കേരള സര്‍ക്കാര്‍ സിബിഐ അന്വേഷണത്തിനുള്ള പൊതു സമ്മതം നേരത്തെ പിന്‍വലിച്ചിരുന്നു. ഇപ്പോഴിതാ സ്റ്റാലിനും. മന്ത്രി സെന്തില്‍ ബാലാജിയുടെ അറസ്റ്റിന് പിന്നാലെ തമിഴ്‌നാട് സര്‍ക്കാര്‍ സിബിഐക്കുള്ള പൊതുസമ്മതം പിന്‍വലിച്ചു. സംസ്ഥാന സര്‍ക്കാരിന്റെ അനുമതിയോ കോടതി നിര്‍ദ്ദേശമോ ഇല്ലാതെ ഇനി സിബിഐക്ക് സംസ്ഥാനത്ത് കേസ് എടുക്കാനാകില്ല.

കേരളം അടക്കം 10 സംസ്ഥാനങ്ങള്‍ നേരത്തെ തന്നെ സിബിഐക്ക് നേരിട്ട് കേസെടുക്കാനുള്ള അനുമതി പിന്‍വലിച്ചിരുന്നു. തമിഴ്‌നാട്ടില്‍ കേന്ദ്ര സര്‍ക്കാരിന്റെ ഭാഗത്ത് നിന്ന് കൂടുതല്‍ അന്വേഷണ ഇടപെടലുകള്‍ ഉണ്ടായേക്കുമെന്ന വിലയിരുത്തലിന്റെ കൂടി അടിസ്ഥാനത്തിലാണ് സിബിഐക്കുള്ള പൊതുസമ്മതം പിന്‍വലിച്ചിരിക്കുന്നത്.

ജോലി വാഗ്ദാനം ചെയ്തു പണം തട്ടിയെന്ന കേസില്‍ ഇഡി അറസ്റ്റ് ചെയ്ത തമിഴ്‌നാട് വൈദ്യുതി എക്‌സൈസ് മന്ത്രി വി.സെന്തില്‍ ബാലാജിയെ റിമാന്‍ഡ് ചെയ്തതിനു പിന്നാലെയാണ് സര്‍ക്കാര്‍ പുതിയ ഉത്തരവ് പുറപ്പെടുവിച്ചത്. കേന്ദ്ര ഏജന്‍സികളെ ഉപയോഗിച്ച് സംസ്ഥാന സര്‍ക്കാരുകളെ ഭീഷണിപ്പെടുത്തുകയാണെന്ന് മുഖ്യമന്ത്രി എം.കെ.സ്റ്റാലിന്‍ ആരോപിച്ചിരുന്നു.

സെന്തില്‍ ബാലാജിയോട് എന്‍ഫോസ്മെന്റ് ഡയറക്ടറേറ്റ് ക്രൂരമായയാണ് പെരുമാറിയതെന്ന് സ്റ്റാലിന്‍ പറഞ്ഞു. ആശുപത്രിയില്‍ കഴിയുന്ന മന്ത്രിയെ സ്റ്റാലിന്‍ നേരിട്ട് എത്തി സന്ദര്‍ശിച്ചു. തങ്ങളെ കുറിച്ചുള്ള അഴിമതി വിവരങ്ങള്‍ പറയരുതെന്ന് ആവശ്യപ്പെട്ടാണ് മന്ത്രിമാര്‍ സന്ദര്‍ശനം നടത്തുന്നതെന്ന് പ്രതിപക്ഷ നേതാവ് എടപ്പാടി പളനിസാമി തുറന്നടിച്ചു.

മന്ത്രി സെന്തില്‍ ബാലാജിയുടെ അറസ്റ്റില്‍ തമിഴ്‌നാട്ടില്‍ വ്യാപക പ്രതിഷേധമാണ് ഉയരുന്നത്. മന്ത്രിയുള്ള ഒമണ്ടൂരാറിലെ ആശുപത്രിയിലേക്ക് മന്ത്രിസഭ ഒന്നടക്കം ഒഴുകിയെത്തി. സെന്തില്‍ ബാലാജിയെ സന്ദര്‍ശിച്ച മുഖ്യമന്ത്രി എം.കെ സ്റ്റാലിന്‍ അന്വേഷണത്തോട് പൂര്‍ണ്ണമായി സഹകരിക്കുമെന്ന് മന്ത്രി പറഞ്ഞശേഷവും ഇ ഡി എന്തിനാണ് മനുഷ്യത്വരഹിതമായി പെരുമാറിയതെന്ന് ചോദിച്ചു. ബിജെപിയുടെ ഈ ഭീഷണി കണ്ട് ഡിഎംകെ ഭയപ്പെടില്ലെന്ന് സ്റ്റാലിന്‍ ട്വിറ്റര്‍ കുറച്ചു. സെന്തില്‍ ബാലാജിയുടെ മനുഷ്യാവകാശങ്ങള്‍ ഇഡി ലംഘിച്ചത് മന്ത്രി ശേഖര്‍ ബാബു ആരോപിച്ചു.

അറസ്റ്റിനെ നിയമപരമായി നേരിടുമെന്ന് ഉദയനിധി സ്റ്റാലിന്‍ പറഞ്ഞു. മന്ത്രിമാര്‍ക്ക് പുറമേ സിപിഎം ജനറല്‍സെക്രട്ടറി ബാലകൃഷ്ണനും ആശുപത്രിയിലെത്തി. ഡിഎംകെയെ ശക്തമായി എതിര്‍ക്കുന്ന നാം തമിഴര്‍ കക്ഷി നേതാവ് സീമാന്‍ അറസ്റ്റിനെ അപലപിച്ചു. തങ്ങളുടെ പേര് പറയരുതെന്ന് ആവശ്യപ്പെട്ടതാണ് മന്ത്രിമാര്‍ സെന്തില്‍ ബാലാജിയെ സന്ദര്‍ശിക്കുന്നതെന്ന് പ്രതിപക്ഷനേതാവ് എടപ്പാടി പളനിസ്വാമി പറഞ്ഞു. അതേസമയം മന്ത്രിയുടെ ഹൃദയത്തില്‍ മൂന്ന് ബ്ലോക്കുകള്‍ കണ്ടെത്തി. ഇവ നീക്കം ചെയ്യാനായി അടിയന്തരമായി ബൈപ്പാസ് സര്‍ജറി നടത്തുമെന്ന് ആശുപത്രി അധികൃതര്‍ അറിയിച്ചു. ഇതോടെ മന്ത്രിയെ ജയിലിലേക്ക് മാറ്റുന്നത് നീണ്ടുപോകാനാണ് സാധ്യത.

പഞ്ചായത്തംഗത്തില്‍ നിന്നു 3 പാര്‍ട്ടികളിലെ പ്രധാന കസേരകളിലേക്കുള്ള വി.സെന്തില്‍ ബാലാജിയുടെ വളര്‍ച്ച അതിവേഗത്തിലായിരുന്നു. തന്ത്രങ്ങള്‍ മെനയുന്നതിലെ മികവായിരുന്നു തുറുപ്പുചീട്ട്. കരൂരിലെ സാധാരണ കര്‍ഷക കുടുംബത്തില്‍ ജനനം. 4 തവണ എംഎല്‍എയായി. 2006ല്‍ മുപ്പതാം വയസ്സില്‍ അണ്ണാഡിഎംകെ അംഗമായി ആദ്യം നിയമസഭയില്‍. 2011ലും ജയിച്ചു ജയലളിത മന്ത്രിസഭയില്‍ ഗതാഗത മന്ത്രിയായി.

കുറഞ്ഞ സമയം കൊണ്ട് ജയയുടെ വിശ്വസ്തനായി മാറിയ അദ്ദേഹം ജയയ്ക്കു വേണ്ടി തല മുണ്ഡനം ചെയ്തും പൂജകളും നേര്‍ച്ചകളും സംഘടിപ്പിച്ചും വാര്‍ത്തകളില്‍ ഇടം നേടി. മിതമായ നിരക്കില്‍ കുടിവെള്ളം ലഭ്യമാക്കാന്‍ ബസുകളും സ്റ്റേഷനുകളും കേന്ദ്രീകരിച്ചു 2013ലെ 'അമ്മ കുടിനീര്‍' പദ്ധതിയുടെ ആശയവും അദ്ദേഹത്തിന്റേതായിരുന്നു. എന്നാല്‍, ഗതാഗത വകുപ്പിലെ കോഴ ആരോപണത്തിന്റെ പേരില്‍ തെറ്റിയതോടെ 2015ല്‍ മന്ത്രിസഭയില്‍ നിന്നും പാര്‍ട്ടി ജില്ലാ സെക്രട്ടറി സ്ഥാനത്തു നിന്നും പുറത്തായി.

2016ല്‍ ജയലളിതയുടെ മരണത്തെത്തുടര്‍ന്ന് പാര്‍ട്ടിയിലുണ്ടായ അധികാര വടംവലിക്കു പിന്നാലെ വി.കെ.ശശികല-ടി.ടി.വി.ദിനകരന്‍ വിഭാഗത്തിന്റെ കൂടെയായി. 2018ല്‍ ഡിഎംകെയിലെത്തി. പാര്‍ട്ടിക്കു ഗുണകരമായ തന്ത്രങ്ങളിലൂടെ സ്റ്റാലിന്റെ വിശ്വസ്തനായി. പിന്നാലെ, നിര്‍ണായക സ്ഥാനങ്ങളും പ്രധാന ചുമതലകളും തേടിയെത്തി.