ഓട്ടോ ഡ്രൈവര് പൊലീസ് കസ്റ്റഡിയില് മരിച്ചു
വാഹന പരിശോധനയ്ക്കിടെ മദ്യപിച്ചെന്നാരോപിച്ച് പിടികൂടിയ ഓട്ടോ ഡ്രൈവര് പൊലീസ് കസ്റ്റഡിയില് മരിച്ചു.വിളപ്പില്ശാല പടവന്കോട് അബുമന്സിലില് സുധീര്ഖാനാണ് (40) മരിച്ചത്. പൂജപ്പുര പൊലീസാണ് ഇന്നലെ രാത്രി 9.30 ഓടെ സുധീര്ഖാനെ കസ്റ്റഡിയിലെടുത്തത്. സുധീര്ഖാന്റെ മരണത്തില് ദുരൂഹത ആരോപിച്ച് ബന്ധുക്കളും നാട്ടുകാരും രംഗത്തെത്തിയത് പൂജപ്പുരയിലും തിരുവനന്തപുരം ജനറല് ആശുപത്രിയിലും സംഘര്ഷാവസ്ഥയ്ക്ക് ഇടയാക്കി.
വിളപ്പില്ശാലയിലെ ഓട്ടോഡ്രൈവറായ സുധീര്ഖാന് ഇന്നലെ രാത്രി നഗരത്തില് ഓട്ടം വന്ന് മടങ്ങും വഴി തിരുമല ഭാഗത്തുനിന്നാണ് കസ്റ്റഡിയിലെടുത്തത്. പൂജപ്പുര സ്റ്റേഷനില് നൈറ്റ് ഡ്യൂട്ടിയിലായിരുന്ന എസ്.ഐ ശാന്തപ്പനും സംഘവുമാണ് പിടികൂടിയത്. മദ്യപിച്ചെന്നാരോപിച്ച് വാഹന പരിശോധനയ്ക്കിടെ കസ്റ്റഡിയിലെടുത്ത സുധീര്ഖാനെ ഇവര് സ്റ്റേഷനിലെത്തിച്ചു. ഇക്കാര്യം വീട്ടുകാരെ അറിയിക്കുകയും ചെയ്തു. സ്റ്റേഷനിലെത്തി അല്പ്പനേരം അവിടെ ഇരിക്കുകയും പിന്നീട് സ്റ്റേഷനില് കിടക്കുകയും ചെയ്ത സുധീര്ഖാന് ദേഹാസ്വാസ്ഥ്യമുണ്ടായെന്ന പേരില് പുലര്ച്ചെ 1.30 ഓടെ ജനറല് ആശുപത്രിയിലെത്തിച്ചെങ്കിലും അപ്പോഴേക്കും മരണം സംഭവിച്ചുവെന്നാണ് പൊലീസ് നല്കുന്ന വിവരം.
പൊലീസ് ജീപ്പിലും സ്റ്റേഷനിലും വച്ച് സുധീര്ഖാനെ പൊലീസ് ഉപദ്രവിച്ചതാണ് മരണത്തിന് കാരണമെന്നാണ് ബന്ധുക്കളുടെ ആരോപണം. ഇയാളുടെ മുഖത്തും മറ്റ് ശരീരഭാഗങ്ങളിലും മുറിവുകളും പരിക്കുകളുമുള്ളതായി സംഭവമറിഞ്ഞെത്തിയ ബന്ധുക്കള് പറയുന്നു. ഡി.വൈ.എഫ്.ഐയുടെയും സി.പി.എമ്മിന്റെയും സജീവ പ്രവര്ത്തകനായ സുധീര്ഖാന് പൊലീസ് കസ്റ്റഡിയില് മരിച്ചതറിഞ്ഞ് വിളപ്പില്ശാലയില്നിന്ന് സി.പി.എം. പ്രവര്ത്തകരും നാട്ടുകാരും ബന്ധുക്കളും പൂജപ്പുര പൊലീസ് സ്റ്റേഷനിലും ജനറല് ആശുപത്രി പരിസരത്തും സംഘടിച്ചു.
സംഭവമറിഞ്ഞ് ജനറല് ആശുപത്രിയിലെത്തിയ സിറ്റി പൊലീസ് കമ്മിഷണര് സ്പര്ജന്കുമാറിനെ സി.പി.എം പ്രവര്ത്തകരും രോഷാകുലരായ നാട്ടുകാരും ചേര്ന്ന് തടഞ്ഞു. നാട്ടുകാരുടെയും പ്രവര്ത്തകരുടെയും പ്രതിഷേധം കണക്കിലെടുത്ത് കമ്മിഷണര് ആശുപത്രിയില് നിന്ന് പൂജപ്പുര സ്റ്റേഷനിലേക്ക് മടങ്ങി. കമ്മിഷണര് സ്റ്റേഷനിലെത്തിയ വിവരം അറിഞ്ഞ് സി.പി.എം പ്രവര്ത്തകരും നാട്ടുകാരും സുധീര്ഖാനെ മര്ദ്ദിച്ച് കൊലപ്പെടുത്തിയ പൊലീസുദ്യോഗസ്ഥര്ക്കെതിരെ നടപടി ആവശ്യപ്പെട്ട് സ്റ്റേഷന് ഉപരോധിച്ചു. സി.പി.എം വിളപ്പില് ശാല ഏരിയാ സെക്രട്ടറി പുത്തന്കട വിജയന്റെ നേതൃത്വത്തില് പ്രവര്ത്തകര് പൂജപ്പുരയില് റോഡ് ഉപരോധിച്ചിരിക്കുകയാണ്.
ഭാര്യ: സാജിത.മക്കള്: സഫുവാന്,അഹമ്മദ്,വലീദ്. സൗദിഅറേബ്യയിലുള്ള പിതാവ് സംഭവമറിഞ്ഞ് നാട്ടിലേക്ക് തിരിച്ചിട്ടുണ്ട്. ഖബറടക്കം പിന്നീട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
