ഗ്യാസ് സിലിണ്ടറുമായെത്തിയ ലോറിയിടിച്ച് ബൈക്ക് യാത്രക്കാരായ രണ്ട് യുവാക്കള്‍ക്ക് ദാരുണാന്ത്യം. അമ്പലപ്പുഴ തെക്ക് പഞ്ചായത്ത് ആതിരയില്‍ അനന്തു (21), കരൂര്‍ അനില്‍ കുമാറിന്റെ മകന്‍ അഭിജിത്ത് (22) എന്നിവരാണ് മരിച്ചത്.

ദേശീയ പാതയില്‍ പുന്നപ്ര കളത്തട്ട് ജംഗ്ഷന് സമീപമായിരുന്നു അപകടം നടന്നത്. ബൈക്കില്‍ ഇവര്‍ക്കൊപ്പമുണ്ടായിരുന്ന മറ്റൊരു യുവാവിനെ ഗുരുതര പരിക്കുകളോടെ മെഡിക്കല്‍ കോളേജാശുപത്രിയില്‍ പ്രവേശിപ്പിച്ചിരിക്കുകയാണ്.


അതേ സമയം, പറവൂര്‍ കവലയില്‍ ടാങ്കര്‍ ലോറിയിടിച്ച് സ്‌കൂട്ടര്‍ യാത്രികന് ദാരുണാന്ത്യം... ചെങ്ങമനാട് പറമ്പയം മഠത്തിമൂല തണ്ടിക്കല്‍ വീട്ടില്‍ ഇസ്മായിലാണ് (72) മരിച്ചത്. ഇന്നലെ ഉച്ചക്ക് 1.15ഓടെ പറവൂര്‍കവല സിഗ്‌നലിന് വടക്ക് ഭാഗത്തായിരുന്നു അപകടം നടന്നത്. ആലുവയില്‍ നിന്ന് വീട്ടിലേക്ക് വരുകയായിരുന്നു ഇസ്മായില്‍.വഴിയോരത്തെ സൂപ്പര്‍മാര്‍ക്കറ്റില്‍ പാര്‍ക്ക് ചെയ്തിരുന്ന കാറിന്റെ മിററില്‍ ഹാന്‍ഡില്‍ തട്ടി സ്‌കൂട്ടര്‍ വലതുവശത്തേക്ക് മറിഞ്ഞു.

ഈ സമയം തൊട്ടുപിറകില്‍ തൃശൂര്‍ ഭാഗത്തേക്ക് വരികയായിരുന്ന ടാങ്കര്‍ ലോറി ഇസ്മായിലിന്റെ ദേഹത്ത് കയറിയിറങ്ങി. ഇസ്മയില്‍ തല്‍ക്ഷണം മരിച്ചു.അന്‍വര്‍ സാദത്ത് എംഎല്‍എയുടെ പിതൃസഹോദരന്റെ മകളുടെ ഭര്‍ത്താവാണ് ഇസ്മായില്‍.