കൊടിക്കുന്നില്‍ സുരേഷ് എംപിയും ഏതാനും പേരുമായി തങ്ങള്‍ വാടകയ്ക്ക് താമസിക്കുന്ന വീട്ടില്‍ എത്തി ദേഹോപദ്രവം ഏല്‍പ്പിക്കുകയാണ് ഉണ്ടായതെന്ന് കൊടിക്കുന്നിലിനെ കല്ലെറിഞ്ഞ കേസില്‍ അറസ്റ്റിലായ കൊച്ചാലയം അശോകന്റെ ഭാര്യ ഗീതയും മക്കളായ നിഖില്‍, നീഖിത എന്നിവരും വാര്‍ത്താസമ്മേളനത്തില്‍ പറഞ്ഞു.
നന്തന്‍കോട് കനകനഗറില്‍ കൊടിക്കുന്നില്‍ സുരേഷ് എംപിയുടെ സഹോദരി പുത്രി ഷീജയുടെ ഭര്‍ത്താവിന്റെ അമ്മയുടെ വീട്ടിലാണ് തങ്ങള്‍ താമസിക്കുന്നത്. അവിടെ എത്തി നിരന്തരമായി ശല്യപ്പെടുത്തുന്നത് ഷീജയാണ്. ഇതു സംബന്ധിച്ച് പരാതി മ്യൂസിയം പൊലീസ് സ്‌റ്റേഷനിലും കൊടിക്കുന്നിലിനും നല്‍കിയിട്ടുണ്ട്. ഒത്തുതീര്‍പ്പിനായിട്ടല്ല കൊടിക്കുന്നിലും ആളുകളും എത്തിയത്. വന്ന പാടെ തല്ലുകയായിരുന്നു. ഇത് കണ്ടവരുണ്ട്. അവരെല്ലാം പൊലീസില്‍ മൊഴി നല്‍കിയിട്ടുണ്ട് ഇവര്‍ പറഞ്ഞു.
ഷീജയുടെ അമ്മായിയുടെ കുടുംബവീട്ടില്‍ വര്‍ഷങ്ങളായി വാടകയ്ക്കു താമസിക്കുന്നയാളാണ് പാസ്റ്റര്‍ അശോകനും ഭാര്യ ഗീതയും. വീട് ഒഴിയുന്നതുമായി ബന്ധപ്പെട്ട് ഇരുവരും തമ്മില്‍ തര്‍ക്കം നിലവിലുണ്ട്. വനിതാ കമ്മിഷനില്‍ ഉള്‍പ്പെടെ ഇതുമായി ബന്ധപ്പെട്ട കേസ് നിലനില്‍ക്കുന്നുണ്ട്. ഇത് പരിഹരിക്കാനാണ് കൊടിക്കുന്നില്‍ എത്തിയത്.
വിഷയം പറഞ്ഞുതീര്‍ക്കാമെന്നു പറഞ്ഞ് പാസ്റ്ററെയും ഭാര്യ ഗീതയെയും വിളിച്ചുവരുത്തിയ എംപിയും സംഘവും ഇവര്‍ക്കു നേരെ അസഭ്യവര്‍ഷം നടത്തുകയായിരുന്നെന്ന് അയല്‍വാസികള്‍ പറഞ്ഞു. അശോകനെയും ഭാര്യയെയും കൈയേറ്റം ചെയ്യാന്‍ ശ്രമിച്ചതോടെ ഇരുവരും കല്ലെറിഞ്ഞു. ഇഷ്ടികയും ചെടിച്ചട്ടിയുമായുള്ള പാസ്റ്ററുടെ ആക്രമണത്തില്‍ എംപി അടിതെറ്റി വീണു. ഷീജയുടെ വീട്ടിലെ ഗേറ്റും കല്ലേറില്‍ തകര്‍ന്നു. മുഖത്തും കഴുത്തിലും മുറിവേറ്റ കൊടിക്കുന്നില്‍ പൊലീസില്‍ വിവരമറിയിച്ചു.
മ്യൂസിയം എസ്.ഐയുടെ നേതൃത്വത്തിലെത്തിയ സംഘം അശോകനെ ആദ്യം കസ്റ്റഡിയിലെടുത്തു. തുടര്‍ന്നു നടത്തിയ പ്രാഥമിക അന്വേഷണത്തില്‍ എംപിയും കൂട്ടരുമാണ് ആദ്യം ആക്രമണം നടത്തിയതെന്നു ബോധ്യപ്പെട്ടു. എന്നാല്‍ ഗീതയെയും കസ്റ്റഡിയിലെടുത്തു കേസ് രജിസ്റ്റര്‍ ചെയ്യുകയായിരുന്നു. തന്നെ ആക്രമിച്ചത് സിപിഐ(എം). ഗുണ്ടകളാണെന്ന് കൊടിക്കുന്നില്‍ സുരേഷ് പറയുന്നു.
അതേസമയം എംപിയും സംഘവും ദമ്പതികളെ ആക്രമിച്ചെന്ന പരാതിയുമായി സിപിഎമ്മും രംഗത്തെത്തി. വീടുകയറിയുള്ള ആക്രമണത്തിന്റെ പേരില്‍ എംപിക്കെതിരെ കേസെടുക്കണമെന്ന് ആവശ്യപ്പെട്ട് മ്യൂസിയം പൊലീസ് സ്‌റ്റേഷനു മുന്നില്‍ സിപിഐ(എം) ജില്ലാ സെക്രട്ടറിയുടെ നേതൃത്വത്തില്‍ പ്രവര്‍ത്തകര്‍ ധര്‍ണ നടത്തി. എംപിക്കെതിരെയും കേസെടുക്കുമെന്ന് പൊലീസ് ഉറപ്പ് നല്‍കിയതിനെ തുടര്‍ന്നാണ് ധര്‍ണ അവസാനിപ്പിച്ചത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha