സെപ്റ്റിക് ടാങ്ക് വൃത്തിയാക്കാനിറങ്ങിയ തൊഴിലാളിയും രക്ഷിക്കാനായി ശ്രമിച്ച വീട്ടമ്മയും മകനും ശ്വാസംമുട്ടി മരിച്ചു. കണ്ണൂര്‍ ചെമ്പിലോട് കെ.വി. റോഡ് ചാത്തോത്ത് കുളത്തിനു സമീപം ഇന്നലെ വൈകിട്ടു നാലിനാണ് അപകടം. ചെമ്പിലോട് സ്വദേശി പള്ളിപ്പൊയില്‍ ചാത്തോത്ത് കളത്തില്‍ രഘൂത്തമന്റെ ഭാര്യ സതി (50), മകന്‍ രതീഷ് (30), കണ്ണൂര്‍ വളപട്ടണം മന്ന സ്വദേശി മുനീര്‍ (35) എന്നിവരാണു മരിച്ചത്.

സതിയുടെ വീട്ടിലെ സെപ്റ്റിക് ടാങ്ക് വൃത്തിയാക്കാനിറങ്ങിയ മുനീര്‍ ശ്വാസം കിട്ടാതെ ബോധരഹിതനായി. ഇതുകണ്ട് രക്ഷിക്കാനിറങ്ങിയ രതീഷും ബോധരഹിതനായി വീണതോടെ ഇരുവരെയും രക്ഷിക്കാന്‍ സതി ടാങ്കിലേക്ക് ഇറങ്ങാന്‍ ശ്രമിച്ചു. ഇതിനിടെ ഏണിയില്‍ കാല്‍ കുടുങ്ങി തലകീഴായി വീഴുകയായിരുന്നു. കണ്ണൂരില്‍നിന്ന് അഗ്‌നിശമനസേനയെത്തി പുറത്തെടുത്തപ്പോഴേക്ക് വിഷവാതകം ശ്വസിച്ച് മൂവരുടെയും മരണം സംഭവിച്ചിരുന്നു.

മൂന്നുമീറ്റര്‍ താഴ്ചയുള്ള സെപ്റ്റിക് ടാങ്ക് വൃത്തിയാക്കാന്‍ ഇറങ്ങുന്നതിനു മുമ്പ്, ദുര്‍ഗന്ധം ഒഴിവാക്കാനുള്ള രാസവസ്തു ഒഴിച്ചിരുന്നു. ഇതാണ് അപകടകാരണമെന്നാണു പ്രാഥമികനിഗമനം. അപകടസമയം സതിയുടെ ഭര്‍ത്താവ് രഘൂത്തമന്‍ വീട്ടിലില്ലായിരുന്നു. മൃതദേഹങ്ങള്‍ കണ്ണൂര്‍ ജില്ലാ ജനറല്‍ ആശുപത്രിയില്‍. രതീഷ് കോയേ്‌ാേട് ഹസന്‍മുക്കില്‍ തയ്യല്‍ തൊഴിലാളിയാണ്. ജിതേഷ് (ഗള്‍ഫ്), ജിഷ് (കാപ്പാട്) എന്നിവരാണു സതിയുടെ മറ്റു മക്കള്‍. രതീഷിന്റെ ഭാര്യ: രസ്‌ന. മകള്‍: ദിയ. മുനീറിന്റെ ഭാര്യ നബീസ. മക്കള്‍: മുബഷിന, മുനവീര്‍. മരുമകന്‍: നവാസ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha