ഇന്ത്യയുടെ സൗര ദൗത്യമായ ആദിത്യ എൽ1നെ കുറിച്ചുള്ള വിവരങ്ങൾ ആണ് പങ്കു വയ്ക്കാനുള്ളത്. ആദിത്യ എൽ1 വിവരശേഖരണം തുടങ്ങിയിരിക്കുകയാണ് . ഭൂമിക്ക് ചുറ്റുമുള്ള കണികാസ്വഭാവത്തെ പറ്റി പഠിക്കാൻ സഹായകമാകുന്ന വിവരങ്ങൾ കിട്ടിയിരിക്കുകയാണ് .

അതിതാപ അയണുകളുടെയും ഇലക്ട്രോണുകളുടെയും വിവരം ആദിത്യ എൽ1 ശേഖരിച്ചു . ഭൂമിക്ക് 50,000 കിലോമീറ്റർ മുകളിലുള്ള അയണുകളുടെയും ഇലക്ട്രോണുകളുടെയും സാന്നിധ്യം നിരീക്ഷിച്ചു . ആദിത്യ എൽ 1 ലെ സ്റ്റെപ് എന്ന പേ ലോഡ് ഉപയോഗിച്ചാണ് വിവരശേഖരണം നടത്തുന്നത് എന്നതാണ് ശ്രദ്ധേയമായ കാര്യം.

പേടകം സൂര്യനെ കുറിച്ചുള്ള ശാസ്ത്രീയ വിവരങ്ങൾ ശേഖരിക്കാൻ തുടങ്ങിയെന്ന വിവരം ഐ.എസ്.ആർ.ഒ. ആണ് പുറത്ത് വിട്ടിരിക്കുന്നത് . ഭൂമിക്ക് ചുറ്റുമുള്ള കണങ്ങളുടെ സ്വഭാവം വിശകലനം ചെയ്യാൻ സ്റ്റെപ്സ്-1 ഉപകരണം ശേഖരിക്കുന്ന വിവരങ്ങൾ സഹായിക്കുമെന്ന് ഐ.എസ്.ആർ.ഒ വ്യക്തമാക്കി.

സൗരക്കാറ്റിന്‍റെ പഠനത്തിനുള്ള പേടകത്തിലെ പ്രധാന ഉപകരണമായ ആദിത്യ സോളാർ വിൻഡ് പാർട്ടിക്കിൾ എക്സ്പെരിമെന്‍റിനോടനുബന്ധിച്ചാണ് സ്റ്റെപ്സ്-1 ഉപകരണം . അഹമ്മദാബാദ് ഫിസിക്കൽ റിസർച്ച് ലബോറട്ടറി ആണ് ഈ ഉപകരണം നിർമിച്ചിരിക്കുന്നത്‌.

അതേസമയം ചന്ദ്രയാന്റെ മിന്നും വിജയത്തിന് ശേഷം ഇന്ത്യയുടെ നിര്‍ണായക ആദിത്യ-എല്‍1 ബഹിരാകാശ പേടകം ലക്ഷ്യ സ്ഥാനമായ നിര്‍ദിഷ്ട ഒന്നാം ലെഗ്രാഞ്ചേ ബിന്ദു(എല്‍1)വിലേക്കുള്ള യാത്രയ്ക്കു തുടക്കം കുറിച്ചു.

ഭ്രമണപഥം മാറ്റുന്ന ഇന്‍സെര്‍ഷന്‍ ദൗത്യം വിജയകരമായി പൂര്‍ത്തിയായതായി പുലര്‍ച്ചെ രണ്ടരയോടെ ഐഎസ്ആര്‍ഒ സ്ഥിരീകരിച്ചു.ക്രൂസ് ഫേസ് എന്നറിയപ്പെടുന്ന 110 ദിവസം നീളുന്ന യാത്രയ്‌ക്കൊടുവിലാണ് എല്‍1നു ചുറ്റുമുള്ള സാങ്കല്‍പിക ഭ്രമണപഥത്തില്‍ എത്തുക.