ഒമാന്‍ പോളിക്ലിനിക്കിന്റെയും ഒമാന്‍ അല്‍ ഖൈര്‍ ഹോസ്പിറ്റലിന്റെയും സ്ഥാപകനായ ഡോക്ടര്‍ രാജേന്ദ്രന്‍ നായര്‍ അന്തരിച്ചു. കേരളത്തിന്റെ ആരോഗ്യ രംഗത്ത് സുദീര്‍ഘമായ സേവനം കാഴ്ചവെച്ച ആളാണ് അദ്ദേഹം. ജൂലൈ 28ന് ഉച്ചയ്ക്ക് 2.45ഓടെ തിരുവനന്തപുരം ജിജി ഹോസ്പിറ്റലില്‍ വെച്ചായിരുന്നു അന്ത്യം. അദ്ദേഹത്തിന്റെ ഭൗതിക ശരീരം മൈത്രി ഗാര്‍ഡനിലുള്ള വസതിയില്‍ പൊതുദര്‍ശനത്തിന് വെച്ചിരിയ്ക്കുകയാണ്. 1970 ബാച്ച് തിരുവനന്തപുരം മെഡിക്കല്‍ കോളേജിലെ പൂര്‍വ്വ വിദ്യാര്‍ത്ഥിയാണ്. വൈദ്യശാസ്ത്ര രംഗത്ത് ശ്രദ്ധേയമായ ഒരു കരിയറായിരുന്നു അദ്ദേഹത്തിനന്റേത്.

കേരളത്തില്‍ മാത്രമല്ല വിദേശത്തും കേരളപ്പെരുമ വാനോളം ഉയര്‍ത്തി ഡോ രാജേന്ദ്രന്‍ നായര്‍. കേരളത്തിലെ സുദീര്‍ഘമായ സേവനത്തിന് ശേഷം അദ്ദേഹം ഒമാനിലെ ഇബ്രിയിലേക്ക് മാറുകയും 1981ല്‍ ഒമാന്‍ പോളിക്ലിനിക് സ്ഥാപിക്കുകയും ചെയ്തു. ഈ ക്ലിനിക്ക് പിന്നീട് ഒമാന്‍ അല്‍ ഖൈര്‍ ഹോസ്പിറ്റലായി മാറുകയും ചെയ്തു. ഈ ഹോസ്പിറ്റല്‍ പിന്നീട് ആസ്റ്റര്‍ ഗ്രൂപ്പിന്റെ ഭാഗമായി, ഇപ്പോള്‍ ആസ്റ്റര്‍ ഇബ്രി ഹോസ്പിറ്റല്‍ എന്ന പേരിലാണ് അറിയപ്പെടുന്നത്. മലയാളിയായ രാജേന്ദ്രന്‍ നായരുടെ കൈയ്യൊപ്പ് പതിഞ്ഞ ആശുപത്രിയാണെന്നതില്‍ കേരളത്തിനും അഭിമാനിയ്ക്കാം. ആതുരസേവന രംഗത്തും ഡോക്ടര്‍ രാജേന്ദ്രന്‍ നായര്‍ തന്റെ വ്യക്തിമുദ്ര പതിപ്പിച്ചു. കേരളത്തിലും വിദേശത്തുമായി നിരവധി ജീവകാരുണ്യ പ്രവര്‍ത്തനങ്ങള്‍ നടത്തിയിരുന്നു അദ്ദേഹം. സാക്ഷി ടിവിയുടെയും ക്യാന്‍സര്‍ രോഗികളെ സഹായിക്കുന്ന സംഘടനയായ KRABയുടേയും ചെയര്‍മാനായിരുന്നു. അദ്ദേഹത്തിന്റെ ഭാര്യ ഡോ. ഉഷാറാണി, മകന്‍ ഡോ. ബിഷ്ണു കിരണ്‍ രാജേന്ദ്രന്‍, ഡോ. കാര്‍ത്തിക മോഹന്‍ (മരുമകള്‍), ബാല കിരണ്‍ നായര്‍ (കൊച്ചുമകന്‍), പൂര്‍ണേന്ദു കിരണ്‍ നായര്‍ (കൊച്ചുമകള്‍). മൃതദേഹം ഗാന്ധിപുരം റോഡ് ശ്രീകാര്യം മൈത്രി ഗാര്‍ഡനിലെ വസതിയില്‍ സൂക്ഷിച്ചിരിക്കുകയാണ്. സംസ്‌കാരം ജൂണ്‍ 29ന് വൈകിട്ട് 4ന് തിരുവനന്തപുരം ശാന്തികവാടത്തില്‍. ഡോക്ടര്‍ രാജേന്ദ്രന്‍ നായര്‍ക്ക് ആദരാഞ്ജലി.