പോലീസും പാര്‍ട്ടിയും ചേര്‍ന്ന് ആരെയാണ് പൊട്ടരാക്കാന്‍ നോക്കുന്നത് ജനങ്ങളെയോ. 13 ദിവസമായിട്ടും വിദ്യയെ കണ്ടെത്താനായില്ലെന്ന്. വിദ്യ എന്താ സുകുമാര കുറുപ്പോ. പാര്‍ട്ടി ആപ്പീസില്‍ കയറ്റി ഒളിപ്പിച്ചിട്ട് വിദ്യയെ കാണ്‍മാനില്ല ഒളിവിലെന്ന്. നല്ല ഫ്രെഷ് ന്യായീകരണം. വിദ്യയെ ഇപ്പോള്‍ കിട്ടും നാടുമുഴുവന്‍ വലവിരിച്ചെന്ന് പോലീസ്. പോലീസ് ഏമാന്മാര്‍ കാക്കി ഊരിവെച്ചിട്ട് പാര്‍ട്ടി ആപ്പീസില്‍ അടിമപ്പണിക്ക് പോകുന്നതാണ് നല്ലത്. പിടികിട്ടാപ്പുള്ളി വിദ്യ ഒളിവിലിരുന്ന് മുന്‍കൂര്‍ ജാമ്യാപേക്ഷ കൊടുത്തു ഒരു ചാനലിന് ഇന്റര്‍വ്യൂ കൊടുത്തു പക്ഷെ പോലീസിന് ഇതുവരെ ആളെ കിട്ടിയിട്ടില്ല. ആരെ ബോധിപ്പിക്കാനാണ് ഈ പ്രഹസനം. പോലീസും പാര്‍ട്ടിയും ചേര്‍ന്നുള്ള ഒത്തുകളി മനസ്സിലാകാതിരിക്കാന്‍ മാത്രം പൊട്ടരല്ല മലയാളികള്‍.

എനിക്ക് കല്യാണം കഴിക്കാനുള്ളതാണ് ജാമ്യം അനുവദിക്കണമെന്നൊക്കെ കോടതിയോട് താഴ്മയായ് അപേക്ഷിച്ച വിദ്യ ഉടനെ ഒന്നും പുറത്ത് വരില്ല. മുന്‍കൂര്‍ ജാമ്യം കിട്ടിക്കഴിയുമ്പോള്‍ പാര്‍ട്ടി ആപ്പീസിന്റെ വാതില്‍ തുറന്ന് പുറത്ത് വരും. പോലീസിന്റെ പ്രഹസനമാണ് സഹിക്കാന്‍ പറ്റാത്തത്. വിദ്യ എവിടെയാണുള്ളതെന്ന് അറിയില്ലെന്നാണ് പൊലീസ് വ്യക്തമാക്കുന്നത്. അതിനിടെ വിദ്യയുടെ മുന്‍കൂര്‍ ജാമ്യാപേക്ഷ മറ്റന്നാള്‍ ഹൈക്കോടതി പരിഗണിക്കും. വ്യാജ രേഖയുടെ ഉറവിടം കണ്ടെത്താന്‍ വിദ്യയെ കസ്റ്റഡിയിലെടുക്കണമെന്നും ജാമ്യം അനുവധിക്കരുതെന്നും അഗളി പൊലീസ് ആവശ്യപ്പെട്ടിരുന്നു. പൊലീസ് തിരയുന്നതിനിടെ വിദ്യ കോഴിക്കോട്ടും എറണാകുളത്തും എത്തിയെന്നാണ് പുറത്ത് വരുന്ന വിവരം. അഗളി പൊലീസും നീലേശ്വരം പൊലീസും മഹാരാജാസ് കോളേജിലടക്കം എത്തി തെളിവുകള്‍ ശേഖരിച്ചെങ്കിലും വിദ്യയെ കണ്ടെത്താന്‍ കാര്യമായ ശ്രമം നടത്തിയില്ല. നീലേശ്വരം പൊലീസ് സംഘം ഒരു ദിവസം തൃക്കരിപ്പൂരിലെ വിദ്യയുടെ വീട്ടില്‍ പോയതൊഴിച്ചാല്‍ വിദ്യയെ കണ്ടെത്താന്‍ യാതൊരു നീക്കവും നടത്തിയില്ല. വിദ്യയെ മുന്‍കൂര്‍ ജാമ്യാപേക്ഷ പരിഗണിക്കുന്നത് വരെ പിടികൂടേണ്ടെന്ന നിലപാടിലുമാണ് അന്വേഷണ സംഘം എന്നാണ് വിവരം.

അഗളി പൊലീസ് കെ വിദ്യക്കെതിരെ ഹൈക്കോടതിയില്‍ റിപ്പോര്‍ട്ട് സമര്‍പ്പിച്ചിട്ടുണ്ട്. വിദ്യ മഹാരാജാസ് കോളേജിന്റെ പേരില്‍ വ്യാജരേഖ ചമച്ച് അധ്യാപന ജോലിക്ക് ശ്രമിച്ചെന്നാണ് റിപ്പോര്‍ട്ടില്‍ കുറ്റപ്പെടുത്തുന്നത്. പാലക്കാട് അട്ടപ്പാടി കോളേജിനെ മുന്‍നിര്‍ത്തിയുള്ളതാണ് റിപ്പോര്‍ട്ട്. വിദ്യക്ക് മുന്‍കൂര്‍ ജാമ്യം നല്‍കരുതെന്നും കോടതിയില്‍ പൊലീസ് ആവശ്യപ്പെട്ടു. വിദ്യയെ ചോദ്യം ചെയ്യേണ്ടതുണ്ടെന്നും അന്വേഷണ സംഘം വ്യക്തമാക്കിയിട്ടുണ്ട്. ഓഹ് അന്വേഷണ സംഘത്തിന്റെ ഒത്തുകളിയില്‍ ആര്‍ക്കും സംശയം ഒന്നും ഇല്ലല്ലോ അല്ലേ. ഒളിപ്പിച്ചിരിക്കുന്നത് പാര്‍ട്ടി ആകുമ്പോള്‍ പോലീസ് എങ്ങനെ വിദ്യയെ പൊക്കും. പാര്‍ട്ടി ആപ്പീസില്‍ കേറാന്‍ പോലീസിന് ധൈര്യവും ഇല്ല. അങ്ങനെ വിദ്യ വിഷയത്തില്‍ ആകെമൊത്തം എയറില്‍ നില്‍ക്കുന്നത് പോലീസ്. വിദ്യ എവിടെ വിദ്യ എവിടെ കിട്ടിയോ കിട്ടിയോ എന്നും ചോദിച്ച് പ്രതിപക്ഷം വാരിയലക്കുന്നുണ്ട്. ജോലിക്ക് വേണ്ടി വ്യാജരേഖ ചമച്ച കേസാണ്. ഗുരുതര കുറ്റമാണ് ചെയ്തിരിക്കുന്നത്. എന്നിട്ടും കുറ്റക്കാരിയെ പൊതിഞ്ഞ് സംരക്ഷിക്കുന്ന ധാര്‍മ്മകത ലവലേശമില്ലാത്തൊരു പാര്‍ട്ടി. ആദ്യം വിദ്യയെ തള്ളിപ്പറയുന്നു പിന്നെ വിദ്യയ്‌ക്കെതിരെയും ഗൂഡാലോചനയെന്ന് പാര്‍ട്ടി സെക്രട്ടറി. അപ്പോഴേ നമുക്ക് മനസ്സിലായ് വിദ്യ ആരുടെ സംരക്ഷണത്തിലാണെന്ന്. വിദ്യ തട്ടിപ്പ് നടത്തിയതിന്റെ തെളിവടക്കമാണ് പുറത്തുവന്നത്. എന്നിട്ടും താങ്ങാന്‍ ഉളുപ്പ് ഉണ്ടോ. ഈ നെറികെട്ട കൂട്ടത്തെയൊക്കെ കേരളം സഹിക്കണമല്ലോ എന്നോര്‍ക്കുമ്പോഴാണ്. അര്‍ഹതപ്പെട്ടവരുടെ ജോലിയാണ് ഇതുപോലെ പിപ്പിടി വിദ്യ കാണിച്ച് ഈ കൂട്ടര്‍ തട്ടിയെടുക്കുന്നത്.

ഇപ്പോള്‍ വേറൊരു എസ്എഫ്‌ഐ നേതാവിന്റെ തട്ടിപ്പും പുറത്ത് വന്നതോടെ പാര്‍ട്ടി എയറിലാണ്. നിഖില്‍ തോമസ് ബി.കോം ജയിക്കാതെ വ്യാജ സര്‍ട്ടിഫിക്കറ്റ് ഹാജരാക്കി കായംകുളം എം.എസ്.എം. കോളേജില്‍ എം. കോമിന് ചേര്‍ന്ന സംഭവം പാര്‍ട്ടിക്ക് തലവേദനയാകുന്നു.
നിഖില്‍ തോമസ് പ്രവേശനം നേടിയത് രാഷ്ട്രീയ ശുപാര്‍ശയിലാണ്. കോളേജ് മേനജരുടെ വെളിപ്പെടുത്തല്‍ പാര്‍ട്ടിക്ക് കുരുക്കാകുന്നു.
സര്‍വകലാശാല യോഗ്യതയുണ്ടോയെന്ന് മാത്രമാണ് നോക്കിയതെന്ന് മാനേജര്‍ പറഞ്ഞു. ആരാണ് നിഖിലിന് വേണ്ടി ശുപാര്‍ശ ചെയ്തതെന്ന ചോദ്യത്തിന് വ്യക്തമായ ഉത്തരം നല്‍കാന്‍ മാനേജര്‍ ഹിലാല്‍ ബാബു തയാറായില്ല. പൊളിറ്റിക്കലായിട്ടുള്ള, വേറെ ചില ആളുകളുടെ ശുപാര്‍ശയില്‍ അഡ്മിഷന്‍ കൊടുത്തതാണ്. സര്‍വകലാശാല യോഗ്യതയുണ്ടോയെന്ന് നോക്കി. ശുപാര്‍ശ ചെയ്തത് ആരാണെന്ന് ഞാന്‍ പറയുന്നത് എങ്ങനെയാ?', ഹിലാല്‍ ബാബു പറഞ്ഞു. നിഖിലിന്റെ ബി.കോം സര്‍ട്ടിഫിക്കറ്റ് വ്യാജമാണെന്ന ആരോപണവുമായി എസ്.എഫ്.ഐ. ജില്ലാക്കമ്മിറ്റി അംഗമായ വിദ്യാര്‍ഥിനിയായിരുന്നു രംഗത്തെത്തിയത്. മൂന്ന് മാസം മുമ്പ് തന്നെ ഇതുസംബന്ധിച്ച് പാര്‍ട്ടിക്ക് പരാതി നല്‍കിയിരുന്നു. കഴിഞ്ഞയാഴ്ച നടന്ന ഏരിയാ സമ്മേളത്തില്‍ സി.പി.എം. നേതൃത്വം ഇടപെട്ടാണ് നിഖിലിനെ ഏരിയാ സെക്രട്ടറി സ്ഥാനത്തുനിന്ന് നീക്കിയത്. വെള്ളിയാഴ്ച ആലപ്പുഴയില്‍ തുടങ്ങിയ ജില്ലാ സമ്മേളനത്തില്‍ ഭാരവാഹികളെ നിശ്ചയിക്കുന്നതിനുമുന്നോടിയായി സി.പി.എം. ഫ്രാക്ഷന്‍ യോഗം ചേര്‍ന്നപ്പോള്‍ വിഷയം ചര്‍ച്ചയ്ക്കുവന്നെന്നാണ് സൂചന. 2017 20 കാലഘട്ടത്തിലാണ് നിഖില്‍ എം.എസ്.എം. കോളേജില്‍ ബി.കോമിനു പഠിച്ചത്. 2019ല്‍ എസ്.എഫ്.ഐ. യുടെ യൂണിവേഴ്‌സിറ്റി യൂണിയന്‍ കൗണ്‍സിലറായും 2020ല്‍ കേരള സര്‍വകലാശാലാ യൂണിയന്‍ ജോയിന്റ് സെക്രട്ടറിയായും തിരഞ്ഞെടുക്കപ്പെട്ടു. അതേ കാലയളവിലുള്ള ബിരുദസര്‍ട്ടിഫിക്കറ്റാണു കലിംഗ സര്‍വകലാശാലയുടെതായി ഹാജരാക്കിയത്. എം.എസ്.എം. കോളേജില്‍ത്തന്നെ 2021 2023 ബാച്ചിലാണ് എം.കോമിന് ചേര്‍ന്നത്.