രാജിതീരുമാനത്തില്‍ നിന്നും പിന്നോട്ടില്ലെന്ന് കെ ബാബു. മന്ത്രി സ്ഥാനത്തേക്ക് തിരിച്ചെത്താന്‍ വ്യക്തിപരമായി ആഗ്രഹമില്ലെന്നും അദ്ദേഹം വ്യക്തമാക്കി. രാജിക്കത്ത് കൈമാറാത്തതിനു ഉത്തരം പറയേണ്ടത് താനല്ലെന്നും കെ.ബാബു പറഞ്ഞു. ബാര്‍കോഴ ആരോപണം അന്വേഷിച്ച വിജിലന്‍സിന്റെ നടപടികളില്‍ അപാകതയുണ്ടെന്ന് കരുതുന്നില്ല. കേസില്‍ അഡ്വക്കറ്റ് ജനറല്‍ അപ്പീല്‍ നല്‍കിയതില്‍ പരാതിയില്ലെന്നും കെ.ബാബു തിരുവനന്തപുരത്ത് പറഞ്ഞു. മന്ത്രിമന്ദിരം ഒഴിയുന്ന കെ.ബാബു എം.എല്‍.എ. ഹോസ്റ്റലില്‍ മുറി അനുവദിക്കണമെന്ന് ആവശ്യപ്പെട്ട് സ്പീക്കര്‍ക്ക് അപേക്ഷ നല്‍കി.
അതേസമയം വിജിലന്‍സ് കോടതി നടപടിക്കെതിരെ കെ.ബാബു നല്‍കിയ ഹര്‍ജി ഹൈക്കോടതി ഇന്ന് പരിഗണിക്കും. കോടതി തീരുമാനം വന്നശേഷം, കെ.ബാബുവിന്റെ രാജിക്കത്ത് മുഖ്യമന്ത്രി ഗവര്‍ണ്ണര്‍ക്ക് കൈമാറും എന്നാണ് സൂചന.
കെ.ബാബുവിന്റെ ഹര്‍ജി ഹൈക്കോടതി പരിഗണിച്ച ശേഷമാകും രാജിക്കത്ത് സംബന്ധിച്ച അന്തിമ തീരുമാനം മുഖ്യമന്ത്രി കൈക്കൊള്ളുക , തുടര്‍ന്ന് എക്‌സൈസ് മന്ത്രിയുടെ രാജി തീരുമാനം ഔദ്യോഗികമായി ഗവര്‍ണ്ണറെ അറിയിക്കും. കോടതി പരാമര്‍ശം എന്തായാലും കെ.ബാബു രാജി തീരുമാനത്തില്‍ നിന്ന് മാറില്ല. തലസ്ഥാനത്തെ കന്റോണ്‍മെന്റ് വളപ്പിലെ ഔദ്യോഗിക വസതി ഒഴിയാന്‍ അപേക്ഷ നല്‍കിക്കഴിഞ്ഞു. എം.എല്‍.എ ഹോസ്റ്റലില്‍ ഫ്‌ളാറ്റ് അനുവദിക്കാനും ആവശ്യപ്പെട്ടിട്ടുണ്ട്. കെ.ബാബു രാജിക്കത്ത് നല്‍കിയ ശേഷമുള്ള ആദ്യ മന്ത്രിസഭാ യോഗത്തില്‍, മുഖ്യമന്ത്രിയെ കൂടാതെ 17 മന്ത്രിമാരാവും പങ്കെടുക്കുക. കെ.ബി.ഗണേശ് കുമാറും കെ.എം.മാണിയും രാജിവെച്ച ഒഴിവില്‍ പകരം ആളെത്തിയില്ല. കെ.ബബുവിന്റെ ഒഴിവിലും പുതിയ മന്ത്രിവരാനുള്ള സാധ്യത കുറവാണ്. എക്‌സൈസ്, തുറമുഖ വകുപ്പുകളുടെ ചുമതല ആരെ ഏല്‍പ്പിക്കും എന്നത് സംബന്ധിച്ചുള്ള തീരുമാനം മുഖ്യമന്ത്രിയാണ് കൈക്കൊള്ളേണ്ടത്. വരും ദിവസങ്ങളില്‍ ബജറ്റിനും നിയമസഭാ സമ്മേളനത്തിനും ഉള്ള തയ്യാറെടുപ്പിലേക്ക് സര്‍ക്കാര്‍ പൂര്‍ണ്ണമായും മാറും. എന്നാല്‍ അതിലും അപ്പുറം ബാര്‍കോഴയും സോളറും സൃഷ്ടിക്കുന്ന രാഷ്ട്രീയ പ്രതിസന്ധി നിയമസഭക്ക് ഉള്ളിലും പുറത്തും എങ്ങിനെ നേരിടും എന്നുള്ളതാവും ഭരണപക്ഷത്തിന് മുന്നിലെ കടുത്ത പരീക്ഷണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha