ഗാസയിൽ വെടിനിർത്തൽ പ്രഖ്യാപനം ഉടനുണ്ടാകില്ലെന്നും, അത് അത് ഹമാസിന് കീഴടങ്ങുന്നതിന് തുല്യമാകുമെന്നും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു പറഞ്ഞു. രാജ്യത്തിന്റെ ചരിത്രത്തിലെ ഏറ്റവും മാരകമായ ആക്രമണത്തിനാണ് ഇസ്രായേൽ സേന മറുപടി നൽകുന്നതെന്നും നെതന്യാഹു വിദേശ മാധ്യമങ്ങളോട് വ്യക്തമാക്കി.

എന്നാൽ ഇസ്രായേൽ ഗാസയിൽ നടത്തുന്ന യുദ്ധത്തിൽ 8,300-ലധികം പേർ കൊല്ലപ്പെട്ടതായി ഹമാസ് നിയന്ത്രണത്തിലുള്ള ആരോഗ്യ മന്ത്രാലയം അറിയിച്ചു. ഇസ്രായേലിലെ കണക്കുകൾ പ്രകാരം 1,400 പേർ മരണപ്പെടുകയും 230 ലധികം പേരെ ഹമാസ് ബന്ദികളാക്കുകയും ചെയ്തു. അതിനാൽ വെടിനിർത്തൽ ഹമാസിന് കീഴടങ്ങുന്നതിന് തുല്യമാകുമെന്നും നെതന്യാഹു പത്രസമ്മേളനത്തിൽ പറഞ്ഞു.

"വെടിനിർത്തലിനുള്ള ആഹ്വാനങ്ങൾ ഇസ്രായേൽ ഹമാസിന് കീഴടങ്ങാനും തീവ്രവാദത്തിന് കീഴടങ്ങാനുമുള്ള ആഹ്വാനങ്ങളാണ്... അത് നടക്കില്ല, ഈ യുദ്ധം ജയിക്കുന്നതുവരെ പോരാടും."- നെതന്യാഹു വ്യക്തമാക്കി.

അതേസമയം ഹമാസിന്റെ നിയന്ത്രണത്തിലുള്ള പ്രദേശത്ത് നടത്തിയ ഓപ്പറേഷനിലൂടെ ഒരു വനിതാ സൈനികയെ മോചിപ്പിച്ചതായി ഇസ്രായേൽ സൈന്യം അറിയിച്ചു.

അവശേഷിക്കുന്ന തടവുകാരെ ഉടൻ മോചിപ്പിക്കണമെന്ന് അന്താരാഷ്ട്ര സമൂഹം ആവശ്യപ്പെടണമെന്നും ഇസ്രായേൽ നേതാവ് ആവശ്യപ്പെട്ടു. ഗാസയിലെ പല ആശുപത്രികളെയും യുദ്ധം ബാധിച്ചിട്ടുണ്ട്. യുദ്ധമേഖലയിൽ നിന്ന് രോഗികളെ സുരക്ഷിതമായി മാറ്റാൻ കഴിയില്ലെന്ന് ലോകാരോഗ്യ സംഘടന (ഡബ്ല്യുഎച്ച്ഒ) വ്യക്തമാക്കി. എന്നാൽ കെട്ടിടങ്ങൾക്കും തുരങ്കങ്ങളിലും ഒളിച്ചിരുന്ന നിരവധി തീവ്രവാദികളെ വധിച്ചതായി ഇസ്രായേൽ സൈന്യം പറഞ്ഞു.

അതേസമയം ഇരട്ട പൗരത്വമുള്ള 50 ബന്ദികളെ മോചിപ്പിക്കുന്നതിന് പകരമായി ഇസ്രായേലിനോട് ഇന്ധനം നല്‍കണമെന്ന് ഹമാസ് നേരത്തെ ആവശ്യപ്പെട്ടിരുന്നു. എന്നാല്‍, ഈ ആവശ്യം ഇസ്രായേല്‍ നിരസിച്ചു. ബന്ദികളാക്കിയവരെ വിട്ടയച്ചാല്‍ മാത്രമേ ഇന്ധന വിതരണം അനുവദിക്കൂ എന്നാണ് ഇസ്രായേല്‍ പറയുന്നത്. അതേസമയം ബന്ദികളെ മോചിപ്പിക്കുന്നതുമായി ബന്ധപ്പെട്ട് ഖത്തറും ഈജിപ്തും വഴി ഇസ്രായേലും ഹമാസും തമ്മില്‍ ചര്‍ച്ചകള്‍ നടക്കുന്നുണ്ട്. ഇത് സംബന്ധിച്ച് ഖത്തര്‍ പ്രധാനമന്ത്രിയുടെ പ്രസ്താവനയും പുറത്തുവന്നിട്ടുണ്ട്. ബന്ദികളെ മോചിപ്പിക്കുന്നതിനുള്ള ചര്‍ച്ചകള്‍ പുരോഗമിക്കുകയാണെന്നും ഉടന്‍ വിജയം പ്രതീക്ഷിക്കുമെന്നും ഖത്തര്‍ പ്രധാനമന്ത്രി ഷെയ്ഖ് മുഹമ്മദ് ബിന്‍ അബ്ദുള്‍ റഹ്‌മാന്‍ അല്‍താനി പറഞ്ഞു.

നേരത്തെ ഹമാസ് ബന്ദികളാക്കിയവരെ കുറിച്ചുള്ള വിവരങ്ങൾ കൈമാറുന്ന പലസ്‌തീനികൾക്ക് പാരിതോഷികവും സംരക്ഷണവും ഇസ്രയേൽ പ്രഖ്യാപിച്ചിരുന്നു. ഇത് ചൂണ്ടിക്കാട്ടി കൊണ്ട് ഗാസയിൽ ഇസ്രയേൽ ലഘുലേഖകൾ വിതരണം ചെയ്‌തു.

ഒക്‌ടോബർ 7ന് 1,400 പേരുടെ മരണത്തിനിടയാക്കിയ അതിർത്തി കടന്നുള്ള ആക്രമണത്തിൽ 200ലധികം പേരെ ഹമാസ് തീവ്രവാദി സംഘം പിടികൂടി ബന്ദികളാക്കി. അതിന് ശേഷം ഗാസയിൽ ഇസ്രയേൽ നടത്തിയ വ്യോമാക്രമണത്തിൽ 5,000ത്തിലധികം പേർ കൊല്ലപ്പെട്ടതായി പലസ്‌തീൻ ആരോഗ്യ മന്ത്രാലയം അറിയിച്ചു.

“സമാധാനത്തോടെ ജീവിക്കാനും നിങ്ങളുടെ മക്കൾക്ക് നല്ല ഭാവി ലഭിക്കാനുമാണ് നിങ്ങളുടെ ആഗ്രഹമെങ്കിൽ, ഉടൻ തന്നെ ഈ മാനുഷിക പ്രവൃത്തി ചെയ്യുക, നിങ്ങളുടെ പ്രദേശത്ത് ബന്ദികളാക്കിയിരിക്കുന്നതിനെക്കുറിച്ചുള്ള വിലപ്പെട്ട വിവരങ്ങൾ പങ്കിടുക,” സൈന്യം ലഘുലേഖയിൽ പറഞ്ഞു.

"ഇസ്രയേൽ സൈന്യം നിങ്ങൾക്കും നിങ്ങളുടെ വീടിനും സുരക്ഷിതത്വം നൽകുന്നതിന് പരമാവധി പരിശ്രമം നടത്തുമെന്ന് ഉറപ്പുനൽകുന്നു, കൂടാതെ നിങ്ങൾക്ക് ഒരു സാമ്പത്തിക പാരിതോഷികം ലഭിക്കും. നിങ്ങൾക്ക് പൂർണ്ണമായ രഹസ്യാത്മകതയും ഞങ്ങൾ ഉറപ്പ് നൽകുന്നു." ലഘുലേഖ വ്യക്തമാക്കുന്നു.

വിവരങ്ങൾ സഹിതം വിളിക്കേണ്ട ഫോൺ നമ്പറുകൾ ലഘുലേഖയിൽ രേഖപ്പെടുത്തിയിട്ടുണ്ട്. തെക്കൻ ഗാസയിലെ ഖാൻ യൂനിസിലെ നാസർ ഹോസ്‌പിറ്റലിൽ അഭയം പ്രാപിച്ച ആളുകൾ ഇസ്രയേൽ വിമാനങ്ങൾ ലഘുലേഖകൾ പുറത്തേക്കിട്ട ശേഷം അവ ശേഖരിക്കുകയും കീറിയെറിയുകയും ചെയ്യും.

"നിങ്ങൾ ആഗ്രഹിക്കുന്നതെന്തും ചെയ്തോളു, ഞങ്ങൾ കാര്യമാക്കുന്നില്ല. ഗാസയിലുള്ള ഞങ്ങൾ എല്ലാവരും നിങ്ങളോട് പറയുന്നു, ഞങ്ങൾ കിഴക്ക് നിന്ന് പടിഞ്ഞാറോട്ട് ചെറുത്തുനിൽക്കുകയാണ്." ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെ പരാമർശിച്ചുകൊണ്ട് ഒരു പലസ്‌തീൻകാരൻ പറഞ്ഞു.

ബന്ദികളാക്കിയവരെ മോചിപ്പിക്കാനും ഹമാസിനെ തുടച്ചുനീക്കാനും ഉദ്ദേശിച്ചുള്ള കരവഴിയുള്ള അധിനിവേശത്തിന്റെ ഉത്തരവുകൾക്കായി കാത്തിരിക്കുന്ന ഇസ്രയേൽ സൈന്യം ഗാസ മുനമ്പിന്റെ അതിർത്തിക്ക് സമീപം തടിച്ചുകൂടിയിരിക്കുകയാണ്.

വിദേശ പൗരന്മാരുൾപ്പെടെ ബന്ദികളാക്കിയവരെ ഗാസയിലേക്ക് കൊണ്ടുപോയെന്നും എന്നാൽ അവർ എവിടെയാണെന്ന് കൃത്യമായി അറിയാത്തത് രക്ഷാപ്രവർത്തനത്തെ സങ്കീർണ്ണമാക്കിയെന്നും ഇസ്രയേൽ പറയുന്നു. നേരത്തെ നാല് ബന്ദികളെ ഹമാസ് മോചിപ്പിച്ചിരുന്നു.