സര്‍ക്കാര്‍ഭൂമി കൈയേറ്റത്തില്‍ ഇടപെടണമെന്നാവശ്യപ്പെട്ട് തനിക്കു കോണ്‍ഗ്രസ് എം.എല്‍.എ ടി.എന്‍. പ്രതാപന്‍ കത്തയച്ചെന്ന പ്രതിപക്ഷനേതാവ് വി.എസ്. അച്യുതാനന്ദന്റെ പ്രസ്താവനയെച്ചൊല്ലി വിവാദം. താന്‍ വി.എസിനു കത്തയച്ചിട്ടേയില്ലെന്നു ടി.എന്‍. പ്രതാപന്‍ പ്രതികരിച്ചതോടെ നേതാക്കള്‍ ആശയക്കുഴപ്പത്തിലായി. അവസാനം വി.എസ്. പ്രസ്താവന തിരുത്തി രാഷ്ട്രീയമാന്യത കാട്ടിയതോടെ പ്രതാപനും ആശ്വാസമായി.
സര്‍ക്കാര്‍ഭൂമി കൈയേറി നിര്‍മിച്ച ആലപ്പുഴ പണാവള്ളിയിലെ റിസോര്‍ട്ട് പൊളിച്ചു കളയണമെന്ന് ഹൈക്കോടതി ഉത്തരവുണ്ടായിട്ടും സര്‍ക്കാര്‍ നടപടിയെടുക്കുന്നില്ല. അതിനാല്‍ വി.എസ്. പ്രശ്‌നത്തില്‍ ഇടപെടണമെന്നാവശ്യപ്പെട്ട് ടി.എന്‍. പ്രതാപന്‍ എം.എല്‍.എ തനിക്കു കത്ത് അയച്ചു എന്നായിരൂന്നു വി.എസിന്റെ പ്രസ്താവന. നിലവിലെ പൊതുസ്ഥിതിയുടെ പ്രതിഫലനമാണ് പ്രതാപന്റെ കത്തെന്നും വി.എസ്. പ്രതികരിച്ചു. മുഖ്യമന്ത്രിയും മന്ത്രിമാരും സര്‍ക്കാര്‍ഭൂമി അന്യാധീനപ്പെടുത്താന്‍ മത്സരിക്കുകയാണ്. ജനകീയപ്രക്ഷോഭങ്ങളിലൂടെയെ സര്‍ക്കാരിനെ നിലയ്ക്കു നിര്‍ത്താനാകൂ. പ്രതാപനുള്‍പ്പെടെ നീതിയും ന്യായവും നടപ്പാക്കണമെന്നാഗ്രഹിക്കുന്ന കോണ്‍ഗ്രസ്, യു.ഡി.എഫ്. നേതാക്കളുടെ പിന്തുണ ഈ പ്രക്ഷോഭത്തിനു വേണമെന്നും വി.എസ്. പ്രസ്താവനയില്‍ അഭ്യര്‍ഥിച്ചു.
ഇതോടെയാണ് താന്‍ ഇങ്ങനെ ഒരു കത്ത് വി.എസിന് അയച്ചിട്ടില്ലെന്നു പ്രതാപന്‍ പ്രതികരിച്ചത്. വി.എസ്. മുഖ്യമന്ത്രിയായിരുന്ന ഘട്ടത്തില്‍പ്പോലും അദ്ദേഹത്തിനു കത്തയച്ചിട്ടില്ല. മറിച്ചുള്ള പ്രതികരണം തെറ്റാണെന്നും പ്രതാപന്‍ പറഞ്ഞു.
തുടര്‍ന്നു നടത്തിയ പരിശോധനയിലാണു ടി.എന്‍. പ്രതാപന്‍ കത്തെയച്ചിട്ടില്ലെന്നു വി.എസിനും ബോധ്യപ്പെട്ടത്. റിസോര്‍ട്ട് പൊളിച്ചുമാറ്റണമെന്നാവശ്യപ്പെട്ട് സമരം നടത്തുന്ന സമരസമിതി കണ്‍വീനറുടെ കത്താണ് വി.എസിനു ലഭിച്ചത്. ഇദ്ദേഹത്തിന്റെ പേരും ടി.എന്‍. പ്രതാപന്‍ എന്നായതാണ് ആശയക്കുഴപ്പത്തിനു വഴിവച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha