ശബരിമല ക്ഷേത്ര നട മിഥുന മാസ പൂജകള്‍ക്കായി തുറന്നു... പതിനെട്ടാം പടി ഇറങ്ങി ആഴിയില്‍ അഗ്‌നി പകര്‍ന്നതോടെ ഇരുമുടിക്കെട്ടേന്തിയ അയ്യപ്പ ഭക്തര്‍ പതിനെട്ടാം പടി ചവിട്ടി ദര്‍ശനം നടത്താന്‍ തുടങ്ങി.

വൈകുന്നേരം അഞ്ചിന് ക്ഷേത്രം തന്ത്രി കണ്ഠരര് രാജീവരരുടെ സാന്നിധ്യത്തില്‍ മേല്‍ ശാന്തി വി. ജയരാമന്‍ നമ്പൂതിരി നട തുറന്ന് ശ്രീലകത്ത് ദീപങ്ങള്‍ തെളിയിച്ചു.

തുടര്‍ന്ന്, പതിനെട്ടാം പടി ഇറങ്ങി ആഴിയില്‍ അഗ്‌നി പകര്‍ന്നതോടെ ഇരുമുടിക്കെട്ടേന്തിയ അയ്യപ്പ ഭക്തര്‍ പതിനെട്ടാം പടി ചവിട്ടി ദര്‍ശനം നടത്താന്‍ ആരംഭിച്ചു. നട തുറന്ന സന്നിധാനത്തും മാളികപ്പുറത്തും പ്രത്യേക പൂജകള്‍ ഒന്നും ഉണ്ടായിരുന്നില്ല. മിഥുന മാസം ഒന്നാം തീയതി ദിവസമായ വെള്ളിയാഴ്ച പുലര്‍ച്ചെ 4.30 ന് ഭഗവാനെ പള്ളിയുണര്‍ത്തും. 5 ന് നട തുറക്കും.

5.30 മുതല്‍ മഹാഗണപതിഹോമം, നെയ്യഭിഷേകം, അഷ്ടാഭിഷേകം എന്നീ ചടങ്ങുകളും 7.30 മുതല്‍ ഉഷപൂജ, ഉദയാസ്തമയ പൂജ, കലശാഭിഷേകം, കളഭാഭിഷേകം, പടി പൂജ, പുഷ്പ്പാഭിഷേകം, അത്താഴപൂജ തുടങ്ങിയ പൂജകളും നടക്കും.

മാളികപ്പുറം ക്ഷേത്രത്തില്‍ നാളെ മുതല്‍ നട തുറന്നിരിക്കുന്ന എല്ലാ ദിവസങ്ങളിലും ദീപാരാധനക്ക് ശേഷം ഭഗവതി സേവ നടക്കും. ചടങ്ങുകള്‍ക്ക് മാളികപ്പുറം മേല്‍ശാന്തി ഹരിഹരന്‍ നമ്പൂതിരി കാര്‍മ്മികത്വം വഹിക്കുകയും ചെയ്യും. മിഥുനമാസ പൂജകള്‍ പൂര്‍ത്തിയാക്കി ഈ മാസം 20 ന് രാത്രി 10 ന് ഹരിവരാസനം പാടി നട അടക്കുന്നതാണ്.