നടുക്കടലില്‍ എന്തുചെയ്യണമെന്നറിയാതെ ഇന്ത്യയോട് സഹായമഭ്യര്‍ത്ഥിച്ച പാകിസ്ഥാന്‍കാരെ ഇന്ത്യ നിരാശപ്പെടുത്തിയില്ല. അറബി കടലില്‍ ഇറാനിയന്‍ ബോട്ട് പിടിച്ചെടുത്ത കടല്‍ കൊള്ളക്കാരെ ഇന്ത്യന്‍ നാവിക സേന കീഴടക്കി. 12 മണിക്കൂര്‍ നീണ്ട ശ്രമത്തിന് ഒടുവിലാണ് സോമാലിയന്‍ കടല്‍ കൊള്ളക്കാരെ കീഴടക്കിയത്. ബോട്ടിലുണ്ടായിരുന്ന 23 പാകിസ്ഥാന്‍ മത്സ്യതൊഴിലാളികളേയിം സുരക്ഷിതമായി രക്ഷിച്ചു.

ഐഎന്‍എസ് സുമേധ, ഐഎന്‍എസ് തൃശൂല്‍ എന്നീ പടക്കപ്പലുകളാണ് രക്ഷാദൗത്യത്തില്‍ പങ്കെടുത്തത്. ഇറാനിയന്‍ ബോട്ടായ അല്‍ കാമ്പറാണ് കടല്‍കൊള്ളക്കാര്‍ പിടിച്ചെടുത്തത്. വിവരം ലഭിച്ചയുടന്‍ മേഖലയില്‍ പട്രോളിങ് നടത്തുകയായിരുന്ന ഇന്ത്യന്‍ നാവിക സേന രക്ഷാപ്രവര്‍ത്തനത്തിനായി ഇവിടേക്ക് പോവുകയായിരുന്നു.

കഴിഞ്ഞ ദിവസം വൈകീട്ടാണ് ഇറാനിയന്‍ ബോട്ടിനെ കൊള്ളക്കാര്‍ തട്ടിയെടുത്തു എന്ന വിവരം ലഭിച്ചത്. പിന്നാലെ രണ്ട് നാവികസേന പടകപ്പലുകളാണ് രക്ഷപ്രവര്‍ത്തനം ആരംഭിച്ചത്. ബോട്ടിനുള്ളില്‍ ഉണ്ടായിരുന്ന എല്ലാവരും പാകിസ്ഥാന്‍ സ്വദേശികളായിരുന്നു. ഇവരെ എല്ലാവരെയും രക്ഷിച്ചതോടെ അന്താരാഷ്ട്ര സമൂഹത്തിന് മുന്നിലും ഇന്ത്യന്‍ നാവികസേനയുടെ അഭിമാനം ഉയര്‍ന്നു. പാകിസ്ഥാന്‍കാര്‍ ഇന്ത്യന്‍ നാവിക സേനയെ നന്ദിയറിയിച്ചു.

101 ദിവസത്തിനിടെ അറബിക്കടലിലും ഏദന്‍ ഉള്‍ക്കടലിലുമായി നടത്തിയ വിവിധ ദൗത്യങ്ങളിലൂടെ 45 ഇന്ത്യക്കാരും 88 വിദേശ പൗരന്മാരുമുള്‍പ്പെടെ 133 പേരുടെ ജീവന്‍ രക്ഷിച്ചത്. വിദേശികളില്‍ 50 പേര്‍ പാകിസ്ഥാനികളും 30 പേര്‍ ഇറാനികളും ഉള്‍പ്പെടുന്നു.

നേവിയുടെ 'ഓപ്പറേഷന്‍ സങ്കല്‍പി'ന്റെ ഭാഗമായിട്ടായിരുന്നു രക്ഷാദൗത്യങ്ങള്‍. ചെങ്കടല്‍ മേഖലയില്‍ വാണിജ്യ കപ്പലുകള്‍ക്ക് നേരെ യെമനിലെ ഹൂതി വിമതര്‍ നടത്തുന്ന മിസൈല്‍ - ഡ്രോണ്‍ ആക്രമണങ്ങള്‍, അറബിക്കടലിലെയും കിഴക്കന്‍ സൊമാലിയന്‍ തീരത്തെയും കടല്‍ക്കൊള്ളക്കാരുടെ സാന്നിദ്ധ്യം എന്നീ പശ്ചാത്തലങ്ങള്‍ മുന്‍നിറുത്തിയാണ് നേവി ഓപ്പറേഷന്‍ സങ്കല്‍പ് ആരംഭിച്ചത്.

ഇക്കാലയളവിനിടെ 19 സമുദ്ര സുരക്ഷാ ദൗത്യങ്ങളിലാണ് നേവി ഭാഗമായത്. ക്രൂഡ് ഓയില്‍ അടക്കം 15 ലക്ഷം ടണ്‍ ചരക്കുകളാണ് വിവിധ വാണിജ്യ കപ്പലുകളെ രക്ഷിച്ചതിലൂടെ നേവി സുരക്ഷിതമാക്കിയത്. ഇതിനിടെ 3000 കിലോഗ്രാമിലേറെ മയക്കുമരുന്നും പിടികൂടി. നിരീക്ഷണ വിവരങ്ങളുടെ വിശകലനത്തിന്റെ അടിസ്ഥാനത്തിലാണ് നേവി ദൗത്യങ്ങളില്‍ ഇടപെട്ടിരുന്നത്. നേവിയുടെ ഗുരുഗ്രാമിലുള്ള ഇന്‍ഫര്‍മേഷന്‍ ഫ്യൂഷന്‍ സെന്റര്‍ സെന്റര്‍ - ഇന്ത്യന്‍ ഓഷന്‍ റീജിയന്‍ വിവരങ്ങളുടെ കൈമാറ്റത്തില്‍ പ്രധാന കണ്ണിയായി.സൊമാലിയന്‍ കടല്‍ക്കൊള്ളക്കാരുടെ പിടിയിലകപ്പെട്ട മാള്‍ട്ട രജിസ്‌ട്രേഷനുള്ള എം.വി. റുവന്‍ എന്ന കപ്പലിനെ 40 മണിക്കൂര്‍ നീണ്ട രക്ഷാദൗത്യത്തിനൊടുവില്‍ നേവി രക്ഷിച്ചതും 35 കടല്‍ക്കൊള്ളക്കാരെ കീഴടക്കിയതും അന്താരാഷ്ട്ര ശ്രദ്ധനേടിയിരുന്നു.

അറബിക്കടലിലെ പ്രതിരോധം ശക്തിപ്പെടുത്തുന്നതിനായി ഇന്ത്യന്‍ നാവികസേന 10 യുദ്ധക്കപ്പലുകളും നിരീക്ഷണ വിമാനങ്ങളും ഡ്രോണുകളും വിന്യസിച്ചിട്ടുണ്ട്. കടല്‍ക്കൊള്ളക്കാര്‍ക്കെതിരെ പ്രവര്‍ത്തിക്കാന്‍ പ്രത്യേക പരിശീലനം ലഭിച്ച മറൈന്‍ കമാന്‍ഡോകളുമുണ്ട്.

മുമ്പ് എം.വി. റുവനില്‍ നിന്ന് നേവി പിടികൂടിയ 35 കടല്‍കൊള്ളക്കാരെയും ഇന്നലെ മുംബയിലെത്തിച്ചു. ഇവരെ തുടര്‍ നിയമനടപടികള്‍ക്കായി മുംബയ് പൊലീസിന് കൈമാറി. ഐ.എന്‍.എസ് കൊല്‍ക്കത്ത യുദ്ധക്കപ്പലിലാണ് ഇവരെ മുംബയ് തീരത്ത് എത്തിച്ചത്. ബള്‍ഗേറിയന്‍ കമ്പനിയുടെ ചരക്കുകപ്പലായ എം.വി. റുവനെ ഡിസംബര്‍ 14നാണ് 18 ജീവനക്കാരെ സഹിതം കൊള്ളക്കാര്‍ തട്ടിയെടുത്തത്. ഇന്ത്യന്‍ യുദ്ധക്കപ്പല്‍ ഐ.എന്‍.എസ് കൊച്ചി അന്ന് എം.വി.റുവന് അടുത്തെത്തിയെങ്കിലും സോമാലിയന്‍ തീരത്തേക്ക് അവര്‍ രക്ഷപ്പെട്ടിരുന്നു.

റുവനെ 'മദര്‍ ഷിപ്പ്' ആക്കി മറ്റ് ചരക്കുകപ്പലുകള്‍ പിടിച്ചെടുക്കാനുള്ള ശ്രമത്തിലായിരുന്നു സൊമാലിയന്‍ കടല്‍ക്കൊള്ളക്കാര്‍. കപ്പലിന് നിരീക്ഷിച്ചിരുന്ന നേവി ഈ മാസം 16ന് അറബിക്കടലില്‍ വച്ച് കടല്‍ക്കൊള്ളക്കാരെ കീഴടക്കി കപ്പലിനെയും ബന്ദികളാക്കപ്പെട്ട ജീവനക്കാരെയും രക്ഷിക്കുകയായിരുന്നു.