അഴമിതികളുടെ പ്രഭവകേന്ദ്രം മുഖ്യമന്ത്രിയുടെ ഓഫീസ്... സ്വര്ണക്കള്ളക്കടത്ത്, എ.ഐ ക്യാമറ, കെ ഫോണ് ഇങ്ങനെ നീളുന്നു അഴിമതികള്; മുഖ്യമന്ത്രിയുടെ ഓഫീസുമായി ബന്ധപ്പെട്ട് കോടിക്കണക്കിന് രൂപയുടെ ഗുരുതര ആരോപണങ്ങളാണ് പ്രതിപക്ഷം തെളിവ് സഹിതം ഉന്നയിച്ചതെന്ന് വി.ഡി. സതീശന്
സ്വര്ണക്കള്ളക്കടത്ത്, എ.ഐ ക്യാമറ, കെ ഫോണ് ഇങ്ങനെ നീളുന്ന അഴമിതികളുടെ പ്രഭവകേന്ദ്രം മുഖ്യമന്ത്രിയുടെ ഓഫീസാണെന്ന് പ്രതിപക്ഷ നേതാവ് വി.ഡി. സതീശന് ആരോപിച്ചു. മുഖ്യമന്ത്രിയുടെ ഓഫീസ് സ്വര്ണക്കള്ളക്കടത്തിന്റെ കേന്ദ്രമായിരുന്നു. ആ കേസില് പ്രിന്സിപ്പല് സെക്രട്ടറി നൂറ് ദിവസം ജയിലില് കിടന്നു. ഇപ്പോള് ലൈഫ് മിഷന് കോഴക്കേസിലും അതേ പ്രിന്സിപ്പല് സെക്രട്ടറി ജയിലില് കഴിയുകയാണ്.
മെഡിക്കല് സര്വീസസ് കോര്പറേഷനില് മരുന്ന് വാങ്ങിയതിലും മുഖ്യമന്ത്രിയുടെ ഓഫീസിന് പങ്കുണ്ട്. മുഖ്യമന്ത്രിയുടെ ഓഫീസുമായി ബന്ധപ്പെട്ട് കോടിക്കണക്കിന് രൂപയുടെ ഗുരുതര ആരോപണങ്ങളാണ് പ്രതിപക്ഷം തെളിവ് സഹിതം ഉന്നയിച്ചത്. അതുകൊണ്ടാണ് അമേരിക്കയിലെ ടൈം സ്ക്വയര് യോഗത്തില് പങ്കെടുക്കാന് പോകുന്നതിന് മുന്പ് എനിക്കെതിരെ വിജിലന്സ് അന്വേഷണത്തിന് ഉത്തരവിട്ടതെന്നും സതീശന് പറഞ്ഞു.
സ്വര്ണക്കള്ളക്കടത്തിലും ലൈഫ് മിഷനിലും കെ ഫോണിലും അഴിമതി ക്യാമറയിലും ഊരാളുങ്കലിലുമെല്ലാം വഴികളെല്ലാം അവസാനിക്കുന്നത് ഒരു പെട്ടി ഇരിക്കുന്ന സ്ഥലത്താണ്. ആ പെട്ടി മുഖ്യമന്ത്രിയുടെ വീട്ടിലാണ് ഇരിക്കുന്നത്. ഇത്രയും ഗവേഷണം നടത്തി അഴിമതി നടത്തിയതിനുള്ള ഒന്നാം സ്ഥാനം ഈ സര്ക്കാരിന് കിട്ടും. പ്രതിപക്ഷത്തിനെതിരെ കേസുകളെ രാഷ്ട്രീയമായും നിയമപരമായും നേരിടും. പിണറായി വിജയന്റെ അഴിമതിക്കെതിരെ നിയമനടപടി സ്വീകരിച്ചുകൊണ്ടിരിക്കുകയാണെന്നും വി.ഡി. സതീശന് അറിയിച്ചു.
ഹൈക്കോടതി സിംഗിള് ബെഞ്ചും ഡിവിഷന് ബെഞ്ചും തള്ളിയ കേസിലാണ് വിജിലന്സ് അന്വേഷണം. കെ. സുധാകരനെതിരെയും ഉണ്ടാക്കിയ കേസാണ്. പത്ത് കോടി രൂപ മോന്സണ് മാവുങ്കലിന് കൊടുത്തെന്നാണ് സി.പി.എം പശ്ചാത്തലമുള്ള പരാതിക്കാരന് പറയുന്നത്. പരാതിക്ക് ഒരു യുക്തിയുമില്ല. ഭീഷണിപ്പെടുത്തി മൊഴിയുണ്ടാക്കി സുധാകരനെ പെടുത്താന് ശ്രമിക്കുകയാണ്. എം.പി ആയതിനാല് പബ്ലിക് ഫിനാന്സ് കമ്മിറ്റി ഇടപെടുമെന്ന് സുധാകരന് ഉറപ്പ് നല്കിയെന്നതിലും യുക്തിയില്ല. കാരണം ഈ സംഭവം നടന്നെന്ന് പറയുന്ന കാലത്ത് അദ്ദേഹം എം.പിയല്ല. ഇത്രയും പണം നല്കുന്നവര്ക്ക് സുധാകരന് എം.പി അല്ലെന്ന് അറിയില്ലായിരുന്നോ? മാത്രമല്ല പബ്ലിക് ഫിനാന്സ് കമ്മിറ്റി എന്നൊരു കമ്മിറ്റി പാര്ലമെന്റിലില്ല.
ഇല്ലാത്ത കേസ് കെട്ടിച്ചമച്ച് കോണ്ഗ്രസ് നേതാക്കളെ നിശബ്ദരാക്കി അഴിമതി ആരോപണത്തില് നിന്നും മുങ്ങാമെന്നാണ് മുഖ്യമന്ത്രി കരുതുന്നത്. അതുകൊണ്ടാണ് ഞങ്ങള് പേടിച്ചു പോയെന്ന് പറയാന് പറഞ്ഞത്. സര്ക്കാരിനെതിരായ ബാക്കി ആരോപണങ്ങള് പിന്നലെ വരുന്നുണ്ട്. എന്ത് ആരോപണങ്ങള് വന്നാലും മുഖ്യമന്ത്രി മിണ്ടില്ല. മൗനത്തിന്റെ മാളത്തില് ഒളിക്കും. ഇത് ഇരട്ടച്ചങ്കന് വിജയനല്ല, ആകാശവാണി വിജയനാണ്. റേഡിയോയെ പോലെ ഇങ്ങോട്ട് പറയുന്നത് മറ്റുള്ളവര് കേള്ക്കണം. ഒരു ചോദ്യത്തിനും ഉത്തരം പറയില്ലെന്നും വി.ഡി. സതീശന് പരിഹസിച്ചു.
https://www.facebook.com/Malayalivartha
