പോത്തന്‍കോട് കട ഉടമയുടെ ശരീരം കത്തിക്കരിഞ്ഞ നിലയില്‍ കടയുടെ മുന്നില്‍ കണ്ടെത്തി. തോന്നയ്ക്കല്‍ ശാസ്തവട്ടം ശാന്തിനഗര്‍ കുന്നുംപുറത്തു വീട് ചോതി നിലയത്തില്‍ കിച്ചൂസ് സ്റ്റോര്‍ ഉടമ സി. രാജു (62) ആണ് മരിച്ചത്. രാജുവിന്റെ വീടിനോട് ചേര്‍ന്നാണ് കടയുള്ളത്.

റോഡരികിലുള്ള കടയുടെ മുന്നില്‍ ഗേറ്റിനോടു ചേര്‍ന്നായിരുന്നു മൃതദേഹം കിടന്നിരുന്നത്. ഇരുമ്പു ഗേറ്റ് അകത്തു നിന്നു പൂട്ടിയിരിക്കുകയായിരുന്നു. മൃതദേഹത്തിനു സമീപം കാര്‍ഡ് ബോര്‍ഡുകള്‍ കത്തിയമര്‍ന്നതിന്റെ അവശിഷ്ടങ്ങളും ഉണ്ടായിരുന്നു. രാവിലെ രാജുവിന്റെ ഭാര്യ ഷീലയാണ് കത്തിക്കരിഞ്ഞ നിലയില്‍ മൃതദേഹം കണ്ടെത്തുന്നത്. ഇന്നലെ പുലര്‍ച്ചെ 1.12 ന് തീ ആളിപ്പടരുന്നതു സമീപത്തെ വീട്ടിലെ സിസിടിവി ക്യാമറയില്‍ പതിഞ്ഞിട്ടുണ്ട്.

ഈ സമയത്ത് സമീപ വീട്ടിലും രാജുവിന്റെ വീട്ടിലും വെളിച്ചം തെളിയുന്നതും അകത്തു നിന്ന് ആള്‍ വന്നു നോക്കി പോകുന്നതും വെളിച്ചം കെടുന്നതുമെല്ലാം കാണാം. പ്രത്യേക ഗന്ധവും തീ ആളിപ്പടരുന്നതും കണ്ടു ഭയന്നാണു പുറത്തിറങ്ങാതിരുന്നതെന്നാണു ഷീല പിന്നീടു പൊലീസിനോട് പറഞ്ഞത്. ഭാര്യയുമായി പിണക്കത്തിലായിരുന്ന രാജു ഏറെ നാളായി കടയോടു ചേര്‍ന്ന ഷീറ്റിട്ട ചായ്പിലെ സ്ലാബിനു മുകളിലാണു കിടന്നിരുന്നത്.

സംഭവദിവസവും കിടക്കാനായി രാജു പായ വിരിച്ചിരുന്നതായി സുഹൃത്തുക്കള്‍ പറയുന്നു. സൈക്കിളില്‍ മാത്രം യാത്ര ചെയ്യുന്ന രാജുവിന്റെ കടയില്‍ മൂന്നു ദിവസമായി പെട്രോള്‍ നിറച്ച ഒരു കുപ്പി കണ്ടതായി സ്ഥലവാസി പൊലീസിനോട് പറഞ്ഞു. ബന്ധുക്കളുടെ പരാതിയില്‍ മംഗലപുരം പൊലീസ് കേസെടുത്ത് അന്വേഷണം ആരംഭിച്ചു.