫിസറെ തിരുവനന്തപുരം വിജിലന്സ് സ്പെഷ്യല് കോടതി റിമാന്റ് ചെയ്തു. വിജിലന്സ് ജഡ്ജി രാജകുമാരയാണ് പ്രതിയെ 14 ദിവസത്തേക്ക് ജില്ലാ ജയിലിലേക്ക് റിമാന്റ് ചെയ്തത്.
പൊലീസ് ക്ലിയറന്സ് സര്ട്ടിഫിക്കറ്റ് നല്കുന്നതിന് വേണ്ടി കൈക്കൂലി ആവശ്യപ്പെട്ട് വാങ്ങിയെന്നാണ് വിജിലന്സ് കേസ്. കൊല്ലം എഴുകോണ് പൊലീസ് സ്റ്റേഷനിലെ സീനിയര് സിവില് പൊലീസ് ഓഫിസര് പ്രദീപ് കുമാറിനെയാണ് കഴിഞ്ഞ ദിവസം വിജിലന്സ് പിടികൂടിയത്.'
പരാതിക്കാരനായ എഴുകോണ് സ്വദേശി കമ്ബോഡിയയില് പോകുന്നതിന് മെയ് 25 ന് ഓണ്ലൈനായി പാസ്പോര്ട്ട് ഓഫീസ് മുഖേന അപേക്ഷ സമര്പ്പിച്ചിരുന്നു. തുടര്ന്ന് ഓഫിസില് നിന്നും പരാതിക്കാരന് താമസിക്കുന്ന എഴുകോണ് പൊലീസ് സ്റ്റേഷനിലേക്ക് അപേക്ഷ പരിശോധിച്ച് എന്.ഐ.ഒ (നോണ് ഇന്വോള്മെന്റ് ഇന് ഒഫന്സ് ) ( അപേക്ഷകന് കേസില് ഉള്പ്പെട്ടിട്ടില്ല) എന്ന സര്ട്ടിഫിക്കറ്റ് ലഭ്യമാക്കാനായി അപേക്ഷ അയച്ചു കൊടുത്തു. പരിശോധിച്ച് റിപോര്ട്ട് നല്കാന് സിനിയര് സിവില് പൊലീസ് ഓഫിസറായ പ്രദീപിനെ സര്ക്കിള് ഇന്സ്പെക്ടര് ഏല്പിച്ചു.
തുടര്ന്ന് പ്രദീപ് മൂന്ന് ദിവസങ്ങള്ക്ക് മുന്പ് പരാതിക്കാരന്റെ വീട്ടിലെത്തി സര്ട്ടിഫിക്കറ്റ് വാങ്ങി പരിശോധിച്ച ശേഷം വെള്ളിയാഴ്ച സ്റ്റേഷനില് എത്താന് ആവശ്യപ്പെട്ടു. ഇതനുസരിച്ച് സ്റ്റേഷനില് എത്തിയ പരാതിക്കാരനോട് ചില ചടങ്ങുകളൊക്കെയുണ്ടെന്നും വേണ്ട രീതിയില് കണ്ടാലേ സര്ടിഫികറ്റ് കിട്ടുകയുള്ളൂ എന്നും അറിയിച്ചു.
തുടര്ന്ന് ശനിയാഴ്ച രാവിലെ പരാതിക്കാരനെ ഫോണില് വിളിച്ച് സ്റ്റേഷനില് വരാന് ആവശ്യപ്പെട്ടതനുസരിച്ച് സ്റ്റേഷനില് എത്തിയപ്പോള് 'അത് തരാതെ നടക്കില്ല' എന്ന് ഉറപ്പിച്ചു പറഞ്ഞു. ഗത്യന്തരമില്ലാതെ ഈ വിവരം പരാതിക്കാരന് വിജിലന്സ് തെക്കന് മേഖല പൊലീസ് സൂപ്രണ്ട് ജയശങ്കറിനെ അറിയിച്ചു.
അദ്ദേഹത്തിന്റെ നിര്ദേശ പ്രകാരം കൊല്ലം വിജിലന്സ് യൂണിറ്റ് ഡി വൈ എസ് പി അബ്ദുല് വഹാബിന്റെ നേതൃത്വത്തിലുള്ള വിജിലന്സ് സംഘം കെണി ഒരുക്കി വൈകിട്ട് ആറു മണിയോടെ എഴുകോണ് പൊലീസ് സ്റ്റേഷനില് വെച്ചു പരാതിക്കാരനില് നിന്ന് 500 രൂപ കൈക്കൂലി വാങ്ങുന്നതിനിടെ പ്രദീപിനെ കയ്യോടെ പിടികൂടിയെന്നാണ് കേസ്..
https://www.facebook.com/Malayalivartha
