ഹര്ത്താല് നിയന്ത്രണ ബില്: പോലീസിന് അമിതാധികാരം വേണ്ടെന്നു പൊതു അഭിപ്രായം
കേരള ഹര്ത്താല് നിയന്ത്രണ ബില് പാസാക്കുമ്പോള് കരടു നിയമത്തിലേതുപോലെ പോലീസിന് അമിതാധികാരം നല്കുന്നതു സമൂഹത്തിനു ദോഷം ചെയ്യുമെന്നു പൊതു അഭിപ്രായം.
ഹര്ത്താലിലെ അക്രമസംഭവങ്ങളിലെ നാശനഷ്ടവും നഷ്ടപരിഹാരവും കണക്കാക്കാന് ജില്ലാ ജഡ്ജി ചെയര്മാനായ ഹര്ത്താല് നിയന്ത്രണ അഥോറിറ്റി രൂപീകരിക്കണമെന്നും ആഭ്യന്തര മന്ത്രി രമേശ് ചെന്നിത്തല അധ്യക്ഷതയില് ചേര്ന്ന നിയമസഭാ സെലക്ട് കമ്മിറ്റിയുടെ തെളിവെടുപ്പിനിടയില് വിവിധ സംഘടനകളുടെ ഭാരവാഹികള് അഭിപ്രായപ്പെട്ടു. നഷ്ടപരിഹാരം കണക്കാക്കാന് ഹര്ത്താല് നിയന്ത്രണ അഥോറിറ്റി വേണമെന്ന അഭിപ്രായം സമതിക്കു മുന്നില് ആദ്യം ഉന്നയിച്ചതു കെപിസിസി വൈസ് പ്രസിഡന്റ് എം.എം. ഹസനാണ്. നഷ്ടപരിഹാരം നല്കേണ്ട തുകയും നിയമത്തില് വ്യക്തമായി പ്രതിപാദിക്കണം. ദേശദ്രോഹവും വര്ഗീയതയെ പരിപോഷിപ്പിക്കുന്നതിനുള്ള ആവശ്യങ്ങള്, മതസൗഹാര്ദം തകര്ക്കുന്ന ആവശ്യങ്ങള് ഉന്നയിച്ചുള്ള ഹര്ത്താലുകള്ക്ക് അനുമതി നല്കേണ്ടതില്ലെന്നും അദ്ദേഹം അഭിപ്രായപ്പെട്ടു.
കെഎസ്യു ജനറല് സെക്രട്ടറി എറിക് ഇ. സ്റ്റീഫനും കരടു നിയമത്തിലെ വ്യവസ്ഥകള് പോലീസ് ദുരുപയോഗം ചെയ്യാനുള്ള സാധ്യതകള് വിവരിച്ചു. ഹര്ത്താലിന്റെ പേരില് അക്രമമുണ്ടായാല് അക്രമം നടത്തിയ ആളോ അക്രമം ഹര്ത്താല് ആഹ്വാനം ചെയ്ത സംഘടനാ നേതാവോ ആരു പ്രതിയാകുമെന്നു നിയമത്തില് വ്യക്തമാക്കിയിട്ടില്ല. പല സംഘടനകള് ഒരേസമയം പണിമുടക്കു പ്രഖ്യാപിച്ചാല് ഫലത്തില് ഹര്ത്താലാകുന്ന അവസ്ഥ ഒഴിവാക്കാനുള്ള നടപടികളും വേണം.
ഹര്ത്താലിന്റെ പേരില് പൊതുജനങ്ങളുടെ സഞ്ചാര സ്വാതന്ത്ര്യം തടയരുതെന്ന ആവശ്യം ഉയര്ന്നപ്പോള്, ജനങ്ങളുടെ പ്രതിഷേധ മാര്ഗമായ ഹര്ത്താല് നിയന്ത്രിക്കരുതെന്ന ആവശ്യവും കമ്മിറ്റിക്കു മുന്നിലെത്തി.
പ്രതിഷേധ സമര മാര്ഗമാണു സര്ക്കാര് തടയുന്നതെന്നു സിഐടിയുവിനെ പ്രതിനിധീകരിച്ചെത്തിയ എന്. സായികുമാര് അഭിപ്രായപ്പെട്ടു. കേരളം നേരിടുന്ന റബര്, നാളികേര വിലയിടിവിനേക്കാള് വലിയ സാമ്പത്തിക നഷ്ടമൊന്നും ഹര്ത്താലില് സൃഷ്ടിക്കുന്നില്ല. ടൂറിസം മേഖലയുടെ തകര്ച്ചയ്ക്കു ഹര്ത്താല് കാരണമാകുമെന്ന അഭിപ്രായം ശരിയല്ലെന്നും അദ്ദേഹം പറഞ്ഞു.
കേരളത്തിന്റെ വിനോദ സഞ്ചാര മേഖലയെ ഹര്ത്താല് ദോഷകരമായി ബാധിക്കുന്നതിനാല് ഹര്ത്താലില് നിന്നു ടൂറിസം മേഖലയെ ഒഴിവാക്കണമെന്ന് ടൂറിസം മേഖലയുടെ പ്രതിനിധികളായി എത്തിയ ഏബ്രഹാം ജോര്ജ്, ഇ.എം. നജീബ് എന്നിവര് ആവശ്യപ്പെട്ടു. നേരത്തെ ബുക്ക് ചെയ്ത മുറികള് പോലും ഹര്ത്താലിനെ തുടര്ന്നു കാന്സല് ചെയ്തതായും അവര് അറിയിച്ചു. നിയമസഭയില് അവതരിപ്പിച്ച കരടു ബില്ലില് നിര്ദേശിച്ചതു പോലെ നിയമം അതേപടി പ്രാബല്യത്തില് എത്തിക്കണമെന്നു ഹര്ത്താലിനെതിരേ കോടതിയെ സമീപിച്ച ഖാലിദ് മുണ്ടപ്പിള്ളി ആവശ്യമുന്നയിച്ചു.
നിയമപരമായ അവകാശം നടപ്പാക്കാത്ത പോലീസ് ഉദ്യോഗസ്ഥനില് നിന്നു 10,000 രൂപ വരെ പിഴ ഈടാക്കാനുള്ള കരടിലെ നിര്ദേശം പിന്വലിക്കണമെന്നു പോലീസ് സര്വീസ് ഓഫിസേഴ്സ് അസോസിയേഷന് നേതാക്കളായ പി.ബി. പ്രശോഭും സഖറിയാസ് ജോര്ജും ആവശ്യപ്പെട്ടു.
ആഭ്യന്തര മന്ത്രി രമേശ് ചെന്നിത്തലയെ കൂടാതെ നിയമസഭാംഗങ്ങളായ കെ. മുരളീധരന്, വി.ഡി. സതീശന്, സി. ദിവാകരന്, മാത്യു ടി. തോമസ്, കെ. ശിവദാസന്നായര്, എ.എ. അസീസ്, കോവൂര് കുഞ്ഞുമോന് എന്നിവരും തെളിവെടുപ്പിനെത്തി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
