രമേശ് ചെന്നിത്തല രാജിവയ്ക്കണം: കോടിയേരി ബാലകൃഷ്ണന്
വിജിലന്സ് വകുപ്പിന്റെ ചുമതലയുള്ള രമേശ് ചെന്നിത്തല ബാര് കോഴക്കേസില് ഹൈക്കോടതി നീരീക്ഷണത്തിന്റെ സാഹചര്യത്തില് രാജിവയ്ക്കണമെന്ന് സിപിഐ എം സംസ്ഥാന സെക്രട്ടറി കോടിയേരി ബാലകൃഷ്ണന് ആവശ്യപ്പെട്ടു. ഹൈക്കോടതിയില്നിന്ന് രൂക്ഷവിമര്ശമുണ്ടായിട്ടും മന്ത്രിപദവിയില് തുടരുന്നത് ശരിയല്ല. വിജിലന്സ് വിഭാഗം കേസുകള് കൈകാര്യംചെയ്യുന്നതിലെ ക്രമക്കേടുകളിലേക്കാണ് ഹൈക്കോടതി വിരല് ചൂണ്ടിയത്. പാമൊലിന് കേസ് അന്വേഷിച്ച വിജിലന്സ് എസ്പിക്ക് ഐപിഎസ് ശുപാര്ശ നല്കിയാണ് കേസ് അട്ടിമറിക്കാന് ഉമ്മന്ചാണ്ടി ശ്രമിച്ചത്. അതിലൂടെ ഉമ്മന്ചാണ്ടിയെ വെള്ളപൂശിയ റിപ്പോര്ട്ടാണ് വിജിലന്സ് നല്കിയത്. ഇതിലൂടെ കേസ് അട്ടിമറിക്കുകയാണ്. ബാര് കോഴക്കേസില് കെ എം മാണിക്കെതിരെ വിജിലന്സ് കോടതി തുടരന്വേഷണത്തിന് ഉത്തരവിട്ടു. എസ്പി സുകേശന്റെ അന്വേഷണ റിപ്പോര്ട്ടിന്റെ അടിസ്ഥാനത്തിലായിരുന്നു ഉത്തരവ്. അതേ ഉദ്യോഗസ്ഥന് തുടരന്വേഷണം നടത്തിയപ്പോള് മാണി കുറ്റവിമുക്തനാകുന്നു. എസ്പിയുടെ ഭാര്യക്ക് ഉദ്യോഗക്കയറ്റവും വീടിന് സമീപത്തേക്ക് സ്ഥലംമാറ്റവും കിട്ടി. ഇതെല്ലാം വലിയ സംശയമുയര്ത്തുന്നു. മാണിയെ രക്ഷിക്കാന് തട്ടിക്കൂട്ടിയ റിപ്പോര്ട്ടാണ് കോടതിയില് ഹാജരാക്കിയത്. തുടരന്വേഷണ ഉത്തരവില് വിജലന്സ് കോടതി പറഞ്ഞതൊന്നും അന്വേഷണ ഉദ്യോഗസ്ഥന് പരിഗണിച്ചില്ല. അന്വേഷണം തൃപ്തികരമല്ലെന്ന് കോടതി പറഞ്ഞത് വിജിലന്സിനെതിരായ കുറ്റപത്രമാണ്. ഉമ്മന്ചാണ്ടി പറയുന്നതനുസരിച്ച് തുള്ളിക്കളിക്കുന്ന സംവിധാനമായി വിജിലന്സ് മാറി. ഇക്കാര്യത്തില് ഉമ്മന്ചാണ്ടിയും രമേശ് ചെന്നിത്തലയും പ്രതികരിക്കണം. വിജിലന്സിന്റെ പ്രവര്ത്തനം അഴിച്ചുപണിയണം. സിബിഐ മാതൃകയില് സ്വതന്ത്രസ്വഭാവമുള്ള അന്വേഷണ സംവിധാനമാണ് ആവശ്യം. ഇത്തരത്തിലുള്ള ജസ്റ്റിസ് കെ ടി തോമസ് കമീഷന് ശുപാര്ശ നടപ്പാക്കണം. നാല് ഡിജിപിമാരുണ്ടായിട്ടും വിജിലന്സ് വിഭാഗത്തില് ഒരു എഡിജിപിയെ നിയമിച്ച് എല്ലാ അന്വേഷണങ്ങളും അട്ടിമറിക്കുകയാണ്. വിജിലന്സിന്റെ കൈയുംകാലും കെട്ടിയിരിക്കുകയാണ്. ചാടിക്കളിയെടാ കുഞ്ഞിരാമാ എന്ന സ്ഥിതിയാണ്. ചെന്നിത്തലയ്ക്ക് വകുപ്പ് ഭരിക്കന് ശേഷിയില്ലെന്ന് തെളിയിക്കാനുള്ള ശ്രമമാണ്. നാട് നാഥനില്ലാ കളരിയായി. ഭരണമില്ലാത്ത അവസ്ഥയാണുള്ളതെന്നും കോടിയേരി ബാലകൃഷ്ണന് മാധ്യമപ്രവര്ത്തകരുടെ ചോദ്യത്തിന് മറുപടി പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
