പീഡന കേസില്പ്പെട്ട അധ്യാപകന് ദേവസ്വം വിജിലന്സ് റിപ്പോര്ട്ട് മറികടന്ന് സാംസ്കാരിക വിഭാഗത്തില് നിയമനം
വിദ്യാര്ഥിയെ പ്രകൃതിവിരുദ്ധ ലൈംഗികപീഡനത്തിനിരയാക്കിയ ക്ഷേത്രകലാപീഠം പ്രധാനാധ്യാപകനു ദേവസ്വം ബോര്ഡ് ആസ്ഥാനത്തെ സാംസ്കാരിക വകുപ്പില് നിയമനം ഇദ്ദേഹത്തെ സര്വീസില്നിന്നു സസ്പെന്ഡ് ചെയ്യാന് അടിയന്തര നടപടി സ്വീകരിക്കണമെന്ന ദേവസ്വം വിജിലന്സിന്റെ റിപ്പോര്ട്ട് മറികടന്നാണ് ഈ നിയമനം. ഇദ്ദേഹത്തിനെതിരേ വൈക്കം കോടതിയിലും പോലീസിലും കേസ് നിലനില്ക്കെയാണ് ബോര്ഡ് സാംസ്കാരിക വിഭാഗത്തിലേക്കു മാറ്റിയത്. തിരുവിതാംകൂര് ദേവസ്വം ബോര്ഡിനു കീഴിലുള്ള വൈക്കം ക്ഷേത്രകലാപീഠത്തിലെ പ്രധാനാധ്യാപകനാണ് പ്രകൃതിവിരുദ്ധ പീഡനക്കേസില്പ്പെട്ടത്. ആറ്റിങ്ങല് ക്ഷേത്രകലാപീഠം നിര്ത്തലാക്കിയതിനെത്തുടര്ന്നാണ് ഇദ്ദേഹത്തെ വൈക്കത്തേക്കു മാറ്റിയത്. 2015 ല് ജൂണില് പ്രധാനാധ്യാപകന് ഉച്ചഭക്ഷണം എടുത്തുകൊടുക്കാന് പോയ മൂന്നാംവര്ഷ പഞ്ചവാദ്യം വിദ്യാര്ഥിയെയാണ് പ്രകൃതിവിരുദ്ധപീഡനത്തിനിരയാക്കാന് ശ്രമിച്ചത്. വിവരമറിഞ്ഞ നാട്ടുകാര് ഇയാളെ പിടിച്ചുകെട്ടി ദേവസ്വം വിജിലന്സിനെ ഏല്പ്പിക്കുകയായിരുന്നു. ദേവസ്വം വിജിലന്സ് നടത്തിയ അന്വേഷണത്തില് വിദ്യാര്ഥിയുടെ പരാതിയില് പറയുന്ന കാര്യങ്ങള് സത്യമാണെന്ന് കണ്ടെത്തി. മാത്രമല്ല പ്രധാന അധ്യാപകനെതിരേ നേരത്തേതന്നെ ഇത്തരത്തിലുള്ള ആരോപണം നിലവിലുള്ളതായും കണ്ടെത്തി. കലാപീഠത്തിലെ അധ്യാപകര് അവര്ക്ക് കഴിക്കാനുള്ള ഭക്ഷണം വിദ്യാര്ഥികളെക്കൊണ്ട് തങ്ങളുടെ മുറികളിലേക്ക് എടുത്തുവയ്പ്പിക്കുന്നതായും അന്വേഷണത്തില് തെളിഞ്ഞു. ക്ഷേത്രത്തോട് ചേര്ന്ന് പരിപാവനമായി കണക്കാക്കുന്ന സ്ഥാപനത്തിലെ പ്രധാനാധ്യാപകന്റെ ഈ നടപടി നീതികരിക്കാന് കഴിയാത്തതാണെന്നും സ്ഥാപനത്തിന്റെ യശഃസിന് കളങ്കം വരുത്തുന്നതാണെന്നും വിജിലന്സ് റിപ്പോര്ട്ടില് എടുത്തുപറയുന്നു. മാതൃകാപരമായ ശിക്ഷാനടപടി സ്വീകരിക്കണമെന്നും ഇദ്ദേഹത്തെ സര്വീസില്നിന്നു സസ്പെന്ഡ് ചെയ്യണമെന്നും റിപ്പോര്ട്ടില് ശിപാര്ശ ചെയ്യുന്നു. അടിയന്തര നടപടി സ്വീകരിക്കണമെന്നാണ് റിപ്പോര്ട്ടില് ആവശ്യപ്പെട്ടിട്ടുള്ളത്. കൂടാതെ വിദ്യാര്ഥിയുടെ പരാതിയില് ക്രിമിനല്കേസ് രജിസ്റ്റര് ചെയ്ത് അന്വേഷണം നടത്തുന്നതിന് പോലീസിന് റിപ്പോര്ട്ട് നല്കാന് ക്ഷേത്രകലാപീഠം മാനേജര്ക്ക് നിര്ദേശം നല്കണമെന്നും റിപ്പോര്ട്ടില് പറയുന്നു. എന്നാല് ദേവസ്വം ബോര്ഡാകട്ടെ ഒരു തരത്തിലുള്ള ശിക്ഷാനടപടിയും എടുത്തില്ലെന്നു മാത്രമല്ല ആരോപണവിധേയനായ പ്രധാനാധ്യാപകനെ ബോര്ഡിന്റെ ഏറ്റവും പ്രധാനപ്പെട്ട സാംസ്കാരിക വിഭാഗത്തിലേക്കു മാറ്റുകയുംചെയ്തു. ദേവസ്വം ബോര്ഡ് നടപടി സ്വീകരിക്കാതിരുന്നതിനാല് വിദ്യാര്ഥി പോലീസില് പരാതി നല്കി. തുടര്ന്ന് വിദ്യാര്ഥിയുടെ മാതാവ് വൈക്കം സബ്കോടതിയില് പരാതി ഫയല് ചെയ്തു. എന്നിട്ടും പ്രധാനാധ്യാപകനെതിരേ ദേവസ്വം ബോര്ഡ് നടപടിയെടുത്തില്ല. ക്ഷേത്രവാദ്യമല്ലാത്ത മുഖര്ശംഖ് വാദ്യക്കാരനായ ഇദ്ദേഹം പ്യൂണ് തസ്തികയില് ജോലി ചെയ്യുകയായിരുന്നു. എന്നാല് വഴിവിട്ട രീതിയിലൂടെ അധ്യാപകനായും തുടര്ന്ന് പ്രധാനാധ്യാപകനായി നിയമിച്ചു. ഈ നിയമനത്തിനെതിരേയും കലാപീഠത്തിലെ നിരവധി അധ്യാപകര് നല്കിയ പരാതികള് ബോര്ഡിന്റെ മുന്നിലുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
