നവംബര്‍ ഒന്ന്, കേരളപ്പിറവി ദിനം... അറുപത്തിയേഴാം കേരളപ്പിറവി ദിനം ആഘോഷിക്കാനൊരുങ്ങി മലയാളികള്‍, സര്‍ക്കാര്‍ തലത്തിലും അല്ലാതെയുമായി വിപുലമായ രീതിയില്‍ ഇത്തവണയും കേരളപ്പിറവി ആഘോഷിക്കുന്നു, സര്‍ക്കാര്‍ നടത്തുന്ന കേരളീയം പരിപാടിയാണ് ഇത്തവണത്തെ മുഖ്യ ആകര്‍ഷണീയത


ഏഴു ദിനരാത്രങ്ങള്‍ തലസ്ഥാനത്തെ വൈവിദ്ധ്യങ്ങളുടെ ഉത്സവത്തിലേക്ക് കൂട്ടുന്ന കേരളീയം മഹോത്സവത്തിന് ഇന്നാണ് മിഴിതുറക്കുന്നത്. രാവിലെ 10ന് സെന്‍ട്രല്‍ സ്റ്റേഡിയത്തില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. മന്ത്രി കെ. രാജന്‍ അദ്ധ്യക്ഷനാകും. ചലച്ചിത്ര താരങ്ങളായ മമ്മൂട്ടി, മോഹന്‍ലാല്‍, കമല്‍ഹാസന്‍, ശോഭന, മഞ്ജു വാര്യര്‍ എന്നിവര്‍ പങ്കെടുക്കും.

കവടിയാര്‍ മുതല്‍ കിഴക്കേകോട്ട വരെയുള്ള 42 വേദികളിലാണ് കേരളീയം നടക്കുന്നത്. നവകേരളത്തിന്റെ ഭാവി രൂപരേഖ തയ്യാറാക്കുന്നതിനുള്ള 25 സെമിനാറുകള്‍ അഞ്ച് വേദികളിലായി നടക്കും.


കാര്‍ഷിക വ്യാവസായിക രംഗങ്ങളിലെ പുരോഗതിയും ഭാവി ലക്ഷ്യങ്ങളും സെമിനാറില്‍ ചര്‍ച്ചയാകും. ഇരുനൂറിലധികം ദേശീയ,? അന്തര്‍ദേശീയ പ്രഭാഷകര്‍ പങ്കെടുക്കും.എല്ലാ ദിവസവും വൈകുന്നേരം ആറു മുതല്‍ കലാപരിപാടികള്‍ അരങ്ങേറും. 30 വേദികളിലായി 300 ലധികം കലാപരിപാടികള്‍ നടക്കും. 4,100 കലാകാരന്മാര്‍ പങ്കെടുക്കും. വൈദ്യുത ദീപാലങ്കാരം, ചലച്ചിത്ര മേള, ബി 2 ബി മീറ്റ് എന്നിവയും നടക്കും.



എക്സിബിഷന്‍, ട്രേഡ് ഫെയര്‍, ഭക്ഷ്യമേളകള്‍, ഫ്‌ളവര്‍ഷോ തുടങ്ങിയ പരിപാടികള്‍ രാവിലെ 10 മുതല്‍ രാത്രി 10 വരെ നടക്കും. എട്ട് വേദികളിലായുള്ള ട്രേഡ് ഫെയറുകളില്‍ 425 സംരംഭകര്‍ പങ്കെടുക്കും. മാനവീയം വീഥി മുതല്‍ കിഴക്കേകോട്ട വരെ പതിനൊന്ന് വേദികളിലായി കേരളത്തിന്റെ തനത് രുചികളുള്‍പ്പെടുത്തി ഫുഡ് ഫെസ്റ്റിവലും നടക്കുന്നതാണ്.